"娜多"開左咁耐, 經過門口幾次都係第一次入去食, 原因係之前見餐牌係西式同意粉類為主, 幾次同行者都話興趣不大, 今次經過門口見多左個台式雪糕吐司磚的大牌, 再睇下佢餐牌, 有埋果茶, 好似 teawood wor .......

等左一陣就有位,  佢餐牌除左晚餐 set 外, 仲有其他意粉 / 焗飯類, Pizza 等....我又發現佢有幾款飯/意粉類配個焗薯及跟份小食, 覺得唔錯, 一set 有幾樣唔同味道嘅野食唔使咁悶, 再加 $15 有埋湯同餐包, 連餐飲一杯

餐湯及餐包 +$15
選了忌廉湯 - 之前睇過食評話呢D嘅湯好飲, 但我呢碗飲落覺得很奶水味, 不夠香濃, 茶餐廳的西湯味道, 失望
餐包 - 也像是茶餐廳餐包, 沒有麵包香味, 仲凍凍地  吉列豬扒飯 set $68

主食 : 吉列豬扒飯 - 飯底係珍珠米, 配上日式咖哩汁, 汁的份量唔算多, 帶甜不辣, 吉列炸得香口, 夠乾身不油膩, 可是豬扒醃得唔入味, 太淡喇

配菜: 吞拿魚焗薯 - 焗薯放上一pat 罐頭吞拿魚蓉, 再加芝士片焗至金黃, 正常味道

配菜: 燒豬助骨 - 佢好似有5樣野揀, 例如吉列魚柳, 脆炸單骨雞 等等 ; 我揀左最愛的豬助骨, 有2支骨, 豬肋骨醬汁香濃入味, 肉質鬆軟, juicy, 好食

配菜: 還配上少許碎蛋沙律菜, 不錯, 可中和一下腸胃 熱情果茶 - 味道清香, 不太甜, 還有很多鮮果呢 原價 $38 現在免費升級, 好抵 餐廳正在舉辦活動, 只要裝她們的 app, 再依指示拍攝檯上 Logo 及上傳, 餐飲即可免費升級為果茶, 我當然玩左啦 ^^

見食評話服務差, 我當日又唔覺, D侍應都好有禮貌答, 係叫拎水要叫2, 3次先有人拎黎, 其他都OK ar, 係我好彩定改善左呢 ?

其實幾年前嚟過一次食Dinner Buffet, 覺得普普通通, 冇野令我留下深刻印像想再回來吃的, 當時冇生蠔供應, 有即燒波士頓龍蝦, 但甜品選擇很少, 味道亦不太吸引, 所以冇再去過........

近來要搵地方吃Buffet, 見HSBC 有 promotion 做8折, 推出北海道主題自助晚餐, 又有即開生蠔, 就訂左位再試下, 可惜...........仍然令人失望, 食物質素比較低

當晚客人不多, 會否與食物質素有關呢? 還是.......

一入門口就係即開生蠔區, 生蠔有3款, 2款澳洲蠔非常瘦, 勁細粒肉, 1款法國蠔就大少少, 而且3款都比較咸, 由其 Streak Bay Oyster Australia 超咸 , 幸好食落都算新鮮, 不過開蠔師傅係8點鬆D就開定左幾碟係度, 之後就失左蹤, 未夠9點只擺左3碟共9只開左嘅蠔係度, 人同蠔影都冇再出現, 友人本來想再食蠔, 但見到咁情況都沒意欲拎了, Buffet 時間係至到 10點, 但 9點就連人帶蠔消失有點那個囉

