Loooop (已結業)

大坑向嚟潮嘢多，今次就有呢間“盡食”雪糕店。所謂"盡食“，就係唔單止雪糕食得，連個杯同紙都可以食埋，夠曬環保。新店開張，自然招人氣。第一次夜晚7點拜訪，店鋪已經落閘。第二次學精了，先打電話去鋪頭，確認有貨先過嚟。作為飯後甜品，唔想太漏，揀咗藍色嘅（好似係乳酪）雪糕。造型非常可愛，尤其係粒大大嘅棉花糖，相機已經迫不及待要食先! 雪糕奶味唔算濃郁，少少酸酸哋，質地較稀，好容易溶，一定要快食。店鋪提供可以食及唔可以食嘅杯同紙，落單時告知店員即可。既然呢度嘅招牌就係可以食嘅杯同紙，梗係揀可食喇。可食杯係曲奇餅，紙係米紙。食咗幾啖，就發現個曲奇杯係一個錯誤嘅選擇。甜，過甜，完全蓋過其他一切味道。本來雪糕嘅味道就清淡，搭上呢個一味甜嘅曲奇杯，正所謂”妹仔大過主人婆“。如此甜膩嘅曲奇杯，食過幾啖之後便慘遭丟棄。同時發現垃圾桶內同樣有其他未食完嘅曲奇杯...甜品是art，睇得出店主深諳此道。甜品嘅本質係食物，如何做到味道，賣相同創意之間嘅平衡，that's the question.