步出殘舊的升降機，一進店內冇店員帶位，只有收錢亞姐指指下叫我座最後窗位附近，一d禮貌都冇。全程2位企堂好似冇帶靈魂返工，落單沒精打彩，唔想做的那樣。 好啦，牛扒飯到，賣相肉酸，d肉左搭右搭砌成一碟但心諗牛扒專門店差極有個普，但原來錯哂，件扒un到飛起，又煎到柴皮底，肉冇肉味過哂火位點食呀，五十幾蚊午餐食碟垃圾？ 食完汁送飯後想埋單仲離普，等極冇人，見其他食客也不耐煩親自出去埋單，我唯有也跟同行事，呢間餐廳是否等執笠？ 一定永遠冇下次！

之前被此店名稱吸引到，今午終於有時間去試吓佢哋嘅出品。此店裝修一流十分特別，舊香港特色，店內還播放住經典名曲，步入門口已聽到一起走過的日子，一句超讚。 今日試左個香葱雞扒太陽蛋飯，最欣賞它伴有甜豉油和蔥油，用來撈飯一流！香脆雞皮兼雞肉好鮮嫩多汁，可能即叫即燒，脆口又熱騰騰的，可見廚師好有心機去整。 此店職員很有禮貌，招呼不錯，適逢又冇乜人，坐得非常舒服！ 整體食物和價位都可以，環境又乾淨，下次絕對會再試。

聞說呢度巴東牛好味道，今日特意來拜訪一下。 鋪子好舊式，舊裝修但環境乾凈，中午13：30約7成人客，以呢度頗偏僻的地方算多客人吧。言歸正傳，正當我點了個巴東牛飯加印尼kopi, 老闆娘建議試下個印尼黃錦飯 （佢話冇咁單調、多d配菜），真係幾好人  。 


呢個黃錦飯有好靚嘅賣相 ～ 有巴牛、燒雞、旦同蔬菜，巴牛比其他配菜確勝一籌，夠淋入味；燒雞'鞋口'冇乜味，其他蔬菜及旦一般啦；再試口印尼kopi, 味道甚怪，口感唔香唔滑，冇乜咖啡味，差 , 嘥了十幾蚊添。

整體食物質素一般，但勝在小店老闆娘友善, 在這兒亦可以嘗到一個寧靜、感覺舒適的午餐。

賣相甚吸引的一間bread shop， 每個造形一d都唔馬虎，當天逛完element都忍不住楝左過明太子芝士薯仔包作為早餐 。的的骰骰的明太子包末吃已聞到香氣，面上佈滿芝士，正 ! 而咬落去麵包軟熟細密，麵粉味十足，不像它店的空心；白烚薯仔滿佈裡面，每哎一口亦有飽肚之感 。唯一不可取的就是價格啦~偏貴，性價比略為不足，但還是可以一試的 。

從團購網得知有間厚興瑜記賣手撕雞，好像甚出名、老字號和多分店，見半價三十幾元便有3款材料，價廉物美，於是便落了單。此店只做外賣，所以裝潢是沒有了，店內職員亦只得2位亞姐，但眼見舖面算甚整潔，一整盒內含手撕雞、雞腎和鷄腳 (二人份量)。手撕雞即叫即撕，去骨雞肉肉質冇預期中滑溜，但好在雞味十足，可以配上黑醬油和薑蓉來提味 。腎很入味爽口，比主角還要出色、口感豐富。 鷄腳偏硬又不太惹味和軟腍 (是店員推介的 ) 。如果要以正價肯定不會買 (即使送左$3現金券 )，因沒有大太驚喜，合格而已。

此店在平田商場內，前身都係一間茶記，但自LINKS的商場升格，光鮮的百份百便進註了。中午一來到，看餐牌款式甚多，看了一會便order了招牌菜之一 -  縠飼牛肉炒讚岐烏冬 加 (凍奶茶)。不消10分鐘便上枱，四十元的烏冬濃稠適中，味道調得很好，有牛肉、青紅召、菇、椰菜等，很足料。出色之處在於甜甜的汁料和肉質頗腍入味，口感豐富，如果加多少許芝麻會更好吃，而烏冬則煮得偏淋，不夠彈牙。 凍奶茶入口不夠香濃幼滑，可能奶和茶的比例不對，入口有少少鞋，味道過得去而已。
吃完肚子脹脹地步出店外，想想份量不算多以咁既價錢埋單確係偏貴（$46），必定係裝潢成本轉移俾食客，如果價錢再平民啲，食物keep住質素而有口碑，相信會更值得支持！