海鮮區 - 得長腳蟹同凍蝦有鮮味
而家做緊日本美食, 所以海鮮區有北海道毛蟹 - 但係好可惜, 毛蟹腳冇鮮甜味, 免強只能說中間一小節有少許鮮味, 應該係下價貨, 唔掂
冰鎮新西蘭黑鮑魚 - 完全冇味, 友人拎果轉形容似食緊擦子膠 我後尾拎果轉好少少, 但都係冇乜味, 同海鮮應有嘅鮮甜扯唔上關係, 睇黎又係下價貨
長腳蟹 - 呢個反而好鮮甜, 最好食 但都係正常應有質量, 好多Buffet 都食到架啦
凍蝦 - 蝦都好食, 肉質結實, 鮮甜
海螺 - 又係冇鮮味 冷盤 試左幾樣
北海道男爵薯仔沙律 - OK la, 正常, 其實食唔出同普通薯有乜分別, 仲混左粟米粒
松葉蟹膏筒 - 用cone 裝著, 呢個幾鮮味, 好食
黑毛豬火腿 - 咸 d 但都幾香
沙律菜一般, 有部份菜唔太新鮮, 見到已開始皺刺身 
有帶子, 甜蝦, 油甘魚 都好味 ; 黃鰭拖羅就唔好, 有根的熱盤
海龍皇湯 - 友人試左, 話似有落味精
靈芝猴頭菇雞湯 - 得陣苦味, 唔香, 唔甜, 總之難飲
健康金錢雞 - 由3件食材組成, 最底係雞肝, 中間係桃之類, 頂部似係黑毛豬叉燒, 但成舊都冇味道, 淡謬謬
毛蟹粥 - 幾甜, 不過唔知係咪落味精, 因為裝左一殼多的份量, 都係食到一粒仔蟹肉
煎鴨肝 - 原本訂位問時係講鵝肝, 點知係鴨肝, 由於呢度D廚師鐘意一早整定晒放係度, 所以到你拎時係唔熱嘅, 當然冇左外脆內軟嘅口感啦, 亦都因為凍左, 甘香味都欠奉, 而本身鴨肝又冇鵝肝咁香同油份較少, 所以呢件鴨肝係令我好失望
席前燒和牛片 - 友人拎完一轉話又係凍嘅 (又係整定放係度, shit) 所以唔好食.....我拎時好彩, 見個廚師放左2碟煎好嘅係檯, 有2片仲煎緊, 我梗係指示果2片啦, 因為仲暖, 所以我呢份幾好食, 有牛香 , 不過食完想再拎時, 個廚師同和牛都失蹤了, 只淨下頭先果2碟凍野係度, 果時只係 9點左右 @@
友人又拎左個炆鵝掌, 我一望話D菇唔似冬菇, 係鮮菇 佢一食果然係, 唉, 幾百蚊個 buffet 居然用鮮菇, 要知道鮮菇根本冇冬菇嘅香味, really cheap lor
燒大虎蝦 - 你唔裝都唔知佢個爐邊有虎蝦架, 要問佢的, 友人拎左但個樣燒到好老, 佢地都話好鞋, 唔太好食, 到9點多少少, 另一友人想拎, 只見成個區的廚都唔見晒, 留下已預先整熟的食物, 虎蝦放左燒爐的一角, 頭已發黑 @@ 最後梗係唔拎, 又黑又凍的蝦 omg
仲有其他熱盤, 蒸斑, 咖哩, 燒味 都冇試甜品
蛋糕試左幾款, 咪道一般, 食落比較濕
北海道蜜瓜布甸 - 冇乜味, 沒香味, 又唔香甜, 唔睇樣都唔知食緊咩
北海道千層蛋糕 - ok gei, 係濕左D
黑森林蛋糕 - 個蛋糕底好濕下, 又係唔香囉
心太軟 - 8點零果時見有職員即場焗緊, 果時食緊其他野冇拎, 但係 9點左右, 又只係見放左製成品係檯面用蓋吸住就算, 人去機空.... 大佬, 心太軟係要即焗即食架, 頂, 放到凍晒點心太軟呀, 9點炸, 又係咁, 真係火都黎 最後友人都免強拎左, 只能當舊朱古力蛋糕咁食囉 Haggen-Dazs 迷你杯裝雪糕 - 有3款咪 : 咖啡 / 曲奇碎 / 士多啤梨........9點半到就冇晒咖啡味, 問佢入面仲有冇都話係晒度 @@

