IL Cibo Italian Restaurant (大角咀)

金船長接任人，鬼佬睇場的IL CIBO
鋪面，係8成5同金船長一樣
檯凳無變，鋪左紙檯布係感覺好D
但冇cover到檯角，搞到揩到檯角其實仲有d痴立立

餐牌方面，冇圖可以話賭博一樣
雖然有圖都可能伏
不過價錢尚算可接受
甚至比金船長好似仲抵dd?

侍應用英文所以我地都冇嘗試用廣東話落單
叫左一個set煙三文魚沙律，西冷扒
散叫凍盤，意式餛飩，海鮮pizza
三個人share食

餐包係似蛋糕咁，texture麻麻地，有少少soggy
再點埋醋同橄欖油，整體不太好食
沙律同冷盤都好快上菜，約5-8分鐘就有得食
沙律普通貨色啦，冷盤雖然有輕微對唔住價錢(ard100蚊)
但整體黎講除左隻碟唔係好夠風味，都叫可接受
主菜打頭陣既係餛飩，賣相我覺得幾好
都算新鮮挺身唔會太一pat野，餡料係似菠菜碎+芝士粉+薯蓉咁，唔太記得點寫，味道可以但偏鹹，但完全缺乏松露味(揀左松露菇汁)
跟住上既係pizza，穩陣冇伏，薄批，脆邊，芝士味重，海鮮料就尚可，量唔多但冇雪味，收貨。
牛扒最遲上，幾驚佢overdone但好彩係冇既，叫左mid-rare黎既都係mid-rare而且扒面煎得相當靚，條邊既油同筋膜有煎過但可以再煎多少少。略為失望既係佢冇落粗鹽煎塊扒，亦好少好少黑椒味，可能預我地淋汁食。雖然英國食Jamie's Italian都係咁(係咪意式牛扒特色？) ，但問佢佢可以俾手磨已鹽胡椒你。呢間就只有一支手磨胡椒，佢磨完就會拎走，而鹽只有下價餐桌鹽。碟係冇預熱再放扒，不過冷氣唔算太凍而且200蚊套餐價，可以接受冇做呢一點。肉質未到細嫩，係有D缺乏油脂既，煎果陣都冇落牛油所以食落都係比較廉價少少。冇記錯佢係澳洲牛黎，唔太識個分級，但對換返美國牛個Grade食落都有US Choice級數既，未算最曳。

食完上甜品，其實原本只有一個餐，理應得一個甜品(蛋糕+雪糕) 但佢俾左3個我地。可能見我地叫其他野既量同金額都交到差掛。蛋糕基本上同餐前麵包好似，係甜d多左d提子乾咁。雪糕就幾好，有少少糯糯地唔係維記果d貨色。然後再上一個Panna Cotta係呢度訂座兩位就會送一份。奶凍做得幾好，唔太意碎但又唔會好結實，偏向有黏性。莓醬係熱既，所以會同奶凍有少少融和左，幾好唔錯。

總結
頂讓返黎所以傢俱同牆同水吧都似金船長，其實無所謂不過如果佢抹好少少，唔會黏黏地會舒服d吧。值得讚既係燈光改善左好多，食物影出黎唔會好似恐怖餐廳咁。
服務方面都幾好，因為食完頭盤收一次餐具，食完主菜又收一次，街坊地段，中價，做到標準西餐服務，算係咁啦。食完都有循例問下D野O唔OK，咁我都循例落左佢Ravioli太鹹，可惜我地自己都唔記得叫左松露味...所以完全忘記同返佢講。
賣相方面，除左冷盤Hea底左少少，其他都算唔錯啦，值得讚既係佢每樣野上菜都抹到隻碟冇多餘且影響觀感既醬汁同污垢，雖然見到少少抹布痕但算係有花心思。
味道方面其實可以接受，金船長係食過唔會想返兜，但呢間雖然同檯人士都覺得唔特別想再食，但我自己就覺得可以再去的。

Fatt's Place (尖沙咀)

食完飯想搵個地方坐低飲杯野, 順便切蛋糕慶生
去到赫德道好多都係好嘈,播緊DISCO歌既BAR
印象中記得有間成地花生殼既係附近, 果然行左陣就搵到
呢間野門面雖然好UP DUP, 仲成地花生殼
但換個角度睇, 都係一種特色黎

入到去, 冷氣都幾涼, 冇卡位冇乜特別位, 四個人就隨便搵個地方坐
見到餐牌都幾SHOCKED
平時星期六日係旺角飲一杯COCKTAIL, 加埋一都要8,90蚊
今次見到佢一杯都係40幾蚊

