神輿日本料理 (旺角)

第二次食, 食9點場落單掃QR CODE, 服務供應商係大陸的, 個網勁廢, LOAD入去又失敗左幾次, 落單又JAM死左要登出登入重新落
落ROUND刺身極速送到, 三文魚OK, 吞拿魚OK, 但甜蝦有陣味唔新鮮, 帆立貝霉霉地但都入到口, 最離譜係油甘魚, 得5蚊銀咁大塊, 仲要瘀瘀地咁, 完全唔新鮮
手卷係大大件果種, 不合時宜, 間間有良心放題都係少飯, 不過紫菜係仲脆既
小食飲品呢D都係極速送到
但熟食熱食真係極度驚人般差, 等得耐唔在講, 千呼萬喚出到黎既雞軟骨竟然係又淡又唔熱, 一串五粒得中間三粒叫做係熟, 頭尾兩粒仲生生地, 重燒過先叫正常返少少, 但都係冇味
芝麻雞翼好食過大字頭專用果隻, 隻味冇咁化學, 算係熱食全晚最滿意
墨丸食落係同魚蛋一樣, 唔知佢係黎錯定真係咁既口感
一口牛串又係冇味, 又鞋口, 粒車厘茄仲好食過粒牛...
炸榴槤波中間係凍既, 即場吐返出黎
炸牛奶第一次黎OK, 暖暖地, 第二次黎兩舊都係凍, 又要退回, 重做過先整返熱既黎
真心問一問, 炸野果位師兄你係咪唔想撈? 唔想撈都唔好搵我地黎較非呀
原本都覺得呢間野幾好, 今次之後真係永無下次

蒲仙味 (深水埗)

門面光鮮
圖片只供欺詐
d雲吞實物連圖片一半大都冇
仲衰過灣仔碼頭D小雲吞
煎餃優點係真係熱同脆但勁油
但佢油得黎係得個皮油
入面既餡係完全乾到好似紙皮咁
請自行睇實物圖判斷
我就永不再臨

IL Cibo Italian Restaurant (大角咀)

金船長接任人，鬼佬睇場的IL CIBO
鋪面，係8成5同金船長一樣
檯凳無變，鋪左紙檯布係感覺好D
但冇cover到檯角，搞到揩到檯角其實仲有d痴立立

餐牌方面，冇圖可以話賭博一樣
雖然有圖都可能伏
不過價錢尚算可接受
甚至比金船長好似仲抵dd?

侍應用英文所以我地都冇嘗試用廣東話落單
叫左一個set煙三文魚沙律，西冷扒
散叫凍盤，意式餛飩，海鮮pizza
三個人share食

餐包係似蛋糕咁，texture麻麻地，有少少soggy
再點埋醋同橄欖油，整體不太好食
沙律同冷盤都好快上菜，約5-8分鐘就有得食
沙律普通貨色啦，冷盤雖然有輕微對唔住價錢(ard100蚊)
但整體黎講除左隻碟唔係好夠風味，都叫可接受
主菜打頭陣既係餛飩，賣相我覺得幾好
都算新鮮挺身唔會太一pat野，餡料係似菠菜碎+芝士粉+薯蓉咁，唔太記得點寫，味道可以但偏鹹，但完全缺乏松露味(揀左松露菇汁)
跟住上既係pizza，穩陣冇伏，薄批，脆邊，芝士味重，海鮮料就尚可，量唔多但冇雪味，收貨。
牛扒最遲上，幾驚佢overdone但好彩係冇既，叫左mid-rare黎既都係mid-rare而且扒面煎得相當靚，條邊既油同筋膜有煎過但可以再煎多少少。略為失望既係佢冇落粗鹽煎塊扒，亦好少好少黑椒味，可能預我地淋汁食。雖然英國食Jamie's Italian都係咁(係咪意式牛扒特色？) ，但問佢佢可以俾手磨已鹽胡椒你。呢間就只有一支手磨胡椒，佢磨完就會拎走，而鹽只有下價餐桌鹽。碟係冇預熱再放扒，不過冷氣唔算太凍而且200蚊套餐價，可以接受冇做呢一點。肉質未到細嫩，係有D缺乏油脂既，煎果陣都冇落牛油所以食落都係比較廉價少少。冇記錯佢係澳洲牛黎，唔太識個分級，但對換返美國牛個Grade食落都有US Choice級數既，未算最曳。

食完上甜品，其實原本只有一個餐，理應得一個甜品(蛋糕+雪糕) 但佢俾左3個我地。可能見我地叫其他野既量同金額都交到差掛。蛋糕基本上同餐前麵包好似，係甜d多左d提子乾咁。雪糕就幾好，有少少糯糯地唔係維記果d貨色。然後再上一個Panna Cotta係呢度訂座兩位就會送一份。奶凍做得幾好，唔太意碎但又唔會好結實，偏向有黏性。莓醬係熱既，所以會同奶凍有少少融和左，幾好唔錯。

