227甜棧 (太子)

依家幾乎每次出街食飯都要食甜品先叫完成, 食完容記之後特登行去太子食甜品~ 朋友想食雪糕不過我想食中式甜品, 結果入了這間227試試... 這裡裝修真的很有趣, 非常古代中國味, 顧客是客倌而廁所是茅廁, 幾乎令我點菜想叫小二雖然中國風, 不過都有西式甜品, 滿足朋友的願望, 點了一個有雪糕的綠茶布甸~ 布甸味較淡不過都有綠茶香, 而且夠滑, 連雪糕或紅豆一齊食會更有口感!比較有名好似就係呢個糖不甩三食! 黃豆粉, 甜椰絲, 抺茶粉~ 我點了太多抺茶粉令到糖不甩太苦, 甜椰絲最好味, 甜甜地又香口! 黃豆粉就一般啦, 無咩特別... 不過糖不甩本身較實欠煙韌, 白色綠色味道都無咩分別~
唔知點解呢度叫227甜棧, 又不是在227號, 令我最深刻的反而是中國風味, 而不是食物本身, 看來食物需要再下了功夫~

義香荳腐食品 (九龍城)

同閨蜜係九龍城買完野, 其實應該返屋企晚餐架喇, 不過2個饞嘴又想食咸既小食, 咁岩係美食天堂天九龍城無理由唔食者 剛好行到義香個條街, 又係openrice上見到不少推介, 一於行去食啦!  行到附近見到有條龍以為6點都要等位, 心諗唔係掛, 原來係再前面的一間牛肉舖, D人係排買肥牛打邊爐~ 可惜我家中沒有飯開, 不然我都買D試下~
講返義香, 傳統荳品店的模樣, 磚牆吊扇...  除左豆腐花, 連煎炸食品都非常吸引! 結果2個就要食晚飯的人每人一碗豆腐花, 仲叫了2大碟煎炸小食! (之後就後悔因為真係太飽...)閨蜜叫了紅豆豆腐花, 一加了紅豆(另外仲有綠豆或者涼粉甚至其他糖水)就只有凍豆花, 因為唔係傳統糖水舖無熱糖水, 紅豆份量都不少, 有差不多半碗, 甜甜的~  閨蜜好喜歡豆花的味道, 有豆香得黎又夠滑, 又不會太淡, 係有一種特別的味道...而我就想熱的就咩都無得加喇, 熱豆花味道更濃, 落了黃糖甜甜地好快就比我倒晒入口...XD煎三寶--魚蛋, 豆腐, 韮菜餃, 新鮮即煎非常熱, 同時都好熱氣... 不過又不會煎過火太燶, 所以一層薄薄的脆外層就夠香口! 沾上辣醬更惹味!炸三寶--雲吞, 魚春卷, 豆卜, 炸物較硬再脆一點, 剛炸好真的要小心放入口, 好容易燙親... 春卷的味道口感最好, 不過我就覺得炸物始終避免不了太乾, 又太熱氣, 食完個口都有點痛...
不斷見到有人叫燒賣或者買走, 令我都非常好奇係咪好好味, 但真係太飽, 唯有留待下次再黎!

昭拍耶2 (九龍城)

今日打完聯賽, 成team決定一齊食飯聯絡下感情順便慶祝聖誕啦! 係九龍塘打架taxi落九龍城食泰國菜! 朋友提議食泰金國, 即使我們一行5人9點先到九龍城仍然有不少人在等位... 最後我們轉戰昭拍耶! 店員話新舖先有位, 帶我們穿過後巷直接入新舖~ 新舖真正入口其實係後一條街, 裝修與舊舖南轅北轍, 感覺完全不一樣! 這裡好似港式冰室, 牆身沒有特別粉飾, 掛了數幅黑白相, 枱櫈都是玻璃枱木圓櫈, 懷舊味十足... 說是食泰國菜真的別有一番風味餐牌設計都非常新穎, 加插了不同圖案, 吸引我不斷細看每一味...同行有3個人都叫了椰青, 椰肉厚, 椰水甜, 弄得我都有點後悔無叫椰青.... 不過我叫的椰汁冰味道都很濃, 不錯!生蝦刺身有6隻, 蝦身算是肥大肉厚, 而且爽甜! 醬汁酸中帶辣, 挺開胃!泰國的炒菜真的零舍有味道! 炒得又香又爽, 味道又不會太咸, 送飯真的一流! 唯一敗筆就是份量略少, 5個人真的唔夠分...生菜包又是泰國菜中獨有的一碟! 這裡的肉碎煮得香, 夾生菜味道得以平衡, 不過朋友都話味道偏辣, 未必人人頂得順...冬陰功連爐上, 可以保溫保持辣味, 喜歡它的酸辣沒有被咸味掩蓋, 可能味道會太濃, 小心嗆到...>~<青木瓜沙律都算小辣, 份量不少, 爽爽脆脆口感不錯跟店名一樣的炒飯, 好奇叫了~ 原來有海鮮, 蛋, 雞脾做料, 這個味道一般, 沒有大驚喜...薄餅熱辣辣食就真的不錯喎, 油油地有點咸味, 又煙煙韌韌, 質感OK! 後尾食唔飽還加了一碟!
真的沒想過會坐在如此港式的地方食泰國菜, 而且味道還不俗... 有機會一定再來!