總括:
同多年前食一樣, 冇野會令你諗起想再黎食,  今次冇龍蝦添, 呢個價錢有更好的選擇
最差就係呢度D廚好鐘意一早整定要熱食嘅食物, 之後人影都唔見, 樣樣都擺到凍晒硬晒, 令食物應有嘅味道同口感盡失, 浪費資源, 敷衍食客
真係未見過 buffet 至10點, 會9點就唔見晒即場需要負責烹調熱食嘅人囉
食物已經都幾多樣冇乜味, 唔好食, 仲要熱食變凍食, 真係難以接受

預先訂左位, 到左後發現酒家攪一周年慶祝晚會, 大廳開行音響唱歌, 幸好我們是被安排坐房內的檯, 否則嘈死, 我們連BB 共9人給了一張大檯, 因未齊人我們先點菜, 再叫起....

其間一 "知客" 入來想要求我們換檯, 出返大廳坐, 說什麼有十幾人在外等緊想要我地張大檯, 我說不調, 她再說他們一早訂左檯, 原本呢張檯係佢地訂左.......她真的當我們傻的嗎 ? 我都係訂左位你地安排我地坐, 仲叫晒野, 根本就係突然有街客, 想我換大檯比佢地, 出面嘈到拆天咁點食, 講句野都聽唔到, 跟住聽到個知客好大聲咁同出面講: 佢地唔肯換呀 (她的聲音很不悅)

講返食物

龍蝦芝士烏冬 $68份  - 我地7人以上可以叫2只, 上檯發現得幾舊龍蝦, 似一份份量, 向個著紅衫的女侍應查問後佢就拎返走, 後尾再上返就多左2-3舊咁下下, 但全碟都係腳,爪, 頭等部位, 一件龍蝦身的肉都冇(係一件都冇, 唔係少), 烏冬底依然係一人份量, 睇佢張上菜紙明明寫住 "龍蝦芝士烏冬 1" , 再問返個侍應, 她很悔氣話呢個1 並唔係1份, 話佢張單係入2份, 呢個有2份.......但其他菜我地叫1份, 佢張上菜紙又係寫1 .....咁即係任佢講 ?
佢又堅持話你叫 2份龍蝦都係得1份烏冬份量, 呢間富臨好呃秤   即係我地比2份錢就只係食龍蝦頭同爪+1份烏冬 ? 好離譜啫 

頂級牛仔骨煲 $88 - 呢個都好過份, 全煲就係比牛仔骨 "果粒白色骨" +薯仔粒, 牛仔骨食得多, 原來呢間的牛仔骨就係指淨係比粒 "骨" 你食, 而粒骨痴住果少少肉都係冇咪同 UN, 又乾, 呃錢之選, 搵笨!   (上菜時忘記影相, 臨尾先補影一張, 真係全煲都係呢D骨粒 ) 極品燒鵝皇半只 $180 - 呢個ok, 皮燒得夠身, 幾香嘅

花膠姬松茸燒豆腐 $62 - 豆腐切得薄身, 因為薄所以炸完太乾, 燴唔入味, 成碟冇乜味

鐵板黑椒豬手 $98 - 黑椒味唔夠, 皮又唔夠淋, 麻麻地

海參花菇鵝掌煲 $88 - D海參硬梗梗, 冇味, 都未扣到淋身就煮, 失敗! 鵝掌就正常夠淋

最後埋單,又係果個著紅衫的女侍應, 收我地9個茶位, 我問佢BB 都要計?
佢仲大聲加悔氣話我一早唔講, 訂位時就要講定架啦, 而家打左單你先講, 我話訂位時講左啦係你地唔mark, 佢先細聲返D , 後尾退返1位茶錢, 但呢位阿姐態度真係很差勁!

頭2個菜都係搵笨, 呢間野好唔老實,  商品說明條例知唔知係乜 ? 

