Aulis Hong Kong (銅鑼灣)

話說上回數字Auntie榮休，特選於英國星級名廚Simon Rogan先生第一間海外分店「Roganic」設宴報喜，當時因全場賓客同感晚宴高質美味，主人家就好客氣地即場擇日，訂埋餐店嘅廚師餐桌「Aulis Hong Kong」，十二人啱啱好包場。
高級西餐廳嘅廚師餐桌內所有高櫈座椅均圍繞著師傅嘅開放式大舞台，設計簡潔光亮得黎極富時代感。靚靚媽咪真係眼利兼心水清，步入房間第一刻已發現四周嘅廚爐器具清一色為德國名牌「Miele」，更驚嘆個廚房一定價值不非！型男大廚Oli哥哥介紹「Aulis」為「Roganic」嘅實驗廚房，當晚由佢同助手Karl哥哥負責烹調所有食物。據悉，希臘名稱「Aulis」原來係Simon Rogan先生為紀念已故嘅拍檔Aulis Lehtimaki先生而起嘅。每晚只會招待一輪客人，務求可與食客多點互動，搭枱型式亦可令氣氛冇咁拘謹。兩位師傅極歡迎食客即場反映意見，讚賞或彈道都冇問題，因為佢地個廚師實驗室就係要為迎合各方口味作出調整及改良，態度極之誠懇。
菜單冇得揀，劃一價格為$1,480/位，另加一服務費，但為咗要提升顧客味蕾之驚喜，菜譜會喺飯後先派發。全晚大概會有二十道菜，主要食材來自新界及英國湖區嘅菜園，其餘部份係喺餐廳內種植及自家處理，道明忠於大自然及有機之概念。由於款式多，每道菜自然會較細份，並以較快之步速上；當中有幾款係長年不變嘅陣店美食，亦會有不少仍在改善中之菜式，依幾款會約每星期轉一道。飲品方面，貴客可選$680/位嘅配酒套餐。如欲自攜佳釀就要收取開瓶費，$500/樽750毫升嘅葡萄酒，$1,000/樽烈酒或1.5公升葡萄酒；個人覺得都幾貴吓，所以建議大家揀選酒牌上嘅酒品，會化算得多。侍酒師打點好美酒後，型男廚師亦不怠慢，迅即續一呈上一系列嘅「Finger Food」。可以放心，賓客用手接觸過食物後都會有熱毛巾抹手，衛生絕無問題。打頭陣先有棗紅色，貌似葡萄嘅「煙燻脆鱔」。小肥一向怕食多骨嘅魚，但礙於師傅強調脆鱔連骨都可以吞埋落肚，細佬就膽粗粗一啖放哂入口。意外地，脆鱔香脆鬆化，真係完全食唔出有幼少嘅魚骨，證明Oli哥哥冇講大話，最巧妙就係面層舖滿醃過嘅紅菜頭薄片，其酸酸甜甜之調味十分醒胃。第二道「甜粟米片」以粉紫嘅食用花點綴，擺盤好相襯地帶出花藝嘅味道。金黃嘅粟米片底層塊威化薄片極之鬆脆，脆片面上塗咗層香濃柔滑嘅忌廉芝士，再拌入脆卜卜嘅鷹嘴豆，令脆脆嘅效果更上一層樓！接著嘅「南瓜撻」除咗有爽爽嘅南瓜肉作餡，當中亦混入咗軟潤嘅梨蓉啫喱；其乾巧嘅撻皮用上南瓜精華搓揉而成，配合埋頂面灑有月桂葉粉嘅南瓜籽，質感同調味都相當豐腴討好。西餐中途或尾段好多時都會夾入一道雪葩，「Aulis」於頭段混入一小杯清爽微甜而又消滯嘅「發酵梨汁」，家人都覺果汁比雪葩更易入口，同時亦有異曲同工之效。「Finger Food」環節以兩款香菇松露包點作結。第一件「全麥麵包」以麵豉醬燒香包面，凹凸且不規則嘅黑點令包品更型似隻菇菇，外觀已令人嘆為觀止！暖手嘅麥包十分鬆軟，入面塞滿芬芳嘅松露香菇忌廉芝士，香濃而不膩滯，個人覺得絕對夠哂資格加入「Roganic」個餐單入面！
