Ciao Chow - Italian Cafeteria (中環)

用左某食飯apps book幾好 夜晚7點鬆d book 都無問題，一樣book 到，仲有10%off 都可以啦。
去到啦 要用英文溝通，差唔多全部都係非華裔，唯一一個華人都係竹昇仔，不過，佢既服務態度係好好，值得一讚👍🏻👍🏻
因為今次我地係輕食，叫左一個pizza, 所以我講下間餐廳先，地理位置一流，係蘭桂芳黃金地段，飲野又得食飯又得，間野氣氛幾好，又唔會催你鐘，唔錯，但係如果你想搵間靜靜地就唔洗諗，因為都幾嘈，咁要睇下想要d 咩啦～
講返野食，其實都幾貴，叫個最平既pizza, 茄醬加洋蔥仲d 唔知d 咩香草，無啦，盛惠一百一十幾，仲要係細批得6件咁多多，但質素係好ok, 個批香脆，d 醬夠濃，又唔會覺得佢太濕，相當唔錯，果然係出名食pizza, 竹昇經理仲要問我地仲咩唔叫芝士，係咪唔中意食芝士，真係唔知點答佢好🤦🏻‍♂
最後我地都係食左個幾鐘，當食少少野休息下hea 下時間就算～

星巴克咖啡 (觀塘)

返工前買杯green tea latte 提提神, 發現starbucks做緊優惠,
買一杯野飲，就可以加$10換鬆餅一個, 見到有榛子朱古力鬆餅, 梗要買個黎食下~
有鬆餅食, 杯green tea latte就要左Tall Size榛子朱古力鬆餅
面頭佈滿朱古力粒同埋榛子碎
鬆餅濕潤, 甜度適中, 榛子香脆, 朱古力香濃
榛子+朱古力係完美配搭, 加埋green tea latte, 係完美既早餐~

Hugo Le Resto Grill (銅鑼灣)

我見到某飲食apps 訂坐有半價，所以就約埋三五知已去試下依間hugo le resto grill，去到呢間野d 裝修唔錯，最緊要係個女 waiter 幾靚女😍又好招呼😙
不過呢，半價原來得主餐牌先有，飲品呀套餐呀就無，本來想試下佢既沙律吧放題，咁無計食唔到啦。
我地研究完個餐牌，發覺個樣樣價錢都差無幾，所以我地三個人都係叫左美國頂級new york 牛扒，感覺會抵食d 呢！當我地落order果陣，靚女waiter 極力推介個德國脆皮蜜糖燒豬手，見佢半價又係靚女推介，當然要試一試，叫一個三個人分啦～
上菜啦，d 牛扒果真多汁，份量呢又幾大塊既，又有幾個汁比你點，唔要汁又有海鹽，百鬆d 既價錢又有咁既質素邊度搵呢！
最後十分期待既豬手到啦，果然係即製，外脆內軟，不過呢，蜜糖既甜配豬手我就真係唔係好岩食，我覺得麻麻，浪費左個豬手啦...
我地食左3個幾鐘，完全無催我地走，坐幾耐都得，岩哂我地食完野吹下水咁，我地本來諗住食埋佢既甜品，不過得三款揀，半價左又唔係好抵就無試，所以就閃人啦～
埋單每人都係百幾蚊，係銅鑼灣黎講都okay~

伊呂波燒肉 (銅鑼灣)

好多朋友都話伊呂波燒肉好食,但夜晚遂碟計既話略為貴左d
星期六出開銅鑼灣順便試下伊呂波既lunch, 連星期六日都有set lunch, 真係好抵食~
set lunch都有好多choice, $85-180都有叫左個燒肉定食($85) (雞加牛)另外2個餐叫左伊呂波定食($90), 選了牛
兩個SET都跟茶碗蒸,泡菜,芽菜,麵豉湯,白飯及甜品
而伊呂波定食仲包埋3色刺身同埋天婦羅
感覺上伊呂波定食好似比較抵食, 但係燒肉定食肉既份量比較多

如果覺得肉唔夠既話, 可以加20蚊加大
落左單之後,店員會幫你開火預熱個爐先, 食物大概5-10分鐘後就到齊, 好有效率

雞肉係連住雞皮的, 燒既時候將油都燒去, 好香脆
而牛肥瘦適中, 有預先調味, 唔沾醬料都很美咪, 肉味濃
2者相比之下, 牛肉比較特出

除外牛肉外, 白飯亦都唔錯, 粒粒分明, 食完唔夠仲可以REFILL最後甜品係紅豆雪糕, 係奶味比較重既雪糕

伊呂波既裝修好和式, 同場有唔少日本家庭, 感覺好似去左日本咁
見到有一枱日本人離開既時候撞到另一枱日本人, 原來係朋友黎,
相信伊呂波都算係正宗既日式燒肉, 而價錢亦好合理

奇趣餅家 (旺角)

以前放左學, 成日去花園街行, 順便買個燒餅醫下肚
自從花園街火災之後, 好耐都無黎過, 今次特地黎買個紅豆燒餅食咁耐無黎, 奇趣餅家依然係人頭湧湧
可能錯過左出爐時間,紅豆燒餅唔係熱辣辣,
但係餅皮煙韌, 好軟熟, 入面紅豆餡甜度適中, 不過甜, 好食~
燒餅上既芝麻如果再重手D, 一定會更加香口~