因為有餘錢係團購公司而又就到期的原因, 見呢個團購寫出黎幾多野食, 就買左Dinner Buffet 試下, 老實講, 團購價同用Openrice折扣卷1-4的buffet只平11大元, 而5-日更只平2蚊雞, 如果唔係有錢要用跟本唔需要買團購……

Buffet在一樓, 地方唔算大, 拎野食地方集中係中間同門口位, 一入門口係烚粉麵檔, 檔前面有個碟放左幾件疑似天婦羅係度, 見到油淋淋完全冇吸引力, 對面就係Dreyer’s 雪糕, 當晚有雲尼拿, 石板街, 薄荷朱古力 3款, 再入少少就係甜品檔, 中間就係冷盤同熱盤, 但好多盤野都冇名牌, 都唔知係乜東東

每人送2只芝士焗蠔 - 蠔比較細隻, 但個汁就幾好味, 可惜得2隻
汽水飲品自助式任飲
魚生有4款(吞拿魚,三文魚,鯛魚,八爪魚) - 我拎左三文魚同鯛魚, 三文魚係腩位幾肥, 不過食落覺得麻麻地新鮮,  鯛魚冇咩味, 食左呢round就算
壽司有幾款, 我胃空間有限, 所以食buffet我好少拎舊飯同埋烚粉麵黎頂住個胃, 所以2樣都冇食到
天婦羅 - 只見來來去去都係得幾片雜菜放係度, 又淋pat pat唔吸引, 完全冇動力去拎, food list寫有天婦羅蝦同軟殼蟹, sorry係一件都冇架

海鮮
長腳蟹 - 蟹腳的肉有少少霉, 唔係好甜, 肉質唔係咁新鮮, 不過就唔係話好咸
蟹鉗 - 好鮮甜好彈牙, 好好味, 呢個明顯新鮮好多啦
龍蝦仔 - 的肉都好爽好彈牙, 蝦頭有膏幾香, 不過細隻冇乜肉
藍青口 - 冇咩鮮甜味肉係林林地, 似乎唔係幾新鮮
蜆 - 鮮甜, 但肉質都唔係話好結實, 我拎3只有2只有少少沙,
凍海蝦 – 爽口有蝦味

自選沙律菜 – 正常, 但有隻小蒼蠅係度飛來飛去囉, 感覺唔太衛生
另外海鮮側邊放左薯仔沙律, 不過見比人筆到有少少一pat野, 又唔想食咁多殿粉質, so冇試, 仲有燒牛肉沙律, 蛋沙律都冇食, 唔見有鮮蝦木瓜沙律

cold cut的煙三文魚質數一般, 沙樂美腸 & 黑椒牛肉都ok, 三文魚鵝肝卷幾好食

西餐湯係甘荀忌廉湯 - 奶味較重, 唔覺有忌廉香
中湯, 餐包同幾款芝士冇試

熱盤
燒羊架 – 燒得好嫰滑, 肉仲見到粉紅色, 好食, 係肥左DD, 可惜係我地一坐低時出左幾件好快比人拎晒就冇再出過, 所以只食到一件
咖哩牛腩 - 友人話都好食架, 我就冇試到
燒三文魚頭 - 都燒得幾香口, 夠鹽味又夠黑椒味
豬腳薑 – 友人話好食, 好淋, 睇個樣都好入味咁, 但我怕漏就冇試啦
豉油皇蝦 (抑或茄汁蝦呢) – 好惹味, 唔錯呀, 但我食左3隻有1隻少少霉, 友人話佢食幾隻都好食喎
炸魚卷 (估係, 因為冇名) – 用脆漿包著紫菜裡面似魚蛋, 幾爽口, 炸得好脆
仲見有條蒸鱸魚, 冇食到
磨菇意粉 – 麻麻地, 成兜得幾片菇, 冇咩味 (之前見到有出過肉醬意粉, 我地冇拎到)
餐車有燒牛肉, 可惜燒到全熟, 好似柴皮咁, 鞋烚烚, 完全唔掂, 難食
有盤類似牛扒, 冇名牌唔知係咩, 見塊肉仲嫰過塊燒牛肉, 起碼中間見到粉紅色, 但飽飽地冇試到
當晚我就見唔到椒鹽蝦, 黃金蝦, 芝士焗蝦, 焗青口, 斑片, 牛仔骨, 菜膽雞, 海南雞等等啦, 我發覺呢度有幾盤野係食完會轉其他款嘅, 唔知係我咁啱見唔到定真係冇出過呢, 但我想食囉
當晚有自製waffle, 我地都冇食, 唔見有pancake, 仲有3個樽裝有中式餅仔如水泡餅, 雞仔餅等係同一張檯度