同樣暖手嘅「松露布丁」深啡色嘅外表雖貌似蛋糕，但一放入口，即細嚐到酥皮如何演變成麵包布丁般鬆潤且有層次嘅質感，濃而不俗嘅松露香慢慢滲進味蕾，何其精彩美妙！接棒嘅小杯中為「奶黃海膽伴自家魚子醬」，當中魚子醬係名法國魚子醬品牌Petrossian與Simon Rogan先生合製出嘅結晶品，堅有料到喎！奶黃海膽顏色鮮艷，且如絲般滑溜，以濃郁嘅魚子醬點綴即亮起食材原有之鮮甜，盡顯簡單美。主廚出名愛就地取材，創造新菜，黎到香港第一款就揀用咗「Hong Kong Pea」，製出「Pea Flakes & Pea Mousse」，即「豆豆薄片拼豆豆慕絲」。大家聽到「香港豆」個名時，面上都掛上問號，因為冇人知係指咩豆豆；哈，但一入口，人人都食得出係上海菜經常會食到嘅「甜豆」。「甜豆三重奏」墊底有原粒清脆嘅甜豆，中間夾入咗軟滑嘅甜豆蓉，面層輕輕加上甜豆冰沙薄片點綴，微咸中帶有薄荷香，層次分明得極為清新，確真滋味無窮！
大肥爸爸唔講，真係冇留意到之前八道餸全部都係蔬菜及海鮮，要到第九味先有肉食！來自英國嘅「生牛肉」鮮紅潤澤，肉質軟潤，當中混入嘅炭油煙味薄淡又唔搶，伴配清脆橙美嘅醃南瓜薄片及白色圓點嘅鮮蠔混醬，即能增添爽脆同鮮味。正當大家都猜測緊面前舊白色膠狀物體為何物時，Karl哥哥即解開疑團，告知蛋殼碟上嘅原來係「椰菜花雲吞」，墊底有白色嘅鮮蠔混醬，而右旁橙黃色嘅則為「原鶴海鰻魚子醬」（yellow pike caviar）。菜式左暖右凍，暖暖嘅椰菜花雲吞其實只係一件用咗椰菜花搓出嘅麵粉團，入面係冇餡嘅，其質感煙煙韌韌，調味全夠濕潤鮮濃嘅魚子醬及鮮蠔混醬帶出，都幾得意。
整晚嘅食材大多來自歐洲及香港，十九道餸內唯一有和風元素嘅就係依味「日本毛蟹紹菜卷」。顧名思義，底層嘅紹菜卷包有日本毛蟹肉作餡，口感同時清爽及幼嫩，但由於毛蟹本身已夠咸香，所以當再混入埋辣根入去就變得過咸失真。幸好頂面塊風乾雞皮輕薄如紙張，且如薯片般脆巧，成功為菜式挽回不少分數。大廚熱愛自然及有機食材，試問又點可以少得沙律菜式呢？！碟內鮮綠嘅沙律中有大大塊羽衣甘藍、白菜、椰菜、菜心、西蘭花，據悉大多採自本地菜園，每片都喺櫻桃木上烤煮過，故外表都有燒焦過嘅黑邊。沙律菜每片均輕巧脆薄，配合埋柔滑嘅松露忌廉及Westcombe芝士先加添香濃，喺面再淋上辣油及蒜油即倍添芳香惹味，細膩得很！唔知會唔會係同健康理由有關呢，除咗蔬菜之外，靚仔廚神似乎最愛就係烹調海鮮魚材。熱食之一嘅「黑蒜五味鱈魚」紫綠嘅顏色甚為艷麗，目擊到整個過程方才發現此道餸係汁液舖底後，之後擺上鱈魚件，臨尾先再放幾片「kalibos紫椰菜」加以修飾。白雪雪嘅鱈魚係經過蒸煮後以火槍輕輕燒嘅，魚肉厚身得黎超級幼嫩滑溜，清香鮮美；以魚骨濃湯餚製出嘅綠色汁液含有嘅「五味」包括青檸、薄荷、甘草、紫菜、橙，簡單可形用為微酸帶甜；最醒神就係點埋最底嗰滴黑蒜精華，甜得猶如畫龍點睛，果真一絕！