總結
頂讓返黎所以傢俱同牆同水吧都似金船長，其實無所謂不過如果佢抹好少少，唔會黏黏地會舒服d吧。值得讚既係燈光改善左好多，食物影出黎唔會好似恐怖餐廳咁。
服務方面都幾好，因為食完頭盤收一次餐具，食完主菜又收一次，街坊地段，中價，做到標準西餐服務，算係咁啦。食完都有循例問下D野O唔OK，咁我都循例落左佢Ravioli太鹹，可惜我地自己都唔記得叫左松露味...所以完全忘記同返佢講。
賣相方面，除左冷盤Hea底左少少，其他都算唔錯啦，值得讚既係佢每樣野上菜都抹到隻碟冇多餘且影響觀感既醬汁同污垢，雖然見到少少抹布痕但算係有花心思。
味道方面其實可以接受，金船長係食過唔會想返兜，但呢間雖然同檯人士都覺得唔特別想再食，但我自己就覺得可以再去的。

爭鮮迴轉壽司 (尖沙咀)

我明白, 我真係明白, 尖沙咀係一個旺區, 人流非常多
但係今日我再去食尖沙咀爭鮮, 一行三人, 坐低見到張單
計一計個用餐時間, 竟然得四十分鐘!!!
即使去麵檔食個魚蛋河, 都尚且要廿分鐘啦
更莫講去放題, 最差勁既, 都會畀客人食個半鐘頭
而家我坐低食壽司逐碟計錢, 竟然同我講我只可以食四十分鐘?
見到咁既情況, 我已經立即進入戰鬥狀態
搶先拎左碟劍魚腩(好似係), 呢隻魚腩真係唔係度度有得食
之前係TW爭鮮食過一次後, KLB同MK都食唔到, 算係好彩
其實食物質素方面真係唔洗點講
話好好, 佢又絕對稱唔上
但8.8一件, 絕對對得住食客喇

最滿意既係吞拿魚壽司同劍魚腩壽司
D吞拿魚係幾新鮮, 不過有好多碟都係同希靈魚孖住上
變左我淨係想食吞拿魚, 唔想食希靈魚, 都夾硬食埋
D希靈魚好唔好食真係見仁見智
我自己就接受唔到喇!!

呢間仲有我最最最中意食既油甘魚
不過可能係成本比較貴啦
所以切得勁薄, 師傅刀功真係唔講得笑

我最唔明白係, 點解食個壽司坐已經坐得唔太舒服,
仲要好似食到打仗咁
D侍應係我背後不亂騰黎騰去不在話下,
又要故住右手邊D野食過黎
又要驚拎慢半步左手邊果條友開始伸手過黎拎
再加上佢好似根本出唔切咁
係幾間其他分店食都未試過運輸帶上有咁多空位係冇擺到壽司
我地成班客人係度乾等之餘, 又要形住形住好快夠鐘, 壓力真係無比之大

冇野食之下我只好食左三碟定唔知四碟阿根廷赤海老
啖啖肉好鮮甜, 不過食果陣一定要不斷提醒佢係蝦, 因為實在太似食緊蟲蟲啦

喂大佬, 我真係想食餐飯咋
最離譜既係, 班壽司師傅好似連氣功咁, 成日失驚無神勁大聲係度叫歡迎果D
十萬火急, 加上面前咁有氣勢既叫聲
我真係唔知自己係去左爬龍舟, 抑或打仗
總之食物非常唔錯, 但服務唔太好之餘仲咁樣限時發
原則上我真係唔會再去

豆花妹撈米線 (深水埗)

說是平價的野心
根本只是一個噱頭
的確, 價錢是不貴, 但問題是物沒有所值,
吃完不但不足以充飢, 甚至好像根本沒有任何東西進肚子

姑且不講正宗不正宗
在香港如果要賣正宗也不一定合香港人口味
但試過這間店的撈米線
感覺只有兩個字, 一般

味道而言, 與任何一間米線相比, 頂多只有平排, 並無任何超越,
更別說是新鮮感了, 豆腐花撈米線早已不是什麼新鮮的東西
只是沒有被廣泛報導過擺了
跟新蒲崗一家堂食的豆腐花撈米線相比, 根本天淵之別
而且這家的豆腐花, 根本不嫩滑
再者,差兩三元, 就能輕易在區內找到一家能飽肚,又惹味的堂食米線了
為何要用一個堂食又飽肚又美味的價錢, 去買一碗不飽肚,味道又一般的街頭小食呢?
米線不夠風味, 豆腐花不夠滑, 完全找不到吸引人之處

說到底跟某日本拉麵一樣

根本就是一種羊群效應

去吃的人, 去買的人, 真的懂得品嚐食物的, 又有幾多?

不過是湊湊熱鬧罷了