甜品款式非常少, 有3款係杯仔底下放的果醬再吱pat cream, new york cheese cake 好淡芝士味, 綠茶cake 好普通, 朱古力mousse朱古力味幾濃, 最好味係呢款, 一款唔知咩用隻匙裝住友人話好難食, 仲有一款和果子同斑蘭蛋糕冇食, 西式係得呢幾款平價野, 中式見有小煎堆, 蛋散, 蛋撻仔等3-4款啦, 冇試到
蛋糕甜品就成晚都係呢幾樣, 冇轉過款
我想食的心太軟, 西米焗布甸, 馬豆糕, 芝麻卷, Tiramisu, mango cheese cake, blueberry cheese cake, cream brulee 等, 係團購food list 度有但當晚全部都冇, 勁失望!

D字雪糕好辛苦先挖到半球石板街, 因為由頭到尾都係得果3盤, 中段盤石板街已挖到差不多見底都冇人換個盤新出黎, 到我拎時就真係已經見底挖唔到幾多

總括黎講, 當晚食物款式唔算多, 海鮮魚生唔係太新鮮 (不太能接受), 只有其中幾款熱盤較為好味, 蛋糕款太少, 但平時去餐廳食個set都要百零蚊, 如果要求唔太高又願意比多一舊水平平地食餐Buffet 都可以試下嘅, 但我回頭的意慾不大!

其實元氣食過好多次, 亦食過好多間, 不過從未為佢寫過食評, 呢晚去左尖咀呢間, 等左好耐先有位，呢間係好食過灣仔莊士敦道果間嘅

象拔蚌壽司 $22 – 好爽口又鮮甜, 好味
燒三文魚壽司 $16 – 我次次都會叫, 由於邊位帶有魚皮同皮下脂肪, 經燒後入口充滿魚油, 好肥美好香, 滿足
蒲燒鰻魚壽司 $22 – 大大塊鰻魚, 呢度係斜片, 唔係平面橫切, 所以見唔到大大片魚皮, 附上一包鰻魚醬自己淋上去, 正呀
牛油果軟殼蟹卷 $18 – 炸得脆脆嘅軟殼蟹夾著軟熟嘅壽司飯, 牛油果, 加埋香口嘅松子, 真係好味
炙燒黑樣三文魚壽司 $13 – 好多黑椒, 上面吱上蛋黃醬, 再用火槍燒, 外面香, 裡面滑, 必食
炙燒特大帆立貝壽司 $32 – 之前係$2x, 加價幅度都幾大呀, 好大粒帆立貝, 同樣吱上蛋黃醬, 再用火槍燒, 燒香嘅外層加埋裡面還係刺身狀, 好鮮甜, 正呀
燒牛肋骨壽司 $9/件 – 呢個有牛香味, 不過今日可能燒熟得滯, 有些 un
油甘魚壽司 $22 – 都新鮮

所有壽司的飯都仲食到暖暖地, 又軟熟, 酸度適中, 都係元氣的壽司飯最啱我胃口, 元氣係少見仲有綠茶粉沖茶, 好多地方只提供茶包

食過好幾間迥轉壽司, 還是喜歡這家 !
最差果次係食沙田峰壽司, D壽司飯酸到亞媽都唔認得，好難食

因為去開黃埔就上 openrice 睇下有咩好食, 排頭位就見到呢間時新, 於是都特登行落去試下, 店子細細, 2點店內都坐滿人,可能由於食快餐, 都好快等到位.