熱食壓軸為陣店之「風乾熟成鴨肉」，亦即全晚第二道及最後嘅含肉菜式。相中未必睇得到，但其實墊底有剛柔並濟而又較濃味嘅鴨腿燉肉伴蕪菁蓉。主角則為色調粉嫩、肉質鬆軟、只有十四日大嘅鴨胸件，鴨皮軟滑，加配微酸爽脆嘅蕪菁薄片及紅醋汁，可一解鴨腿肉嘅膩感，可稱之為無敵嘅組合呀！由咸點轉去甜品前，先有間場嘅芝士環節。一反傳統地，此環並非芝士拼盤，而係「芝士雪糕」。弧形嘅木造杯仔底層為開胃嘅紅莓果醬，中間夾著軟滑嘅Tunworth芝士雪糕，頂面再加巧脆嘅榛子碎，有層次得毫不累贅。為咗食客可襯熱享用美食，所有碟盤都會係熱住上，秘汁亦會於最後一刻喺面前添上；真係冇估到連茶都係一樣，先有隻熱杯，再由專人續一斟出窩心暖胃嘅普洱茶。甜品環節由冰凍嘅節令「健力士黑啤雪糕伴燒奶」作序。意外地，黑啤雪糕比想中之中冇咁苦澀，雪糕當中嘅甘味好似係黑啤傳出啖啖嘅咖啡香咁，可能係因伴配上深啡色嘅蜜糖醬所致，確真有點神奇。中菜食過唔少炸鮮奶，不過燒鮮奶片都係頭一次遇上，其質感脆卜卜得黎仍可保留到牛奶嘅柔順清香，實屬驚喜之作也！甜品一出，賓客都忙著向主人家數字auntie舉杯道謝，所以返埋位時剩餘嘅三款甜點已全擺放於餐桌上。應建議先由招牌甜品「焦糖蘋果撻」起食。焦糖蘋果撻底層個撻皮酥化香脆，打成圈圈嘅焦糖蘋果亦好軟腍潤甜。的骰地砌到好似個迷你盆栽咁嘅「櫻桃蛋糕仔」非常吸睛，蛋糕仔外脆內鬆軟，喺面唧上醇香幼滑嘅伯爵茶忌廉及甜脆嘅朱古力碎碎，一口一件，甜而不膩，輕巧易入口。整頓晚餐中外表最平平無奇嘅一道點都要數作結嘅「冬甩」。肥肥嘅冬甩就好比雲層般蓬鬆，輕到好似食緊空氣咁，絲毫不油膩，當真令人一試難忘！「Aulis Hong Kong」乃「Roganic」餐廳之廚師餐桌（Chef’s Table），罕有地給予食客一個跟廚師近距離接觸嘅機會。簡潔嘅工作坊內全為高科技之潮派廚具爐頭，可看到師傅們搖晃試管、點起火槍等，在場嘅賓客都大感新穎好奇。新進廚神Oli哥哥毫無架子，大方又幽默，入門一刻已叫大家盡情輕鬆地享用快步速嘅晚餐。十九道菜中每道份量睇落細細份，但無論係食材、擺盤或器皿都充滿著神秘，最難得就係採用上不少本地食材，如菜心、甜豆等，創意無限，令食客眼界大開！以$1,480 + 10%品嚐感觀豐盛嘅美饌佳餚，直擊廚房幕後製作花絮，感覺就好似進入咗廚藝學院嘅實驗室內用膳，可擴闊飲食視野之餘，更可見證新菜嘅製成及改造，個人覺得絕對值回票價！

金東大蜑家私房菜 (筲箕灣)