Dandy House (鰂魚涌)

去了一星期旅行, 終於又回歸happy friday lunch! 好似附近的餐廳都食得7788, 但我又唔多想重覆, 今次特意在openrice搵了2搵, 決定黎dandy house試下~  佢的地點不在平時去開個幾條街, 而在工廠大廈內, 不過都不難搵, 剛剛轉上樓梯直行到尾就是!
1225去到, 店員問我們可否1點交枱, 不然就要坐到新舖那邊...  我們想食得舒服一點, 所以坐邊都無咩所謂, 就去了所謂的新舖, 其實是一個長方形空間有3張4人枱... 剛好我們第1枱, 感覺好似包場一樣!大家都是點了lunch set, 餐湯是南瓜湯, 湯比較甜, 沒有很重的南瓜味... 味道一般4個人都點了相同的主菜--海鮮煮墨魚汁麵, 賣相不過不失啦, 海鮮配料都不算少, 不過味道略淡, 可以話只有少許咸味, 而且份量較少, 食完好似都仲係未食飯咁...我點是日精選--柑桔綠茶, 個人覺得比較酸, 失去柑桔潤喉的功用, 麻麻地...  同時都試了一口同事的芒果綠茶, 這個又似乎太甜, 芒果味欠奉...
睇黎dandy house都是一般而已... 都應該無咩機會再黎...

Bread Street Kitchen & Bar (中環)

突襲成功已經一個月, 但真的太忙了, 而Bread Street又值得一篇詳細食評, 拖到現在才有時間補打...
話說十月的一個星期二晚, 要到St. John總部考first aid試, 原本以為無車要行落山, 怎料一落樓就見到12A, 立即跳上車到中環, 而且為了慶祝考試完成就一於食個美飯~   9點幾走在畢打街, gordon ramsay突然飄入腦袋, 廚神的餐廳就在lkf而這個時間應該不用等吧...?!明知在一樓, 以為要搭lift, 怎知原來是步行樓梯上一樓就見到大大個招牌! 店員問了我們多少人及是否有訂座後就帶我們入座~ 雖然是星期二的晚上9時多, 但店內仍有不少客人, 而且亦陸續有新客人進來~ 近門的位置似乎是讓客人可以飲一兩杯, 數張高枱加點燭光~ 餐廳內部亦都不算多, 每枱一個candle, 甚為浪漫, 如果坐近window還可以展望LKF的情況~ 我們坐在餐廳中間的位置, 面對一個小廚房, 大概是製作頭盤小食的...  Bread Street的menu不大, 每個層次有約10款, 價錢亦十分相宜... 只是英文一般的我看這個menu真係不太明白, 大多都是看懂keyword但不明配菜或煮法.... 所以我們點菜的時候問了侍應有可推介, 了解一下才點~首先當然是餐廳奉送的麵包, 類似長法包, 外皮比較硬但內裡軟熟~ 牛油簡單地舖在一塊黑色的磚上, 淡淡的油香又不至於膩, 我們2個剛考完試的餓鬼不消一會就將麵包KO! Sea Bass Carpaccio with Avocado, Horseradish, Ginger
首先到達的是頭盤, 侍應推介這個fresh with a bit sour, 而且我們坐在廚房前都一直見有人order, 應該真的很不錯! 有點像日本刺身, 凍凍但爽口的魚, 特別在柚子汁的酸味, 如果剛好有一小撮牛油果的話, 更會帶甜, 酸酸的味道真的令人很開胃, 不斷食食食! Chicken Caesar Salad, Pancetta, Anchovies, Soft Boiled Egg, Aged Parmesan
跟頭盤一齊的還有caesar salad, 我們怕太夜西餐又多肉而叫的一個菜, 份量中等... 生菜爽口麵包香脆火腿也沒有很咸, 重點是醬汁濃度剛剛好, 少許酸味就將整個沙律的味道帶出, 半生熟的雞蛋更是一流! Traditional Shepherd's Pie with Braised Lamb, Potato Puree, Brioche Garlic Crumbs
唯一的主菜亦是侍應推介之一, 這是比較傳統的英式烹調, 相信是第一次食這樣的羊~  平時不常吃羊但不怕牠的蘇味, 還記得這個長方形焗盤一上枱就有一陣香味, 未拍照都垂涎三尺! 有點像千層麵, 我們用刀切開, 雖然放到碟上已經散了, 但味道仍是一流! 羊肉已經剁成肉醬, 混合薯仔一起焗成批, 口感一粒粒非常有咬口, 有點肉醬的味道但仍食到羊的鮮味, 表面的蒜頭焗到十分香脆, 放入口是一個天衣無縫的組合! 侍應果然沒有推介錯~ Pineapple Carpaccio, Passion Fruit, Coconut Sorbet
甜品是女人的天堂, 縱然半飽仍然點一個來試試! 我們不想吃chocolate, 又不愛banana, 結果都剔除了一半, 再經侍應推介就選了這個波蘿配熱情果~ 沒想過最大的驚喜居然來自甜品! 中間的椰子雪芭真的非常美味!!! 味道絕對新鮮, 濃濃的椰香又有椰汁的清新, 而且入口即溶, 真是極品! 旁邊的波蘿肉亦酸甜爽口, 伴椰香一起進食味道很好~ 如此清香的甜點為這頓晚餐劃上完美的句號Gordon Ramsay雖是地獄的廚神, 卻將我們帶到美食的天堂! 真希望有機會能到他倫敦的餐廳一嘗~

服務真的一流! 每完成1個層次 (i.e. appettizer/main/dessert), 都會替你更換餐具, 令其食物保持原汁原味 侍應態度又友善, 每當我們問recommendation, 都會推介2-3款加而解釋, 令我們第1次體驗就可以品嘗超凡美食!