雙層漢堡包 $15 (配沙律汁) : 包幾軟熟, 2層漢堡都好厚身, 肉淋但係無乜牛肉味, 好多沙律汁, 少少酸又甜甜地, 個汁幾好味

牛扒包 $14 (配咖哩汁) : 個包一樣, 但係塊牛扒幾鞋口又un, 雖質感未至於好似牛肉乾咁, 但係個味確係似, 咖哩汁唔似上面個沙律汁咁豐盛, 只係食落有咖哩味, 個包一點汁都唔見有, 唔好食

炸雞脾 $13 : 見食評寫得咁好食, 又叫隻試下, 皮係脆, 咸咸地, 但係肉呢係一D味都無, 要自己一路食一路洒D鹽先叫做有D味, 而且肉質都幾鞋, 一D都唔juicy, 好多地方好食過佢

可樂 $6/罐, 要左2罐都係唔夠凍 , 只係有少少微涼, 無晒飲可樂嘅暢快感

總括我地覺得麻麻地, 3樣野得個漢堡好些D, 唔值得專登去, 就算下次經過都應該唔會再食了 ~

今晚友人本來想食豚王拉麵, 點知去到先知星期日休息
諗住轉去baby café, 落到去見到monster就係隔離, 友人話想食呢間多 d, , 7點左右黎到唔使等位, 入面燈光昏暗, 唔係好多客, 都有好多位剩, 我地選左order枱, 一邊係長長sofa 位幾好坐, 點食物的剔紙仔都有好幾張, 都幾多款喎

我地叫左呢幾樣, 佢嘅飯偏酸少少, 但又無上次食峰壽司的咁酸, 我都係鐘意元氣壽司飯嘅味道, 較合我口味

鰻魚壽司 $26 – 睇圖見有大塊鰻魚即叫, 入口肥美軟熟, 壽司飯上面的鰻魚本身已沾左鰻魚汁, 我覺得如果食呢個鰻魚壽司唔夠汁係會好失色, 呢個ok

帆立貝壽司 $35 – 帶子鮮甜, 其實好多收咁上下價錢的店都食度呢個質數, 所以唔算太特別 (呢度另多有款珍寶帶子壽司, 貴d我地無叫)

濃汁火炙三文魚壽司 $18– 一般, 食唔出咩濃汁, 就係普通一件燒左面的三文魚 幸好都係腩位都夠肥美.

黑松露吞拿魚腩鵝肝卷 $42 –上面的粉紅色係吞拿魚蓉都幾新鮮, 吞拿魚一般都係無咩特別味, 再上面黑色果 d 就係黑松露醬, 都係唔多覺有咩香味食得出, 成件最出係芒果味, 令到整件卷都有淡淡芒果香味, 好 fresh , 如果中間的鵝肝醬改用煎香的鵝肝粒效果一定更好, 而家鵝肝味唔係幾出.

蒜香厚燒牛舌 $35 – 每件牛舌都占左薄薄粉醬炸過, 睇見個樣好似炸到乾爭爭咁, 同一般的燒牛舌唔同, 心想可能叫錯左呢個了, 一咬落去, 錯了, 原來裡面好淋, 有肉汁的, 加埋個面脆脆地, 好好味喎, 伴碟仲有少少蟹柳同生菜, 正呀 !

黃金烤蠔 $28 – 叫左一隻試下, 係面個汁真係金黃色, 先試個汁酸味同咸味剛好, 唔錯, 食埋隻蠔, oh….太老了, 有點鞋, 唔合格

整體呢講, d飯酸左d有少少搶左食材的味道, 唔做咁酸會較好, 但唔可以再比呢次酸, 再酸就會變成難食 ; 而且無元氣的飯咁軟熟, 飯還是微涼的; 食味整體唔算太出色, 價位略貴元氣少少. 但款式係頗多, 都可一試.