姨媽們回港探親，XO仔總會有份參與不同飯局，最愛瓹窿瓹罅嘅表姐表妹二人組更例必有新店介紹，今年第一炮就帶咗大家去筲箕灣，一試隱世食店「金東大蜑家私房菜」。據悉，如欲於餐廳廂房內進行私人派對，最低消費為兩萬大元！屋企人食飯當然唔洗玩到咁大啦，當晚十三人嘅晚宴就安排喺用餐大堂內。店子牆身貼滿香港舊照。廳內大多為圓枱，如要更多私人空間則可擺出旁邊嘅國畫屏風隔開。桌上嘅餐具全印有餐店大名，衛生得體。主人家早已定下菜單，不過遇上肥肥家族最後都要邊食邊加。椒鹽龍躉皮（$218/例）：XO仔一向少食魚，就連魚皮都唔會點食，絕對冇資格去評，只係因為都幾肯定冇骨先試咗一件。正當大肥爸爸讚係極品時，細佬就覺得層炸皮都好鬆脆，不過入面條魚皮就膠膠地、韌韌地，唔係幾識欣賞。椒鹽豆腐粒（$88/例）：碟熱辣辣嘅椒鹽豆腐粒就勁啱小肥口味，豆腐粒不單外表金黃，咬落皮層香脆巧薄，豆腐心軟嫩滑溜，超！唯一所謂例半嘅份量好似少咗啲。海膽蝦春卷（兩位起；$108/位）：每人一隻嘅海膽蝦春卷鮮美潤澤，可惜海膽嫩滑得黎一啲味道都冇，還好底層嘅蝦春卷鬆化脆巧，無奈師傅做少咗個挑腸步驟，一口食唔哂的話，即發見中間有條黑絲蝦腸，查看餐牌得知每隻高售$108，個人覺得唔值依個價位囉！香煎西洋菜墨魚餅（$108/例）：扁平嘅墨魚餅賣相未必為最吸引，但食落彈牙中帶點爽脆，惹味中又帶點鮮甜芳香，美味可口。餐牌上列出$108/例，由於唔係自己找數，所以例牌有幾多粒就唔知道。啫啫芥蘭苗（$148）：普通啫啫芥蘭每客$138，要轉芥蘭苗就要另加$10。啫啫芥蘭苗翠綠油潤，惹味脆口。柚子一字骨（$128/例）：一字骨肉質鬆爽，黏上嘅柚子醬汁味道潤甜，恰到好處。手撕雞拼鴨脾（$398/隻 + $68拼鴨脾）：全晚最好食就係隻手撕雞拼鴨脾！砌到成座小山丘嘅手撕雞原來有雞骨墊底，視覺效果先可咁震撼。手撕雞肉拼鴨脾質感幼嫩香軟，以薑蔥芝麻調味清香得好鮮，混入埋足料嘅雞皮及鴨皮可增添爽潤，絕無欺場，實屬必吃推介！砂鍋豬潤炒蜆（$208）：炒蜆即場以砂鍋喺面前煮，等到啲蜆開哂就可以夾黎食。蜆隻鮮甜肥美，不過入面啲豬潤即使切成粒粒都粉粉嚡嚡咁，唔係細佬杯茶囉！上菜時，金髮大廚已道明會喺大家食完哂啲炒蜆後，用埋砂鍋剩餘嘅醬料堂煮米粉。索盡精華嘅米粉鮮濃甜美，冇得頂呀！蜑家咸鮮蒸咸鮮魚砵：食到咁上吓，叔叔就俾大家睇睇用齊咸魚及鮮魚蒸煮嘅魚砵，並介紹招牌菜建議配白飯食。怕骨嘅小肥例牌淨影唔食。薑蔥蟹炒腸粉（$458起）：後加嘅薑蔥蟹炒腸粉顏色鮮紅吸睛，就連小弟因敏感問題少食蟹嘅都忍唔住要試咗少少。嘩，蟹肉鮮甜無比，炒到入哂味嘅腸粉厚潤柔滑，一樣咁掂！香煎蠔仔餅（$138/例）：有別於潮州餐廳嘅蠔煎，蜑家式香煎蠔仔餅更為鬆化香脆，乾巧薄身，入口仲要索索性架，真係食得過！布袋澳紫菜肉鬆浸娃娃菜（$168/例）：大大條娃娃菜好清甜，個人只係略嫌啲肉鬆瘦得滯有啲嚡口，同個紫菜好似有啲唔係咁夾。甜品續個叫，小肥因被醫生忠告要減肥，所以有得影，冇得食。「金東大蜑家私房菜」環境其實好似一間小酒樓咁，樓面矮難免會有啲嘈，服務尚算貼身稱心，只係啲細櫈仔對於肥肥家族黎講就坐得有少少辛苦。食物方面，多款小菜其實好夠鑊氣同水準，不過份量偏少，值唔值成五百幾六百蚊一個人就見仁見智。

錦麗 (銅鑼灣)

