小連 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2013-04-10
串得起,認識我都知我是這兒常客,我倆每月總有三幾次來這兒開餐﹗ 講緊既當然就係大圍顯田邨既串得起串燒專門店。 打從三年多前誤打誤撞來這兒吃了一餐後,這兒已成為我倆的心水食店﹗ 是兩公婆經營的小店,座位也沒有二十個,故每每星期五六周末都爆場,現在來吃真的要老早訂位﹗ 店內有提供清酒紅酒﹗ 當然我最喜愛的啤酒是不可少了吧﹗ 款式大眾化,貴一點的健力士藍妹有齊,平有平飲的青島、生力及獅威都有得選擇,認真豐儉由人。 價錢由罐裝$7至支裝的$25,我就一向對啤酒無咩要求,最緊要有得飲,咁就當然飲最平既獅威啦。 食物吃了好幾年也沒變,依舊簡約美味,價錢公道合理,最平的串燒$5至烤魚$60也有,選擇多。 食物款式多,調味粉不會下得過多,原汁原味,所有食物也是堅持生燒不是預早燒起加熱,就是這份對食物的情感已值得我倆繼續支持﹗ 亦因為咁,來吃要有心理準備,只有佢兩公婆又要燒又要招呼執檯,要食就要等等了﹗ 比較特別的可試試這兒的燒魚皮餃,外皮烤至金黃色脆卜卜,食落香噴噴很過癮﹗ 最近還有烤台灣腸,試過一次很香口呢﹗ 烤得火喉恰到好處,蘸日式豉油吃很美味,她次次一個人吃一條﹗ 愛吃菜的話可試這兒的炒雜菜或雜菇,夠哂牛油香﹗ 坊間大部份的燒粟米都是先用熱水灼熟才燒慳水慳力,這兒堅持原支街市新鮮粟米去皮去鬚便生燒,出來的燒粟米特別原汁原味,粒粒分明夠哂甜美,牛油香濃,不得不試。 如你對食物有咩要求,在落單時也可提出呢,佢地必樂於接受﹗ 閒時我總會與食家二人世界食串燒傾計﹔ 這習慣亦已傳染俾身邊老友記,每次聚會,便會想起串得起。 這種飲到成檯是啤酒罐的情況是等閒事﹗更誇張也試過呢﹗ 相識多年,都知道現在小店確難維生,食材差不多每月加價,鋪租又加,鋪位細座位不多就算密密做七除八扣也賺不了多少,兩公婆是老實人,只有默默咬落牙關以價廉質優求存﹗ 加油啊﹗期望這兒生意愈來愈好,堅持那份對美味的執著,我倆會一直幫趁的呢﹗ 推介美食: 牛油燒粟米,雞軟骨,燒雞翼,清酒煮花甲
評分: 味道 4 環境 4 服務 5 衛生 5 抵食 5
2013-02-22 我倆嗜辣又愛打邊爐,常問朋友有什麼正宗的麻辣火鍋推介。 數名友人不約而同的介紹深圳的華神火鍋,話佢深圳最正宗,上兩個星期日膽粗粗同食家上去試試﹗ 聽說華神是連鎖店,規模雖不及小肥羊但也有不少分店,今次試的是中航店,落馬洲打的來廿蚊搞掂﹗ 來到當然一試這兒的招牌麻辣火鍋,我倆唔知死字點寫地點了一整個麻辣鍋。 但我建議朋友們,做人節目留一線,點個鴛鴦鍋準沒錯﹗ 這是湯底,好戲在後頭﹗ 店員從廚房拿了一個麻辣湯包在你面前打開並倒入鍋中﹗ 湯底即時變成血海,好可怕﹗這就是華神牛油湯底了﹗ 要說這鍋用的是正宗麻辣鍋必選的牛油作湯底,吃時會帶著一份牛羶香﹗ 醬料是自助的,你想到的醬都會有。 我倆打邊爐從不亂溝,次次都是豉油、生蒜及蔥粒,能吊味之餘亦能提鮮。 但其實在這兒吃麻辣鍋,唔洗蘸什麼醬料你也可感受到那威力。 先來一碟拍青瓜作小吃,夠入味又脆口﹗ 食家最愛吃鳳爪,還是第一次見鳳爪作生料﹗ 想說這兒有個好處,就是絕大部份食材生料都可以點半份,岩哂我地呢尐二人組合,可以多吃幾款。 生蝦新鮮,隻隻仲會郁架﹗ 在國內吃火鍋,牛肉是不會抱太大期望的。 