叫完野飲之後就叫佢幫我地切蛋糕, 餅費承惠50蚊
但佢突然問我個蛋糕FOR邊個, 叫咩名, 我咪照講
本來以為佢有想插個牌仔係個蛋糕度啦
點知過左陣, 老闆娘同幾個伙記一齊唱住生日歌, 擺低個點左蠟燭既蛋糕比我地
講真, 50蚊切餅費, 只係FOR佢地既SERVICE
額外有咁既人情味, 係而家既香港, 真係唔係咁易體會到了

飲野方面, 我覺得都好抵飲,
生啤就一定唔會唔夠味啦
COCKTAIL方面都算幾足料, 仲每杯都有粒CHERRY
唔似得太子旺角有D BAR, 根本飲唔到酒味

埋單先$183, 4杯野飲, 一兜花生
扣左$50餅費, 每人先30幾蚊
我懷疑有冇計錯
總之真係好抵啦!!

韓舍 (旺角)

出到旺角最頭痕就係見到一大堆好同胞
第二大頭痕就係唔知食乜好
事關而家D餐廳間間都差不多
貴之餘冇新意
後來同女朋友搵左輪OPENRICE之後諗住食韓燒
本身想去漢和,因為佢D雞湯都唔錯,但一問之下竟然要$168+1,仲限得個半鐘就算吧啦
之後見到呢間韓舍
打去問話五點有位,$138+1,一至三人都係得個半鐘,但見幾抵咪BOOK黎試下

上到去見到環境都幾唔錯,有酒店格局但偏向平民
店員安排左窗邊卡位比我地, 個卡位足足坐得落六個人! 感覺非常良好

店裡食物分成幾部份 最入面係韓燒食材,
一般豬,牛,雞,魚,墨魚,蔬菜等走唔甩
不過我唔太欣賞肉類,用鬆肉粉用得太勁,搞到燒完之後好似有層蠟咁
最大問題係食落口好大陣鹼味!! 
好在佢雞翼,墨魚,多春魚都冇呢D問題!!

跟住係海鮮,有凍青口同凍蝦
都係煮熟左,尚算安全穩陣

跟住係熟食,
我諗一湯一糖水一飯係例牌走唔甩
當日仲有豬腳薑,炒雜菜,忌廉焗魚,蔬菜炸牛肉之類的

跟住係刺身,
當日有三文魚,吞拿魚,鯛魚,希靈魚,同蟹棒
即叫即切,每人限四件,可選兩款,次數不限

刺身旁邊有沙律吧,之後有刨冰可以自己揀料,跟住有迷你西餅蛋糕三四款,跟住有奶凍,海底椰凍等等甜品,再返返去刺身隔離另一邊有壽司幾款但不吸引,以上就係正門一入黎見到最大既一圈食物台

甜食方面仲有DIY雪條, 佢有部凍機,不過需時4分鐘
有DIY棉花糖機,開著加糖粉自己玩
仲有爆谷機,同朱古力噴泉

飲品方面,呢個價錢係唔包飲品,要另加$20先有任飲,亦唔會主動提供熱茶,要問先有
佢有汽水機,有凍奶茶凍啡,有生啤
至於生啤係咪都係+$20我就唔記得了!

值得一提既係呢間野係用電爐加易潔煎板
唔洗落油自然好少煙
加上佢爐面對上唔夠一尺,已經有一個抽風機
令到整個用餐過程都冇比煙熏過,只係呢點,再加埋兩間處理生食物既安排對比
都已經令我覺得比168+1去漢和食係搵笨到冇人有

總括黎講呢餐我覺得抵! 如果一至四去好似再平D,但唔記得幾錢了!
只希望用餐時間可以長多少少咁就perfect!

順帶一提,排隊拎刺身果陣遇到個細路真係好冇家教,佢呀媽排係我前面
佢就一野飛跑埋黎逼入我前面,仲要係肥仔來的!
我不屑地笑左佢一下,仲鄙視眼神望住佢,佢呀媽似乎知咩事
冇教仔不特止仲兇狠地睥住我, 講明先,呢對母子係操流利香港口音廣東話
我既感想係,好彩呢度只係平民餐廳唔係咩高級酒店,
個肥仔都牛高馬大,冇小五都有小四,咁簡單排隊秩序都唔識守?
個阿媽更加係,帶個仔出黎食飯,唔教好佢走出黎失禮人,仲要睥我?真係不知所謂

另外一件事就係有一班同我地同時入座既人,大概五個左右啦
拎到成台都係肉類,
直到我埋單果陣,爐度有好多燒緊,台上仲有幾碟堆滿哂
我真係希望佢地最後有食哂D野唔好浪費,需知今時今日香港地廚餘量係多得驚人!
熱愛放題,自助餐既咁多人包括我自己都算係原兇之一,
因為好多餐廳酒店都會將客人食剩既食物倒左去
但我希望大家可以珍惜食物,唔好眼闊肚窄,起碼由自己做起!!