週五晚請長輩們去銅鑼灣睇好戲，佢地個個都可享長者優惠真係抵玩！因早前聽過表哥形容世貿間「錦麗」嘅越南河為全港最美味，姨媽們就決定於戲前一試，由姨丈請客。店子門外有個標明自己為「胡志明市最好吃的牛肉粉品牌」嘅廣告牌，大家睇到後都十分期待。餐店六點鐘左右其實都冇乜客，不過點都要有一半人以上到齊先可入座。中央打長有一排半梳化合拼式散座；藍色同黃色嘅櫈子梅花間竹咁擺，襯上鐵枱，個人覺得有少少閃得滯。七口子原本被安排入座一張六人圓枱，幸好契妹轉數夠快，眼見餐室未有耐滿座，就向姐姐仔提出可以暫時分開兩張六人枱坐住先，到多客嘅時候就俾返張枱佢地，姐姐仔向經理請示過後亦答允要求。餐桌上擺有自助餐具及調味料。另貼有食pho之正宗越南風味食法。熱水全為自助式，不過啲紙杯仔就似乎太細隻啦，而且仲好唔環保添。四周嘅架上都見到一杯杯生菜，原來係落單後每人都有一杯。彩圖餐牌底面兩頁，精選項目都係越南粉、小食及飲品，簡單易明。凍越南滴漏咖啡（$30）：越南咖啡當真喺顧客面前慢慢滴漏，証明真材實料。分開坐嘅姨媽同XO仔都異口同聲話杯凍啡太甜，咖啡味唔夠香濃。長輩個個都揀食有齊生牛肉、熟牛肉及牛丸嘅錦麗綜合粉（$66）。錦麗生牛肉粉（$63）：可能小肥頭腦最簡單，連點食物都要最原始嘅淨生牛肉粉。生牛肉上枱時呈半生熟，肉質都好軟腍，不過碗麵出事在個湯底唔夠熱，而且味道實在太甜，飲完杯超甜嘅凍咖啡後都仲覺得佢好甜。最攞膽就係河粉麵團居然仲係成個波咁！估計啲粉一早就煮熟哂，只係廚房一收到單後即淋上熱湯及配料，到食客將啲粉散開後，入口已經唔再新鮮滾熱辣；即使麵條本身幾柔滑都好，唔夠熱已令碗河粉大打折扣。小弟並非越南人，講真亦唔清楚何謂正宗越南口味，只可以話「錦麗」無論係環境、服務、衛生、食物質素及價格都好似一間高級少少嘅茶餐廳。主打生牛肉粉湯底偏甜，而且入口唔夠熱，同自己平時食開嘅中菜真係好唔同；但當諗到越南天氣炎熱，好多越南粉店仲要屬大排檔式冇冷氣喎，咁就不自覺地聯想到正宗越南口味可能真係要甜而不太熱，只係人家嘅正宗唔係自己杯茶而已。

Carbone (中環)

表姐為老公仔慶生，特意由新加坡飛黎香港，於紐約過江龍「Carbone Hong Kong」大宴家人十多位。入門口到埋位一刻，除咗喺餐牌封面之外，四周都唔多覺眼有餐廳個大名，就連接待處都冇，如果唔係對應到訂座記錄，真係有啲驚自己去錯地方。由升降機大堂通往用餐區必先路經面積頗大嘅酒吧房。兩位忙碌中嘅酒保見小肥影相，仲搞笑地擺哂蒲士，有趣得很。西餐廳用上瓷磚地面，配上皮櫈及洋畫，七彩嘅裝潢個人就覺得睇到有啲眼花花。最靚反而係具歐陸式風味，較傳統嘅吊燈。貼牆一邊有一排半卡位合併式散座，一邊有梳化，另一邊則為有柄嘅椅櫈，望落應最為舒適。女士們提出有一點好奇怪，就係堂內大部份椅櫈冇柄兼有窿，而且弧形椅框冇勾位，基本上冇位放手袋或隨手物，連除下件薄褸都不斷滑落地下，設計頗有問題。
細佬慣性地早到，邊等邊研究餐牌。據悉，午市可選二人份量之套餐，三道菜均可選一，價格為$388/位，另收加一服務費。唔想食套餐的話，亦可從兩頁散點餐牌點菜。
