Brasserie Le Fauchon (中環)

夜晚去接Jo收工，佢booked咗七點半le fauchon。以前成日聽舊同事阿Pat提起，但一路都冇去食過。

入到去第一眼未見到人招呼先見到黃賢誌，不過唔見有男伴一齊。餐廳環境唔錯，可能係閒日，所以唔太多人，亦好彩冇遇到嘈喧巴閉客人。

坐低兩個人睇咗一大輪，最後都係揀返個set。

白酒煮蜆一般，仲有少量沙。都係鍾意龜井啲清酒煮大蜆多啲。

麵包好似豬仔包，好好食。外層脆得嚟唔硬，入面仲係暖嘅。

煙三文魚caesar，用料新鮮。

蟹子蝦湯，好濃好香。

煎鵝肝，點都諗唔到咁大舊，仲大過我成隻手掌（唔計手指）…。外面煎香，擺入口即溶。雖然自己唔多食膶，但都覺得好味。

唔知點解中途攝個青檸雪葩。不過食到呢度都飽咁滯，食完啱啱消一消滯。

跟住至到main course。塊rib eye成尺長咁滯，見到都嚇親。配菜嘅薯仔好好食，但係有兩舊懷疑節瓜物體就好鬼硬。件扒好有牛肉味，最緊要係冇乜調味汁料。

個pasta有龍蝦同菇，好好味。雖然滯滯哋都成碟食晒。

甜品係個朱古力軟心蛋糕，加埋舊vanilla雪糕啱啱好。另外仲有個焦糖布丁，我就覺得唔夠香。

食完好似兩個大肚婆咁走。咁嘅價錢食咁嘅質素，我覺得掂。

Craft Coffee Roaster (大角咀)

幫襯過兩次，經驗都好好。試過hand drip同奶啡，兩樣都好好味。

最令人驚喜係，除咗咖啡好之外，連食物都非常吸引。我第二次幫襯時隨便試咗件香蕉芝士蛋糕，無論色、香、味俱佳，送咖啡簡直係一流。大角咀其實好多特色食肆，可能因為租金尚未瘋狂上升，所以都仲有生存空間。呢間舖對面將會開starbucks，睇嚟連鎖店又會陸續進駐，希望佢哋可能繼續做落去，畀個機會一啲唔想再幫襯連鎖店食倒模嘢嘅顧客可以歎一下啦。

Outback Steakhouse (荃灣)

之前年初一晚要開工，無謂之餘，梗係老奉蛇咗去。八點零鐘嚟到都有唔少人，可能因為好多食肆冇開。一個人入到去，諗住坐bar枱隔離啲高枱唔使同人坐，host見冇人喺嗰邊但都俾我坐。好多餐廳就會見坐唔晒就焗啲客坐埋一堆。

一個人，其實真係唔好嚟。但係當時自己好想食返個cheese fries慰勞自己，於是叫咗一個，仲叫多個buffalo wings。結果fries清晒，wings要打包。

佢啲薯條真係食極唔厭，不過都係嗰句，最好再多啲芝士同煙肉。雞翼就一般，真係點都食唔返喺美國食到嗰啲，個味硬係差咗少少。

都係四個人或以上嚟最好。

漢堡王 (北角)

i'd trade 10 big mac's for one whooper any day of the week.
等咗好耐，呢間burger king卒之都開，唔使再走咁遠食。九點幾去到依然爆滿；買咗個whooper combo，嚟得好慢，可能因為唔係整定太多喺度。
grilled meat同麥記啲煎嘢真係兩回事，食落唔會乾晒咁。各種配料份量比例啱啱好，大大個都好快食晒。
轉洋蔥圈成個餐四十蚊，但係依然咁多人幫襯，可見大家對佢回歸係等咗幾耐。

何興記 (牛頭角)

間唔中都會嚟食，因為呢度啲牛腩牛什都好正。

星期日兩個人又嚟食brunch，一碗腩肚粗、一碗什河走腸、一碟艽菜花、一支忌廉。腩、肚、什都正到痺，又淋又入味，菜亦十分新鮮。

環境就真係麻麻，不過屋邨舖係咁上下，食物質素搭救晒啦。

遲啲應該清拆，有啲舖位都俾房署收返。希望佢會繼續做落去啦。