海達魚蛋粉麵 (大埔)

海達係大埔區人氣極高，由舊時係大埔綜合大樓已經人山人海，依家搬左出黎仲更加多人!!

同好多人既睇法一樣，
海達最好食既就係魚片頭同埋魚蛋，個種味道真係好甜好香，但係又一d都唔腥，勁!!

牛腩或者其他野其實都唔錯，唔會令你失望，不過可惜大埔區魚蛋粉店舖高手林立(新蔡潤記、群記清湯腩etc...)，可能就失色少少啦。

價錢唔貴，$15一碗，加埋飲品都係$18，不過係旺既時間人流真係比較多，等位在所難免，唯有係無乜人既時間先去搵佢啦~~

流金歲月 (屯門)

同女朋友兩個人入到去屯門搵食﹐覺得呢間野幾吸引就入左去。叫左一個三周年紀念餐﹐一共有五款食物+一人一碗湯﹐好豐足既一個晚餐。

茶
有龍井、碧螺春、鐵觀音同香片揀﹐茶價當然唔會平了...
前菜
兩個人既前菜會係微辣昆布、四個人係第二樣野。

蒜泥白肉
即係一d切得好薄既豬肉﹐配左粉皮﹐個汁入味而香﹐相當之唔錯既頭盤!

炒蝦球
蝦大隻而彈牙﹐用左三種甜椒去炒﹐味道ok。

小唐菜配炒班塊
魚是經過油泡的大班塊﹐很香!

翡翠苗
不是大家喜歡的豆苗﹐而是莖佔較多的菜苗﹐吃起來較清﹐但碟頭很大﹐吃到後來像是吃草似的感覺...

小籠包
真的很多汁!!!女朋友用湯匙兜著飲都仲得!!肉是新鮮的﹐有肉香~~皮較厚﹐不過就唔怕夾個陣會爛。

杞准螺頭雞腳湯
有老火湯的感覺﹐很好喝的一個湯呢~~~

總體的感覺是很好的﹐好味道而且新鮮﹐唔算太多油。碟頭算大碟﹐兩個人食有很豐足的感覺!!有少少感想就係見到隔離台叫一d比較香港人識既食物﹐好似口水雞、津白等﹐就浪費左呢到其他既食物呢~~~可以試下食呢d餐﹐擴闊下自己對食既經驗~~

少少缺點
1.無飯跟﹐散叫要$8一碗!!茶價貴!! $9一位...
2.個餐既加一係跟原價黎計﹐結果要俾多幾十蚊...

萬利小食店 (大埔)

萬利個位置極好，係正巴士站+投注站隔離，所以好多人食下魚蛋買個腸粉拎走。不過其實佢d車仔麵真係算唔錯，依家推介下d食物先：
翼尖：係真係有鹵水味既翼尖，有成6隻又唔會好飽肚，係過口癮既最住選擇!!
墨丸：有中上水平，起碼彈牙有口感，味道不俗!
鳳爪：我比較少食，不過朋友就多數會叫，因為夠大隻飽肚，而且係個湯到淋淋地容易入口。

湯底唔係咩靚湯，不過咸咸地唔會太濃味算係完成佢既任務，食得辣既加d沙嗲醬應該有驚喜。

衛生情況可以接受，鋪仔細細唔會成日有人打掃，裝潢應該唔能夠用靚去形容，你讚佢一句實用主義都得既。

價錢$20左右，可以同朋友share多碟腸粉就岩岩好，一個非常港式既豐富午餐就咁達成!

珊瑚堡 (大埔)

我諗每一個大埔人基本上都會食過珊瑚堡﹐點解？因為個位太好﹐係正吉吉島隔離﹐地方又大。其實食物唔算特別差﹐一般焗飯or西餐都唔錯的。

不過有一個大家都發現既缺點就係實在太多人去﹐結果d waiter實做唔切﹐個個都衝鋒陷陣咁。明知唔夠人手好心就唔好排咁多款餐具啦..食個中式大碗飯都排哂成堆西餐既餐具﹐結果反而唔記得俾隻筷子同匙巾人﹐有d失敗。

同屋企人兩個人食左一個T骨一個大碗飯﹐t骨好好好大塊﹐兩邊既味道分別得好清楚﹐西冷有口感﹐而牛柳就軟身。

大碗飯就係一碗乜都有既飯﹐墨魚夠大隻不過唔好食﹐腩肉ok﹐其他食完都唔記得係咩味。

總結就係食得好緊張﹐傾唔到計﹐好想快d走。不過如果唔係咁多人既時候﹐不失為一個唔錯既選擇既。

紅蜻蜓 (大埔)

大大話話去左紅蜻蜓都超過廿次﹐差唔多咩都食勻﹐評價就係一般啦。唔會話特別好食﹐不過唔差咁囉。居民既選擇﹐唔會推介俾朋友去個d餐廳位。

午餐多數食大件排or焗飯﹐由於佢都幾大碟既關係﹐所以好多男人去食﹐女仔去實食唔哂。舊時跟意粉有炒意粉跟﹐依家無左。

tea time選擇幾多﹐一d雞脾or魚柳幾好食﹐不過個沙律熱既﹐感覺怪怪的。舊時有焗肉醬意粉﹐依家亦都無左。

前兩日先同朋友食完晚餐﹐大家都係食帶子西冷牛。白湯好傑唔好飲﹐塊排夠厚夠大不過唔夠香。食完唔會回味個種感覺。已經愈來愈提唔起興趣去呢到食﹐希望佢會有番d改善吧~~