影片
更多
2012-09-16
25 瀏覽
婚後大半年同返d兄弟姐妹聚會，原本打算食西餐，順便可以飲下酒，但星期五晚好多地方都冇得訂，西式酒吧餐廳又嘈又未必坐得落我地11人咁多，所以最終都係決定食中菜喇！朋友介紹話尖沙咀開左新酒樓，睇過食評都唔菜，就試下啦！餐廳位於尖沙咀棉登徑內街，近K11，真係幾難搵，強烈建議係街口整返個燈箱或招牌指路哩！我地一早訂左位，黎度仲有包廂，加上超高清電視，真係唔錯！如果洗手間既標示更清晰就更好。朋友提我有某啲菜式好快沽清，尤其係個招牌茶壺湯，所以幾日前就訂了。我地一共點左十道菜：１．椒鹽九肚魚（呢個菜我冇食到，但睇黎都幾香口）２．陳村咕嚕黑豚肉（新式咕嚕肉製法，黑豚肉細細粒，肉質鮮嫩，外皮鬆脆，加上皮蛋同蕎頭，開胃至極）３．水芙蓉蒸明蝦球（呢味菜黎到時真係嚇一跳，個盆大到可以幫BB沖涼，我估起碼落左廿隻蛋！後來先知因為人多，所以廚房落左雙份。呢道菜係ＴＶＢ得獎名菜，蝦肉新鮮爽口，蛋白幼滑，送飯一流）４．阿寶燒雞（又係此店必食之選，師傅話堅持選用新鮮雞。外皮香脆，雞肉鬆軟唔鞋口，果然不同凡響。）５．花膠上湯浸時蔬（之前係其他酒樓食過同一款菜，難免會有腥味，呢度處理花膠好明顯係有技巧，一啲腥味都冇。當
朋友介紹話尖沙咀開左新酒樓，睇過食評都唔菜，就試下啦！餐廳位於尖沙咀棉登徑內街，近K11，真係幾難搵，強烈建議係街口整返個燈箱或招牌指路哩！
我地一早訂左位，黎度仲有包廂，加上超高清電視，真係唔錯！如果洗手間既標示更清晰就更好。
朋友提我有某啲菜式好快沽清，尤其係個招牌茶壺湯，所以幾日前就訂了。我地一共點左十道菜：
１．椒鹽九肚魚（呢個菜我冇食到，但睇黎都幾香口）
２．陳村咕嚕黑豚肉（新式咕嚕肉製法，黑豚肉細細粒，肉質鮮嫩，外皮鬆脆，加上皮蛋同蕎頭，開胃至極）
３．水芙蓉蒸明蝦球（呢味菜黎到時真係嚇一跳，個盆大到可以幫BB沖涼，我估起碼落左廿隻蛋！後來先知因為人多，所以廚房落左雙份。呢道菜係ＴＶＢ得獎名菜，蝦肉新鮮爽口，蛋白幼滑，送飯一流）
４．阿寶燒雞（又係此店必食之選，師傅話堅持選用新鮮雞。外皮香脆，雞肉鬆軟唔鞋口，果然不同凡響。）
５．花膠上湯浸時蔬（之前係其他酒樓食過同一款菜，難免會有腥味，呢度處理花膠好明顯係有技巧，一啲腥味都冇。當日揀左配菜心，個人覺得如果啲菜焾多少少會更好）
６．避風塘炸豆腐（做得好好，外脆內軟，非常喜歡）
７．西汁肉眼扒（似中式牛柳，西汁味好出，係好家常既一味菜）
８．牛肝菌雞腳燉螺頭（呢度既湯經常好早沽清，如果想飲一定要訂。佢地最大特色係湯用紫砂茶壺上，目的係要鎖味同保溫，賣相亦非常特別。燉湯最重要係香濃，呢度絕對合格有餘。不過牛肝菌帶少少苦味，未必個個喜歡。）
９．大漠風沙鮮蟲草牛肉卷（好似畫一樣既賣相，靈感原來自成日食既金菇牛肉卷。呢度將佢加以改良，用新鮮蟲草代替平價既金菇。鮮蟲草我都係第一次食，原來煙煙靱靱都幾得意。而牛肉亦煎得恰到好處，牛魔王必食！）
１０．海鮮兩面黃（呢度菜黎時大家已飽了，結果老公包底，但憑賣相應該都唔錯的）
１１．陳皮紅豆沙（當晚飯後甜品送左個陳皮紅豆沙，同出面唔同，呢度既紅豆沙確係真材實料，除左有香濃既陳皮味之外，糖水本身係無一粒粒紅豆的，因為全部都溶化成沙，證明火喉十足，亦俾我對平凡既紅豆沙留下新既印象！）今次飯局大家都好滿意，同區黎講亦唔算太貴。多謝朋友的推介，希望下次可以試下飲茶！
題外話/補充資料：
今次用左九折優惠，而8月23日既頭條日報有$500送$100既優惠券，到九月尾都仲用得，大家可以搵下。
(以上食評乃用戶個人意見 , 並不代表OpenRice之觀點。)
張貼