要吃好的全都在香港,這份雪花肥牛$38,比較嚡口但有牛肉味,在國內已算不錯的了﹗ 麻辣湯底吃粟米,是一種挑戰,咀不麻不腫的話算你叻﹗ 雜菇用來吸湯一流﹗ 土雞半份,有雞味,不是雪藏貨﹗ 木耳爽脆﹗ 食材沒什麼大不了﹗最重要的當然是湯底﹗ 不是說笑,這兒的冷氣大得很,但我自吃第一樣食物後,額頭便開始冒汗﹗ 再隔一會,頭皮、眼底鼻底連帶面頰,也冒出雨水般大的汗珠,不是因極辣而谷出來汗水,而是其花椒的麻勁揮發出來的作用﹗ 湯底不死辣,食物不會因太辣而吃不下,只是越吃,汗便越下,雙唇麻得不聽使喚,嗜吃辣的朋友應會感到愜意過癮得不得了﹗ 岩岩灼熟的菇和鳳爪,這種顏色你敢吃嗎? 食物不貴,碟碟也才三十多元左右,還可點半碟半份錢,最後飲了五六支大青島,兩個人埋單才250人仔左右,抵吃﹗ 第一次吃牛油做的湯底,食物全帶羶油香,這就是麻辣鍋的正宗情懷,但當然油膩得很,不會吃得太多,因吃落雖過癮但實在膩透了﹗ 不吃牛油的朋友,可選擇這兒的清油麻辣湯底,也可吃到那麻辣滋味﹗ 我倆下次來也一於試試清油的,再比較味道如何﹗
評分: 味道 4 環境 4 服務 4 衛生 4 抵食 4
2011-08-19
終於都完成o左土耳其遊記,可以寫番食評﹗ 係人都知我鍾意打邊爐,周圍試新野是必然﹗ 今次就介紹番間比較得意的,可以一邊打邊爐一邊燒烤既小店﹗ 小店大排檔格局,鋪子不大,座位三十來個,勝在冷氣足,點燒點打邊爐都唔會熱﹗ 店內提供電爐,食客可以點食材來燒﹗ 就現場所見,絕大部份既食客都係來玩燒烤﹗ 食物價錢尚算大眾化,不過咩都想試的話就梗係貴啦﹗ 你在呢度facebook打咭既話仲有腸仔送添﹗ 磨菇愈烤愈香,現烤下完全唔洗調味亦多汁,味道出眾﹗ 店內大量調味料提供,孜然粉、海鹽、辣粉、蒜鹽椒鹽黑椒等等等都有﹗ 你想落咩都得﹗岩哂鍾意自己玩調味既人﹗ 呢度自家出品既雞翼亦都醃得好入味,正﹗ 要了大眼雞、蟶子、大蜆及鮑魚﹗ 要彈既就係呢度個烤爐力度唔係好夠,燒烤時要俾少少耐性﹗ 我地當然係飲住啤酒為樂,藍妹$22,青島$18,合理﹗ 大蜆及鮑魚仔亦新鮮,上枱時仲郁的﹗ 大蜆海水味極濃,待其開口後加少少蒜泥,既惹味又清甜﹗正﹗ 最後食完一碟唔夠喉再加多碟呢﹗ 加少少香蔥,彈牙好吃﹗ 老友在現場上facebook打咭,待應即送上台灣腸一碟,甜甜的,外層香脆,好味喎﹗ 安格斯大肥牛牛味濃,夠厚切,質感香軟,食得過﹗ 友人還叫了魚頭、魚骹等食物,我唔食魚梗係唔理啦﹗ 刀叉切開齊分享,睇下幾厚肉,滿足﹗ 大眼雞以為要燒好耐,反而仲快過鮑魚﹗ 即日街市貨,夠大條魚味亦濃﹗ 半殼生蠔﹗ 整體來說食物不錯,只要多叫新鮮食物,準是不會失望的﹗ 飲左十幾廿支啤酒,埋單每人$300,不便宜,不過幾好玩,如果有時間慢慢燒下吹下水飲下啤酒,這兒是好地方﹗ 推介美食: 手切安格斯牛,海鮮,大蜆,大墨魚
評分: 味道 4 環境 4 服務 4 衛生 4 抵食 4
2011-03-21
周日又是行山日,同食家由北潭涌出發行入浪茄來回,24km﹗ 路不難行,但行左成六個鐘成個人好似虛脫似的,一上小巴出西貢已瞓到成隻豬咁,又是搵食既時候﹗ 上次食左海鮮唔太鍾意,今次又去試試其他野,到了小巴站旁的..... 呢間野好多電視節目都介紹過,開業於1978年﹗ 鋪位都幾大,茶記格局,燈火光鮮,不過要留意既係夜晚八點就收鋪,我地七點幾去到所餘的食物已不多﹗ 食物選擇也不少了﹗ 亦有0的招牌粉麵可以揀,$30有交易,價錢合理﹗ 原本有個驚喜係呢度有得點我好想食既銀尖粉,點知又係因為就收鋪賣哂,慘呀﹗ 麵底夠哂多,一個麵已是滿滿的,魷魚彈牙爽口無皂水味﹔雞翼尖一份竟然有成六七隻,夠哂多,鹵水入味﹔墨魚丸內有彈牙墨魚粒,口感足﹔最緊要一樣野係佢既紫菜,大餅得不得了,一箸麵配上紫菜味道更鮮美﹗ 由於點得太多餸關係,試不出個湯底龍與鳳﹗ 呢杯凍鹹柑桔就係佢介紹,飲落很順喉,味道適中,喝完喉頭舒暢呢﹗ 原來松記條街入面勁多野食,下次再行完山可以再試多0的新野﹗ 食店地址: http://hk.myblog.yahoo.com/smallsmalllin/article?mid=23536 我的飲食微博: http://t.sina.com.cn/smallsmalllin 推介美食: 豬手,牛筋腩