由於所有菜式都係設計俾食客分黎食，每個位前面早已放有齊備嘅餐具。主人家非常客氣，又開香檳又開紅酒，XO仔睇過酒牌先知咩價位。生日會飲兩杯，慶祝吓原本係件快樂事，無奈當日發生咗段小插曲。。。因飯局有成十四個人之多，表姐一到步就叫咗兩樽單售$1,528嘅粉紅色香檳，好等大家一同碰杯，祝賀一番。其實食飯中途服務生都有為客人斟添佳釀，點知到食完甜品，埋完單後，排隊去一趟洗手間時，竟然發現餐桌後方個冰桶入面仲有半枝香檳剩，所以就即刻通知家人，叫佢地調查吓會唔會係我地嘅；哈，原來真係喎，咁想問一問，假使細佬未有及時察覺的話，服務生係咪唔會知會一聲呢？！嗰半樽香檳最後下場又會係點呢？！講完故仔就講返啲食物先。主人家點好餸菜後，服務生隨即送上四款小食（由於唔洗自己俾錢，故價錢不詳），當中小肥冇試到芝士方塊。。。亦冇食到碟橄欖，只係留意到兩隻碟仔有不少崩裂痕跡，唔多襯餐牌上所見到高級嘅價位囉！外表金黃嘅蒜蓉包顏色就靚啦，可惜溫度屬和暖，咬落脆得黎有啲硬，且包身質感過韌，不吃也吧。薄薄嘅意大利腸腸salami砌到成朵花咁鮮美，入口即覺香潤惹味，唔怪得知要配返隻完整無缺嘅白碟啦，身價明顯比其他小食高。Caesar alla ZZ – Baby Romaine, House Croutons, Ricotta Salata：午市套餐第一道菜可由三款頭盤或三款意大利粉揀。頭盤凱撒沙律有專人即場撈製。

沙律中嘅BB羅馬生菜色澤鮮麗，食落爽脆香甜又夠水份。
菜式敗筆在於啲大大粒嘅croutons偏腍且唔得香口。Spicy Rigatoni Vodka - Tomato, Onion, Calabrian Chili：整頓壽宴最正就係兩碟橙綠意大利粉，不同形狀嘅意粉麵條均煙韌彈牙，醬汁濕潤得黎完全唔杰。第一款橙色代表用上蕃茄、洋蔥、辣椒等調味，味道香濃中帶點辣勁，當真醒神又醒胃！唯一唔得大體用上隻崩邊碟同偏少嘅份量。
Gemelli Salsicce – Italian Sausage, Broccoli, Pecorino：第二味綠色嘅通心粉食落好重西蘭花味，意外地卻毫不苦澀，平時唔多鍾意食西蘭花嘅長輩們個個都話個菜味十分討好，極易入口，只係如果師傅可以落多少少意腸，份量可以加多一倍就更加理想。
Ribeye Diana – Meats by Linz, Pancetta, Cacciatore Sauce：主菜清一色要哂肉眼扒，每份均已預先切開成五片，汁液另上。
如相所示，「medium rare」嘅牛扒右邊還好見到紅潤嘅部份，不過左邊好明確過熟得很！肉眼扒唔得鬆軟，肉質偏韌難咬，請恕小弟直言，真係唔食得過！Potatoes Sergio（$128）：除咗叫咗十人份量嘅午市套餐之外，表姐仲叫咗三款配菜，全為$128/客。第一款薯仔冇試到，只係影咗幅相作記錄。Funghi Trifolati – Mushrooms, Garlic, Herbs（$128）：第二款雜菌潤而不膩，芳香惹味。
