影片
更多
2013-06-20
195 瀏覽
勝博殿 2013-02-24 ….. 一篇過晒期既食評。 渣打馬拉松話咁快就已經過左幾個月，諗番都好似唔係好耐之前既事﹗第1次在香港跑全馬，心情興奮。結果當日天氣清涼唔太曬，成就了我的PB (sub-4真的是超額完成﹗超開心)。不過，除左多謝天公做美，我亦應該鳴謝勝博殿。點解﹖就因為佢碗飯。其實比賽前朋友已經問我比賽後想食咩。清晨6點40分出發，預計要跑4小時20分，即11點左右可以完成賽事。11點既銅鑼灣選擇其實唔係太多，而我又好唔想飲茶。之前為減重食少左飯，諗起一個地方食到好味既日本米 (又可揀麥飯)，仲可以任添飯既好地方，就係勝博殿喇。講真，跑到一半頭腦空洞元神出竅時，我都係同自己講，我要食飯﹗我要添飯﹗就係咁，呢碗飯不斷支持住我，成42.195公里，仲比預期時間快左超過廿五分鐘，係咪要多謝佢呢。期待總是美好既，咁究竟，係唔係咁好食呢﹖梳洗完慢慢行到餐廳，都未到12點。結果要等一陣。太早喇，人唔多，除左我地只有一個日本家庭。夠鍾喇，入得去喇﹗餐廳0係地庫，行0個幾級樓梯真係唔野少﹗內部裝修清雅，以淺木色為主。丼吉the one 店廂房會有布簾私穩度較高﹔勝博殿既雖然都係一隔隔既卡
渣打馬拉松話咁快就已經過左幾個月，諗番都好似唔係好耐之前既事﹗第1次在香港跑全馬，心情興奮。結果當日天氣清涼唔太曬，成就了我的PB (sub-4真的是超額完成﹗超開心)。不過，除左多謝天公做美，我亦應該鳴謝勝博殿。點解﹖就因為佢碗飯。
其實比賽前朋友已經問我比賽後想食咩。清晨6點40分出發，預計要跑4小時20分，即11點左右可以完成賽事。11點既銅鑼灣選擇其實唔係太多，而我又好唔想飲茶。之前為減重食少左飯，諗起一個地方食到好味既日本米 (又可揀麥飯)，仲可以任添飯既好地方，就係勝博殿喇。講真，跑到一半頭腦空洞元神出竅時，我都係同自己講，我要食飯﹗我要添飯﹗就係咁，呢碗飯不斷支持住我，成42.195公里，仲比預期時間快左超過廿五分鐘，係咪要多謝佢呢。
期待總是美好既，咁究竟，係唔係咁好食呢﹖
梳洗完慢慢行到餐廳，都未到12點。結果要等一陣。太早喇，人唔多，除左我地只有一個日本家庭。夠鍾喇，入得去喇﹗餐廳0係地庫，行0個幾級樓梯真係唔野少﹗內部裝修清雅，以淺木色為主。丼吉the one 店廂房會有布簾私穩度較高﹔勝博殿既雖然都係一隔隔既卡位但唔上到頂，所以感覺上較casual，但就好適合一家大細或三數知己。當日午飯時間，確實係一家大細既多，而且仲要超過七成都係年輕日籍夫婦帶住小孩，氣氛溫馨熱鬧，感覺唔錯﹗
坐低即刻見到吉豬店既標準配件 — 食椰菜絲沙律既麻醬同柚子汁，另外有濃濃既豬扒汁，仲有七味粉 (應該冇乜人用﹖)。沙律醬個樽口設計特別，唔會倒到周圍都係。枱面非常乾淨整齊，唔知去到最後一輪食客又會唔會仲係咁乾淨呢﹖因為等左一陣，開始識肚餓了。我地一人揀左個定食，都想試下唔同既野。
落單之後好快已送上椰菜絲沙律同漬物 (有青瓜同醬瓜)。勤快既店員為我地介紹醬汁，仲提我地漬物同沙律都係可以添既。好野﹗開動﹗漬物夠凍，青瓜同醬瓜都好爽脆，而且唔會太鹹，對我黎講真係好好既餐前小食。椰菜絲沙律切得幼細，當然係新鮮而且唔會水冷冷。不過，菜就唔算好甜。但加上香口既麻醬同酸甜開胃既柚子汁，一樣非常滋味﹗
主角出場喇﹗我地叫左一個黑豚豬柳定食，另一個係炸豬柳卷拼盤，每個餐都有麵豉湯同燕麥飯。另外有一小碗黑白芝麻。即刻趁熱飲湯先。湯既味噌幾香，唔會死鹹。合格。但0係大阪馬拉松之後食0個間吉豬，個湯搵細粒蜆仔做，味噌香、豬肉香中帶點鮮甜(仲可以任添架)，呢個湯味道就略為單一。飲完湯，麼打手磨芝麻先﹗黑芝麻加白芝麻，一磨就聞到芝麻香，加埋濃濃既豬扒汁，好香呀。食一口黑豚豬柳，粗粒油炸麵包糠既脆漿脆但唔硬，看似粗線條但鬆化非常。脆漿貼服咁包住豬肉，保留到肉汁，而且有豬肉香味，好味。 記得之前一次去丼吉，豬柳炸得香脆但肉好乾，而且邊位係整條脂肪，相信係肉既選材唔太好，令人失望。雖然兩店既炸漿唔同，但勝博殿今次既出品就夠熱、夠脆，鬆化唔油、有肉汁又唔肥，有水準﹗一口豬柳，一口香黏又有咬勁既麥飯，大滿足﹗
再黎既係豬柳卷拼盤，六件豬柳卷分別係包住露筍、紫蘇烏梅、芝士。紫蘇烏梅係少食既口味﹕紫蘇香味唔太突出，烏梅味道稍稍帶酸，醒胃消膩，唔錯既組合。露筍則爽甜，其實味道唔太夾吉豬，可能店方可以試粟米或蘑菇﹖而最濃味既要算係芝士豬柳卷﹕芝士半溶，確係惹味。不過就好易會膩… 就好似平時我地會食火腿芝士飛碟，或者火腿炸包，但唔會有火腿芝士炸包，就係因為會好膩。豬柳卷既特色在於係吉豬中加多點新意，但因為夾左其他野，豬味反而被搶，所以都唔會用好上等既豬肉。我其實鍾意傳統既多0的，可以食到豬肉香嘛。
曾經聽過人講跑馬拉松前做carbo-loading 食左八碗飯﹗我呢﹖最後我只係添多大半碗飯，已經好飽。跑馬拉松，something simple but difficult。無受傷咁完成一個全馬，做到自己滿意既成績，食左餐好味既午飯，開心滿足得不得了。快樂，原來可以唔使太複雜。
題外話/補充資料：
其實，店方可考慮同渣馬合作推比賽日特別套餐呀，唔使跑友次次食點心嘛﹗
(以上食評乃用戶個人意見 , 並不代表OpenRice之觀點。)
張貼