評分: 味道 4 環境 4 服務 4 衛生 4 抵食 4
2011-02-15
一年一度的情人節,這已是我同食家的第四個情人節了﹗ 今次挑選了尖沙咀赫德道的和幸吧﹗ 沒有什麼原因,就是因為她有露天座位,可以炭爐燒烤﹗ 情人節邊到有得你揀,咪就係情人節套餐﹗ 食物種類都有十種八種,勝在款多咩都可以試下,岩哂貪新鮮的我倆﹗ 裝修得很不錯,以吃燒烤為主,食店以木作主調,室內大廳中有個超大的圓形吧枱,以電爐作燒烤﹗而露台則有五六張露天座位可以炭火燒烤﹗ 我都好醒架喇,早左成個月已經訂定室外座位,炭火燒點都過癮點吧﹗ 火夠哂猛,食物放在網上烤一陣就熟喇﹗ 點了神之河燒酌,比較淡身易入口,加冰飲多兩杯真係飲醉都唔知﹗ 為我們的第四個情人節飲杯﹗ 蝦相當大隻,肉質既綿又鮮甜﹗正﹗ 三文魚同油甘魚都新鮮厚切,食家話很不錯﹗ 生菜底,上面的鹹餅乾,配上蕃茄及芝士。 芝士夠香、餅乾鹹脆、蕃茄酸甜,灑上沙律醋,味道配答相當適宜,清新之選﹗ 幾隻蝦加青瓜及酢紫菜,開胃菜,無咩特別﹗ 肉質鮮紅,油花有如雲石般清晰,兩面係咁易燒下佢,牛油味出眾,質地軟熟,好吃﹗ 特選薄切牛舌,我一向都唔食牛舌,今次試一試,印象難忘﹗ 薄切關係不會太韌卻有嚼感帶牛香,幾得意喎﹗ 呢個牛五花肉,真的乖乖不得了﹗ 豬既五花腩就成日食,牛既真係第一次試﹗ 由於夠哂肥美既關係,油脂香同牛味超濃,烤到有少少焦焦地,超香口,同食家都覺得佢仲好食過和牛﹗ 雞腿肉﹗ 普通野,不過佢用果汁來醃,我覺得甜甜地幾好味﹗ 放在炭上慢慢烤焦,慢慢玩﹗ 呢餐食左成兩個幾鐘﹗哈﹗ 愛情豚,佢話係送既,我同食家都話唔洗錢就話送o即﹗ 愛情豚是日本豚肉,上網睇佢話原來係一個人照顧一隻豬,又有醫生睇住佢,對隻豬百般呵護,對佢好有感情,所以叫做愛情豬喎﹗ 烤燒後夠肉香,豬味雖重卻不羶,加少少佢提供既蒜蓉好味道﹗ 呢度服務唔錯喎﹗ 待應生都好有禮貌,不時主動埋黎幫手,又主動幫我地影合照,仲要影得幾好無手震添﹗ 食食下又幫我地換下網換下炭,又加酒又加冰,俾個五分佢﹗ 換左炭,火力強勁了很多﹗即刻燒番片和牛先﹗ 銀鱈魚,普通野,不提也罷﹗食家話幾滑﹗ 帆立貝又食得喇,牛油味濃,雖是雪藏貨卻香甜﹗ 室外凍凍地,整番個麵豉湯底既蠔鍋湯,成身暖哂﹗ 入面有冬菇、大白菜、大蔥及椰菜等,再有四隻蠔,簡單得來卻算暖胃窩心,成鍋當然清哂啦﹗ 甜甜蜜蜜作結﹗ 因飲酒關係埋單千二蚊,情人節出街食飯就一定貴架喇﹗ 不過呢個餐多種類,每樣食物味道亦不錯,炭燒點都會覺得特別溫暖,難得今日又轉涼得9度,感覺特別開心﹗ 價錢比盛八及伊呂波平,露台燒烤亦有特色,會再來的﹗ 情人節快樂,願每年也如此這樣的簡單快樂﹗ 更多相: http://hk.myblog.yahoo.com/smallsmalllin/article?mid=23293 我的無聊微博: http://t.sina.com.cn/smallsmalllin 推介美食: 牛五花肉,和幸沙律,和牛,燒物盛合
評分: 味道 5 環境 4 服務 5 衛生 5 抵食 3
|