懷歐敘 (金鐘)

今日去食lunch,好好好好味,仲食到好飽!真係好豐富呀!十分十分推介呢!
我揀左三文魚做主菜,三大件都唔腥又唔漏,個汁酸酸地,十分醒胃,已經令人滿意!
但係最最正係沙律吧同埋甜品!
沙律吧實在係有太多野食喇!可惜我唔食得蠔,但係食得既同事都話好!煙三文魚呀,蛋沙律醬薯仔呀,芝麻醬豆腐呀,各類菇菌呀,粟米呀,三文魚蓉他他汁,甚至冷麵,應有盡有,仲要樣樣都咁好味喎!浄係食頭盤都夠啦!仲有菠菜湯添呀!
包籃裡面既脆餅又係令人食唔停口,個好似吞拿魚既醬就最好味,查完一件又一件,食呢個都食到半飽!
甜品超正!我從來未試過一次過食六款甜品,係拼盤黎架!有tiramisu, panna cotta, 軟心朱古力蛋糕(好香朱古力味呀,個心真係軟架,蛋糕又唔會太硬), 開心果味法式白餅(同事個個話呢個甜同漏,但我又唔覺喎,外脆內軟,比君悅甜品buffet食果次好味幾倍有多), 意大利雪糕蛋糕(我最鍾意呢個,係三角形,有三式雪糕,食多幾件我都得呀!), 仲有一個有少少酒既橙, 全部超級好味!同事們無一個食晒,係我呢個超級甜品迷全部清晒,但係真係飽死,而且肥死呢!但係超滿足囉!
咖啡附送既Petite four又係唔可以唔食,千期咪錯過!
服務好好呀,成日有人問我地岩啱食,唔岩又會換,又會同客人傾計,好有禮貌,好好呀!

Cova Ristorante & Caffe (金鐘)

買左個朱古力芝士蛋糕賀同事生日,十分美味呀!成個蛋糕都唔算太甜,但係好香朱古力味,雖然重但係質感唔會太過heavy喎!面頭有一浸有厚度的芝士,好似cream cheese,但芝士味唔太勁,反而好滑,最面就有好多白朱古力碎,我地仲食到脆脆地既野,好似冰,但係唔知係咩呢?口感好好,無newyork cheesecake咁硬實,又唔係mousse咁軟,介乎兩者之間,味道簡直係令人食完再想食多好多好多次呀!推介!

Cova Ristorante & Caffe (金鐘)

部門同事為我同另一位同事慶祝生日,買左COVA最新推出既香橙朱古力蛋糕,令人十分驚喜!
蛋糕好好味,獲得一致好評!
雖然外賣係一個普通啡色損蛋糕,但係原來好有內餡,底部係一朱古力蛋糕,唔係十分鬆軟,但係幾有口感,有朱古力味又太甜,蛋糕上係一層脆米,呢層十分十分好味,食落感覺似金莎朱古力外層,跟住上面果層又係好吸引,係朱古大mousse夾住一層橙味mousse,橙味好香呀,朱古力又係唔會太甜果隻,而且非常幼滑,總之成個配搭都好好,而家有好多種唔同層次唔同口感,好似食一個蛋糕可以食到好多野咁,真係好好味呢!如果唔係怕肥,真係想食多件呀!
面頭既士多啤梨都好大粒,亦都好好味架!係一片片既白朱古力片甜得滯囉!

The Harvest Menu (中環)