成日係灣仔食飯都未試過呢間, 一來嫌佢地方太迫夾, 好up dup咁, 今日家人話試呢間:

焗魚腸 : 聽講要訂, 所以行去訂左先, 係魚腸蒸蛋再放油炸鬼片係面焗, 出黎時仲好熱, 油炸鬼焗完有些少脆, 一d都唔腥
韮菜豬紅 – 非常惹味
煎蠔餅: 其實係炸嘅, 但炸得好爽身, 唔會咬落去一口油, 食落好多蠔仔, 好香,炸出黎嘅色係淡黃色, 唔似用千年油會炸到深啡色
韓式烤骨煲 – 炸香長長的ribs, 再用個汁煮返, 洋蔥吸晒d汁又香又甜, 但同時都吸左好多油, 面頭洒上芝麻, 好惹味, 必叫
龍鳳咕嚕球 – 蝦同雞片都炸得夠脆, 同個汁炒埋都唔會話淋pat pat, 蝦爽口, 雞片滑唔係炸到硬掘掘, 個汁甜酸度適中, 雖然呢個菜普通, 但係要整得好食唔係間間都做到, 唔錯.
炸子雞半只 – 呢個好一般, 皮都脆, 但雞肉唔太滑, 雞翼位好咸, 麻麻地
另叫左3個靚仔, 1支大啤

食物係大件夾抵食, 又整得好夠鑊氣, 地方就真係迫, 坐得比較辛苦, 成日驚盛菜的伙記行過會倒到自己, 幸好冷氣夠, 唔會食到一身汗.

食左幾次盛八, CWB, 旺角, 尖沙咀都試勻, lunch/ dinner水準都係好, 訂左位今日係 CWB店食 lunch, 上到都無乜人

銀雪魚定食 (約 $78)
先黎在個沙律前菜, 菜新鮮挺身, 汁裡面溝在少少wasabi, 唔算太恭鼻但係幾清
麵豉湯都係一般味道, 唔會太咸
魚生新鮮好食,
漢堡牛肉軟滑配燒汁好好味, 上面放上黑魚子咬下卜卜脆, 同牛肉的軟剛好成對比, 增加口感, 唔錯
銀雪魚好滑, 本身佢係好滑的魚, 邊間店都會做出呢個效果
茶碗蒸, 蛋都蒸得好滑, 好似有少少七味粉洒係面一齊蒸, 不過我仍然係喜歡元氣果個多些.

果味牛肋肉定食 (約 $88)
都係有沙律, 麵豉湯, 魚生, 飯, 茶碗蒸跟
牛肋肉好香牛味, 又帶少少甜味, 真係好正, 每片都佈有脂肪但又唔係一味肥 (今日呢個牛就其他野黎晒等左好耐, 催左2次先黎)

之前我食燒肉lunch set係有芝麻雪糕跟架, 但呢日無上比我地, 叫佢埋單時都無拎黎, 因為個牛肋骨等左好耐先黎, 我地又趕時間, 所以無左件事就咁就走左


希望盛八能夠繼續保持水準

黎食 lunch, 由於唔肚餓, 所以 2個人只叫左一個餐 + 小食

吉列芝士漢堡牛肉 $38
免治牛肉中間包著粒芝士 (似乎係cream cheese), 炸成吉列球, 上碟時一開二, 幾好食, 有牛香, 炸得亦夠脆身, 唔油膩, $38得一件, 唔係好大件, 係太貴了.

千層芝士吉烈黑豚定食 $148
係一層層豬肉包著車打芝士係中間再上麵包糠炸, 切件再上, 跟一碗飯, 一碟椰菜絲, 芝麻汁凍豆腐, 麵豉湯

呢度叫野係即整, 所以寫左要等20分鐘, 今日過晒時都未黎, 聽到我地前面果檯仲投訴話叫左45分鐘d野都未黎, 跟住發現原來全場得2個waiters, 仲有其他檯都有人投訴食物未黎.

我個餐黎時d芝士都有少少硬左, 所以麻麻地, 不過真係好多芝士有d滯, 個吉列就炸得好香口鬆脆, 凍豆腐有少少芝麻香, 唔錯, 麵豉湯ok唔太咸但無乜特別

每檯上都有3種醬料, 每人有一份芝麻比你自己盅碎加燒肉汁點吉列食, 另外2個就係蘋果醬同青瓜醬, 用黎淋係椰菜絲上面食, 青瓜醬好食
如果一人叫一個餐, 飯同椰菜絲係可以無限加嘅

呢度lunch同dinner 好似一樣價, $148個lunch加埋一要成$163其實有點貴, 但又未好食到會想特登去食.