放半天假享受下人生，專程嘆一下La Kafaa o個個All Day Breakfast (聽聞好正)，12：30到左，唔洗等位，我沒有多挑選sets，因心目中己有定案，要有Egg Benedict的E2(未吃過想試試) 。
門面裝修不錯，甚有歐陸feel，但比較奇怪的就係收銀和職員，是沒有uniform的，好像好part-time和不專業的，以咁既門面&環境奇怪d 。
今日氣溫尚算可以，我選擇了坐出面( 好似氣氛正d）。但惡夢開始出現，枱面還是油淋淋，地下亦沒有清理好(有雀屎和垃圾)，沒法子 (冇哂枱） ；首先店員上了杯咖啡，賣相唔得、沒有香濃咖啡味、飲落像奶茶般，想想我平日飲開的二合一還比它出色啊！
不一會，Main Course 到來，嚇了一跳，$98的餐果然份量十足，開始驚食唔哂，賣相正好多，不過要試下好味先知。碟上有全麥多士、Egg Benedict、脆皮腸、豬肉腸、辣香腸、脆薯餅、煙肉、磨菇、粟米和什菜。【多士】微暖，不脆，勉強可以
【磨菇和什菜】涷的，磨菇濕淋淋沒菇味、硬身，難吃
【粟米】不新鮮，應該係放在水中太耐至顔色暗淡微黑
【香腸】無論是什麼腸都是微暖，沒有腸味(可能亦係長期浸水中保溫所至)，唔好食！最離普的是脆皮腸(皮不脆，是淋皮的)，咁簡單的一道都整唔掂 omg... 
【薯餅】都可以，脆口，煎至金黃色，Okay呀
【煙肉】這個亦都Okay，不肥膩不乾身，味可以
【Egg Benedict】最正係蛋汁長流，鬆包加上芝士非常惹味，全碟至正係呢個；不過好似唔太正宗，點解中間冇Ham既 ???
沒有想過同其他OR食評有咁大嘅落差，雖然室外有好外國feel，可以放下狗，但食物質素和衞生都係重要一環，試了一次便算，下次再試另一間正宗d嘅Egg Benedict。

LGB 暫時來講係最好味的Macaron  ....

這天點了個8件裝，有個漂亮的盒子連色帶，一個禮物模樣 Earl grey
Lemon
Raspberry
Bitter Chocolate
Black Forest
Pistachio
Rose
Vanilla
口味非常多，從食物柜的十數款中揀了以上8件，基本上每隻都有4重口感，外脆、內軟、再加上內面cream 同果醬，比之前食開的Macaron (Jean-Paul Hevin) 有所不同，口感豐富、美味好多；尤以Earl Grey、 Raspberry 同 Bitter Chocolate 最好味、出眾！ 價錢合理，值得一試 

從同事們口中所知，在深水埗有間冰室的菠蘿油好正、好出名， 於是便相約友人去品嚐品嚐。星期天的下午4：00左右，人山人海，生意十分好，可能係新裝修和食品質素所吸引 。講真，價錢並不便宜，坐亦不甚舒適，但一啖吃吃那個冰鎮菠蘿油便愛𣎴停口，熱棘棘的皮面香口香甜，麵包柔軟，再加上冰凍牛油，十分匹配，牛油好香，大滿足。
奶茶亦都不錯 ~ 幼滑鮮奶不鞋口，非常棒，作為一個下午茶確係不二之選，但為了健康，小吃多滋味，嘻  ！

25號晚去了土瓜灣做野，見不太肚餓，於是便想想吃碗麵來充充飢，當前一看，便是譽麵坊；等了一分鐘便有位，看看食客門同聽過侍應大姐的推介，我便點了個南乳雞球米線加碟菜心。南乳雞球和米線分開，使到炸雞球不會變淋，賣相10分我俾9分！估不到$22蚊的一碗粉會咁正咁大碗，湯底濃厚，吃完不口乾，有雪菜增加美感口感，主打雞球細滑不鞋不乾身南乳味適中, 不夠味可再點醬，總數有6件，足料。菜心碧綠新鮮，但弄得不夠淋身，爭少少。 這兒坐得𣎴太舒適，人流算幾旺，好多時亦見有客人等位呢。