Broccoli AOP – Garlic, Olive Oil, Peperoncino（$128）：第三款西蘭花油潤有光澤，入口清香爽甜，比主菜牛扒美味得多。
最後甜品一環其實只有三款可選擇，分別為甘筍蛋糕、朱古力蛋糕、檸檬芝士蛋糕。只係當經理哥哥推出甜品車時，全枱人都爭住話想食有手指餅圍住嘅tiramisu，點知佢答話車上只為陳列品，午餐唔包提拉米蘇。Blackout Cake：層次分明嘅朱古力蛋糕口感同味道都非常豐富。頂面嘅朱古力濃郁柔滑，邊邊位嘅朱古力粉粒增添脆口，兩層海綿蛋糕又夠鬆軟，隔住兩層乳酪忌廉夾心相當柔潤輕型。由紐約開黎香港嘅「Carbone Hong Kong」論環境同氣氛都還可以，但係啲冇柄椅櫈就有啲蝦女士們及肥肥家族坐。餐店服務生之態度及專業程度十分參差，另家人最不爽當然係嗰枝差啲冇飲到嘅四位數字粉紅色香檳啦！得悉午餐要成萬二蚊時，XO仔不禁質疑餐飯貴得有否道理！平均近千元嘅午餐講真只有兩款意大利粉味道最佳，以每兩人一碟黎計就絕對唔夠食；成餐飯最劣都可以話係主菜塊又嚡又韌嘅牛扒；最接受唔到就係崩角裂邊嘅餐具，以及餐廳竟然唔斟哂啲酒，亦冇知會聲埋緊單位主人家有酒剩，莫非十四人都生得似水魚？！「Carbone」可能喺美國經營得好出色，但個人覺得店子香港間分店實在貴得無理，不甚明白如何可於香港企穩陣腳。

十里洋場 (銅鑼灣)

平日總是忙著工作嘅學弟襯新年有假期，專登抽空相約食飯兼派利是，地點由佢揀咗間方便佢泊車嘅「十里洋場」。上海菜館門面開揚，接待處擺出桃花及水仙之外，木造屏風亦掛上不少應節小燈籠，新潮中不失中國色彩。XO仔比店子開門時間早到，服務生明顯仍在忙碌準備中，不過未到六點已可埋位坐，咁就要讚吓。步入用餐大堂必先經過最闊落嘅皮櫈卡位。餐廳面積寬廣。兩邊擺出半梳化合併式散座。中央則排出兩行圓枱。小師弟訂位時早已講明會帶同兩位小朋友，中菜廳就安排好大人版及小童版嘅齊備餐具，另加鮮花點綴，感覺衛生，且十分周到。散點餐牌及飲品餐牌均屬厚本，主打菜式都附有彩色相片對應，首頁及尾頁仲印有卡通插圖，都幾得意。多頁餐牌可於官方網站搵到，小肥唯一想提嘅就係餐牌最後一頁有明確地列出茗茶、小食、額外切餅等收費詳情。餐前小食（$20/碟）：三款小食中小朋友最愛彩色代表嘅彩絲豆干，三個大人當然係俾佢一個人獨享啦！其餘因為XO仔怕辣就冇試，不過哥哥話都幾惹味醒胃。富貴糟肚尖（$108）：因為三口子都係第一次黎幫襯，為安全起見都係揀咗啲餐牌上有記認而又有彩圖嘅招牌菜式。透明碗內嘅所謂豬肚尖不單厚硬，肚身極為乾嚡，即使係用酒醃過也難掩其豬餲味，細佬好少會喺食評用上「難食」二字，今次真係唔用唔得！記得兒時於「崩牙成私房菜」食過嘅豬肚尖如何爽脆巧薄惹味，食後更有幸聽名廚講解其出品之豬肚尖每隻豬只可取出最尖頂之部位，價格高全因每碟炒出嘅足料豬肚尖要用上幾十隻豬取出，以確保菜式美味，合格標準極其震撼。