如果唔係朋友帶我黎,我真係唔識黎呀!
估唔到咁好既地方,竟然係openrice無食評呀!
餐廳係一樓,要搭”車立”上去,個老闆係西人,侍應都係外國人,個menu又係只有英文,所以全程講英文,不過無論係個老闆定係侍應,都好nice,服務可以話係一流!例一,我唔清楚個menu的食物辣唔辣,有什麼材料等,老闆係我落order問佢時細心解釋;例二,個waitress係我地飲緊餐飲時,拿住一籃cookies逐桌問我地要唔要,要就即時夾俾客人。
menu方面,可能有人會覺得選擇少,因為午飯時段只有set,但係日日轉款,每日有三款,今日就有beef burger & ships ($68), chicken laksa ($68), salmon paste pasta ($78),包埋自助沙律,自助湯,餐飲。鍾意light的既,可以揀sandwich ($48),三文治加湯就$58, daily sandwich set或者salad set就$68,係中環黎講,價錢十分划算(有咁多野食喎,沙律仲要自助形式)!
我同朋友都係點salmon paste pasta。落完order人即刻出去自助salad bar,以為平野唔會好得去邊,點知錯晒,係比起好多地方都好呀!選擇多又健康,有車厘茄,薯仔沙律,粟米紅腰豆沙律,青瓜吞拿魚沙律(竟然有唔少吞拿魚,仲要唔腥),生菜,同埋凍肉如火腿,腸仔等。啺有兩款,一款係紅色西湯什菜湯,另一款係中湯,我地飲西湯,唔油,足料,感覺清新,好味!仲有包同曲奇都係任取添喎!不過曲奇質感有少少似蛋糕同餅之間,唔算好甜,似home made,一定要試。
salmon paste pasta係意粉,上面有件煎得真係好香好香既三文魚,平日食熟三文魚都好怕腥,今次竟然好味又唔腥,仲食到少少脆脆地(邊部分),好得意呢!不過,我見到個意粉,有少少失望,因為幾多油,我懷疑佢炒過,所以真係好好味,但係我諗會比較肥咯…但係食落,我覺得佢應該係用橄欖油。
見到隔離桌既burger,個包都幾大喎,真係無欺場。
差的唔記得提…環境好正!唔好似為好靚好華麗,其實係好簡單,好有家庭feel至真!就係好似係外國家庭果種感覺,舒服,寫意,唔嘈,總之一入去我就喜歡,係中環,出面好多人好嘈,熙來攘往咁,有呢個地方,真係好難得!
最後埋單,驚覺唔使加一!
服務咁好,食物咁美味,環境咁舒適,價錢又咁相宜,我一定會再次來訪!

茶園 (灣仔)

想黎Tiffin食甜品自助餐好耐,終於有機會一試。
無論環境,氣氛,服務,同埋食物水準,都係一流,我同朋友們都好滿意!
主角當然係多款甜品,比我想像中多款式,而且特別,當中包括唔同口味雪糕同雪糕蛋糕、唔同口味芝士蛋糕、拿破崙、梳乎里、法式蛋白杏仁餅、豆腐花、楊枝甘露、乳酪、栗子蛋糕、紅豆綠茶蛋糕、香橙君度酒蛋糕、威化卷、雪葩、芭芙、啫喱、tiramisu、生果等等，仲有一粒粒既朱古力(有開心果味、茉莉花茶味、原粒果仁朱古力)。
食左十幾個雪糕球,口味包括綠茶、葡萄、椰子、櫻桃乳酪、酒香蜜餞、芒果芝士、香橙;香橙最特別,唔係自己抣,而係用個橙(有橙肉,但雪到硬晒)載住;紅豆綠茶蛋糕值得一吃再吃,係我本人既推介,綠茶味蛋糕已經正,仲加埋紅豆味忌廉,同埋粒粒真正紅豆,紅豆份量係多到啖啖都食到,真係好好食;士多啤梨拿破崙更加係全檯都推介既甜品,個酥皮做得又香又脆又鬆化,吉士又唔會過多喎甜;仲有食親甜品buffet都有既tiramisu,呢度都做得好有水準;反而梳乎里差少少,香橙梳乎里食唔到橙味,草莓梳乎里亦食唔到草莓味,只係得個甜字;至於唔同口味既芝士蛋糕,我最欣賞香蕉檸檬芝士餅(仲有朱古力芝士餅,草莓芝士餅等),口味比較特別,食到芝士香又食到香蕉香,但係味道又唔會太濃;另一款一試再試既甜品係桑莓芒果雪糕蛋糕(比另一款朱古力雪糕蛋糕好味好多),桑莓雪果又有芒果雪果,外面用朱古力皮包住,真係令人好想食多好多好多次;法式蛋白杏仁餅雖然有草莓、開心果、咖啡三種味道,但試過晒之後,只有草莓最得我歡心;威化卷內藏雪糕,又係超好味,又凍又脆,口感一流,但係都幾甜架。
如果可以,我都想再黎食呀!(不過再咁食法,肯定肥死...但係,對住咁好味既甜品,試問又點忍口呢?)