翡翠拉麵小籠包 (杏花邨)

忽然想食上海野, 結果入了這間唔多願去的集團式店子。

雞絲粉皮是這次進食的食品中最得我心的,
雖然係細細碟, 但係雞絲粉皮青瓜麻醬的比例剛剛好,
唔會太多麻醬而覺得膩, 粉皮沾上一層薄薄的麻香,
實在係最吸引的.

小籠包不過不失, 只係唔多夠熱,
我已經不加醋吃, 肉只是微暖, 招牌菜咁樣貨式真係倒米.

窩巴配上錦鹵汁, 真係好味, 可惜的係個窩巴只得六片,
但係碗汁就多得很, 看似用來作湯差不多,
要是有飯用來做佐汁相信一定很好味.

窩貼脆脆的外皮不太肥膩, 可惜的係個皮實在太厚.

上海粗炒唔太油膩, 而且加了頗多的椰菜,
但係味道沒甚麼特別, 想不到理由要再吃.

桃苑 (香港仔)

朝早八點去幫襯, 本以為出品不會差得去邊,
七元一碟的炸兩腸粉皮很厚, 但係都唔滑口, 包住的油炸鬼毫不脆口.
十九元一碗的皮蛋瘦肉粥還以為甚麼高質素要即滾,
點知用的只係雪藏超鹹瘦肉絲, 即係一般粥店就咁用滾粥灼熱那款,
粥明顯的用粉溝到很棉, 而唔係用米煮到靚那款.

屋村貨咁樣價錢咁低質素, 怪不得早市店內空空如也.

興泉粥麵 (西灣河)

西灣河無檔粥好食, 我情願自己煲或者誇區吃也很少去幫襯。

呢間粥舖五年前幫襯過一次, 當時粥都可接受, 但係環境真的很差,
貨物亂堆還要不潔的昆蟲四處爬。

五年後再經過, 因為記得佢裝修過, 就俾次機會啦。

叫了一個艇仔粥($11), 老女士很快就送上來, 而那個炸兩($6)就是
門外的女士即製。炸兩送上檯, 因為即製關係非常熱的,
粉漿較厚, 味道不錯。

粥稍為待涼了, 入口第一感覺是怎麼這樣鹹的?
真係未試過食粥食咁鹹, 就算佢真係粒粒米花煲得怎靚,
超鹹已經令我受不住。

進食期間, 有人入去買腸粉, 而腸粉可能一早弄好入袋,
客人拿上手已怨凍的, 可惜錢已付, 老女士亦當聽不到。

卓記粥店 (西環)

闊別西環十多年, 更闊別這店的蘿蔔糕, 早前見到有人寫呢間店的食評,
就特意走一趟去回味一下。

十多年前, 還是街邊檔的時候, 間中會幫襯這點, 有時行過亦會埋到賣
蘿蔔糕的煎檔買一件來吃, 加少許辣醬, 再加上糕內的師傅, 滋味無窮。

十多年後, 蘿蔔糕細件了很多, 以前的大過呢件兩倍, 不過價錢就好似相約,
不過都聽到煎蘿蔔糕的姐姐說, 咩野都貴, 所以有些野都加價。
說回件蘿蔔糕, 蘿蔔味唔太重, 但係夠香口, 入口脆脆的確吸引,
只係$4/件, 真的想encore, 但係少吃多滋味, 都係下次再幫襯。

叫了艇仔粥 ($10), 材料一般, 那些尤魚好似好硬同無味, 個粥就似一些用粉開水
一樣, 無粥的棉棉身的感覺。

炸兩剛由$5加到$6, 腸粉皮很厚, 但油炸鬼唔脆口, 不過都可接受。
同檯有人叫一底炸兩, 佢同友人講話係成條油炸鬼長度咁上,
即係約兩碟那麼多, 大份些同埋唔係整定的,
但係佢落order唔夠廿秒就上到檯, 我就死都唔信即制囉。

店子細細, 如果能在粥品上做番好些, 賣貴一點都會有人幫襯的。

麥記士多 (石硤尾)

成日聽人話咖喱尤魚鬚點好食, 結果老遠都要逛來試下.

一大盤尤魚鬚, 隨你要多少, 雖然話五毫一條, 我話要$5,
老伯都夾了唔只十條, 不過每條都比過往影過相的幼身,
可能成本貴阿伯唔加價所致啦.

尤魚鬚味道我個人覺得只係一般, 可能係那些汁唔夠熱,
同埋實在太多, 如果熱的還可以, 但是凍了的汁真的麻麻.

老伯一路夾尤魚鬚俾我, 一路同我閒聊,
佢話, 尤魚來貨又貴, 連麻油$16一枝加到去$28,
佢賣尤魚還是五毫一條無加價都俾客彈,
其實通脹對個個都唔好受.