$108作為前菜一啲都唔平，質素仲要咁低，個人覺得即使「十里洋場」將菜名改為「富貴糟豬肚」都唔夠班做招牌菜囉，最簡單嘅解決方法就係喺餐牌刪除咗佢。黑松露珍珠燻溏心蛋（$68/兩隻）：連玻璃蓋上嘅燻蛋由傳菜生即場開蓋，造出煙燻效果，席上大大小小都睇得咁興奮！燻蛋色彩鮮美吸睛，溏心蛋黃柔滑流心，外層蛋白又夠厚彈，無奈師傅喺頂面加咗同樣擁有濃郁氣味嘅黑松露，蛋蛋同時發出嘅煙燻味及黑松露香即產生沖突，出哂事。。。黑松露脆皮上素鵝（$108）：素鵝皮薄餡足，除咗真如其名般脆皮鬆巧之外，咬落口中慢慢滲出嘅黑松露味非常芳香清新。之前道燻蛋撞黑松露就有畫蛇添足之嫌，此味素鵝混入黑松露則有畫龍點睛之效，証明食材組合配搭真係好考廚功架！清炒江蘇野生河蝦仁（$252）：細細隻嘅河蝦仁白滑有光澤，炒得又夠爽脆鮮美，加上明顯每一隻蝦仁都去哂腸，一絲黑條都冇，衛生討好。清炒萵筍絲（$98）：萵筍絲翠綠爽潤，唯一調味不足，因淡而無味而變得略為失色。龍鬚桂魚（$372）：桂魚連炸咗嘅魚頭魚尾上，有頭有尾意頭好，外觀亦甚有睇頭，可惜嘅係桂魚只限睇得，唔係咁打得。白雪雪嘅桂魚絲偏咗少少嚡，唔夠幼嫩，最慘就係魚肉又咸又腥，狂點醋食都難以補救，新年想有「腥」氣都唔洗咁重口味掛。。。金牌小籠包（$75/五件）：熱辣辣嘅小籠包皮層巧薄輕柔，餡心軟嫩甜滑，湯汁量足清香，個人十分欣賞。脆煎灌湯小籠包（$68/四件）：所謂脆煎灌湯小籠包即煎版小籠包。煎小籠包以辣手嘅鐵板呈上，熱力相當強勁，真係要小心燙傷舌尖！包品除咗皮薄餡嫩，其底皮當真好似薯片咁脆卜卜，！金釵銀絲（大煮乾絲；$142）：雪白嘅銀絲乾絲幼身得黎仍不失煙韌彈性，最正就係碟內金黃濃甜嘅雞湯底，有陣時傳統菜唔變先可顯出簡單美。嫩雞煨麵（$58）：睇相都可能睇得出，嫩雞煨麵個湯底好稀，麵條更加係浸到腍哂，雞肉一啲都唔嫩滑，淡到好似冇落過鹽咁，超級失敗！上海粗炒（$128）：上海粗炒就剛巧成為對比，麵條雖則夠彈，但卻過份油膩，味道同時過甜及過咸，唔係細佬杯茶囉！雪綿豆沙香蕉（$80/四件）：甜品個樣就幾得嘅，但就只有外皮鬆綿，少許甜意都冇，唔講絕對食唔出入面有豆沙香蕉作餡，小妹妹居然以為自己食緊冇味麵包，問可唔可以加花生醬食，果真童言無忌夠率直。原桶黑豆腐花（$78）：黑豆腐花約十分鐘就起到，木桶屬細桶，可裝出四個半碗。另配金橙色嘅糖粉，供貴客自行調味。黑豆腐花質感軟潤滑溜，清香可口。「十里洋場」環境時尚，闊落舒適，格調高尚，服務亦細心周全，反而食物質素就有所參差。其實確認訂座及入座時，接待生已重複提醒五人要八點前離座，但當餸菜一窩蜂咁一次過上哂就有少少糟蹋之嫌囉！餐廳為菜式所訂下高企嘅價位，某程度上應該係要應對返利園昂貴嘅粗金，不過個人覺得最唔抵就係食咗啲弄巧反拙燻蛋、勁腥嘅「貴」（桂）魚、肥哂佬嘅豬肚尖同豆沙香蕉甜品。由於XO仔對廚房精心炮製出嘅兩款小籠包、素鵝、蝦仁等都十分滿意，綜合各方面嘅評分最終就決定俾個「OK」佢，希望鼓勵餐店可作出調整。