1000 円放題鐵板燒肉店 (佐敦)

好食的店當然要再度幫襯
話說中午同女朋友唔知去邊度食好
就打去1000円問下下晝有冇放題
佢話有而且只係$58+1任燒一小時
反正早餐只食左少少,中午未食,兩點去食任燒真係最佳選擇

去到即刻有位,又再見到之前提到既"部長"
竟然咁岩又安排上次個卡位我坐
其實成個場都只得三台客左右

坐低後二話不說當然去拎野食,食物方面其實都少左一部份
依稀記得冇魷魚鬚、墨魚仔、全蝦、蝦仁、去骨雞翼、瀨尿蝦、豬頸肉etc
最正既一口牛柳粒就仲係度，仲多左蛋餅燒完第一ROUND都係決定左+15蚊任飲
雖然最後兩人加埋只飲左六罐,即係平均五蚊罐並無賺,但我覺得都冇蝕啦
最後埋單都係一人$80左右 依然覺得好抵呀
最緊要係食得開心,唔洗同人逼,又唔洗受氣

1000 円放題鐵板燒肉店 (佐敦)

既然呢間餐廳係我提OPENRICE UPDATE，又未有人寫第一篇食評
就等我寫第一篇啦

話說，星期日同朋友由旺角一路行，經過由麻地都冇咩好食
終於行到佐敦，見到1000円同2000円招牌，就諗住上去問下價錢同有冇位啦
一問之下先知道原來原本既2000円(佐敦分店)已經冇左，裝修後重開成呢間1000円
門口果位應該係經理或部門級既先生(下稱部長)好好人，主動邀請我地入去參觀一下有咩食先
入到去見到地方唔算大，但全新裝修，而且坐位都幾鬆動同舒適
食物一字排開，放既地方唔算大，但款式可能都接近50款了
每款食物放出黎既量唔多，但時不時有人REFILL，呢點幾值得欣賞
部長話加埋一就$136一位，限食兩個鐘，另外任飲飲品就$15一位，任食甜品就再$15一位
本身都覺得任飲另加唔太抵，但睇一睇飲品櫃，除左百事、七喜等汽水外，仲有道地無糖綠茶同烏龍等
甜品就唔考慮喇，我地一行三人就決定叫任燒+任飲

食物方面有牛肉、肥牛卷、牛利、牛柳粒、肥牛串
雞柳、有骨雞翼、無骨雞翼、雞皮、雞心、雞腎、雞軟骨
豬柳、豬頸肉、豬肉卷(即係肥牛卷既豬肉版)
秋刀魚、魚柳、多春魚、鯖魚
原隻蝦、蝦仁、魷魚鬚、墨魚仔
包心丸、腸仔、雞尾腸、墨魚餅仔(圖中白雪雪上面有舊黑色紫菜果件就係)
錫紙兜有金菇、冬菇、粟米、蜆
菜蔬類有冬菇、青椒、菠蘿
配菜有大蔥、蒜
另外可以自製沙律
調味料有鐵板燒醬、柚子醋、粗醬、黑椒、芥辣沙律醬同芝麻沙律醬
太多了不能盡錄(因為我唔太記得

服務方面我覺得唔錯，部長經常走黎走去幫客人
又有人專責檢查食物剩餘量同補充
我同朋友都跌左幾次筷子佢地都冇黑面(話時話點解D筷子咁易跌
另外就係夠鐘時部長冇即時拎張單埋黎，而係埋黎問左我地想唔想加野先，見我地話唔需要先問幫我地埋左張單先好唔好，食咁多間放題都得一兩間係咁好
有D二百幾蚊既放題 LAST ORDER完過左半個鐘就拎張單埋黎，同佢講有好多野未到佢就即刻話"你地夠鐘喇喎"係都強調好多次佢野食唔黎係佢錯佢先黑面然後去拎D野食黎要求五分鐘內食哂