点心代表 (中環)

標榜萌爆廣東點心嘅「点心代表」早排推出多款蠟筆小新「心點」，除咗有小新出現之外，仲有小新屋企人，美冴、廣志、小葵同小白，同埋一班好朋友，正男、阿呆、妮妮，Aminn趕到尾班車去探探野原家！ 餐廳環境貫徹主題，由門口開始已經鋪天蓋地係蠟筆小新蹤影。無論係掛畫定係玻璃貼紙全部都係小新同朋友仔嘅蹤影，成間餐廳都係打卡位！ 一坐低見到本Menu成本漫畫咁精美！點心仲分成「搗蛋篇」同「被打篇」，好過癮囉！

重口味嘅Aminn當然要玩下点心代表嘅超萌蒸包，另外仲點咗幾樣點心麵食，其實点心代表真係賣點心架！ 不理不理左衛門奶黃流沙包($49) 用筷子拮穿不理不理左衛門鼻哥窿，豬仔仲會流鼻。。。最啱post相呃like！ 大象朱古力流沙包($49) 朱古力流沙餡好有香濃朱古力味，同中式蒸包就唔係好夾混，不過有小新嘅小笨象同裸背，今次媽媽一定唔會發嬲嘅！ 点心代表嘅點心以即叫即做，確保客人可以品賞到最新鮮嘅美味，另外將潮流加入菜單，打造新派點心，Aminn仲點咗鮮蝦菜苗餃($29)、安格斯牛肉腸($39)、乾炒安格斯牛河($69/只限中環店)，估唔到喺中環用呢個價錢都飲到餐茶，而且兩款安格斯牛點心都無失望！不過用呢款茶包沖出嚟嘅清茶(茶位$10@)就差咁啲喇！

上海姥姥 (灣仔)

無心插柳遇到軒尼詩的江南 上星期原本出灣仔食上海菜放題，中間遇到一啲事，陰差陽錯路過好久以前嘅壽司鋪已經華麗轉身成為上海菜，見到門面幾乾淨就走咗入去，裝修幾光猛，一入去見到中間張bar枱，不過入面無乜人！

睇下個餐牌，基本上海蘇杭地道食物都有，拉麵、包點、小食同小菜，餐牌註明會用上「手製拉麵」！

門口入嚟就見到師傅喺度拉麵同整小籠包。

最喜歡點拼盤，啱晒想試晒唔同口味嘅我！

最後點咗醉雞、醉豬手同雞絲粉皮。酒味尚算可以，醉雞肉質唔鞋，尚算滑溜。豬手就未夠入味，不過豬皮夠厚夠爽。雞絲粉皮其實無乜特別驚喜，已經係喺街食到比較好嘅雞絲粉皮。

而個擔擔炸豬扒麵呢，炸豬扒係另上嘅，炸得幾乾身，豬扒剛剛炸起仲算juicy，放涼咗就開始乾。

呢度嘅手製拉麵有驚喜，係師傅即場拉嘅拉麵，麵條口感好好，唔敢講好彈牙但有咬口唔係淋身。仲有擔擔麵個花生麻醬，加咗辣味咁先夠蘇杭嘛～不過略嫌湯底唔夠厚身。

But手製拉麵必食！

食上海菜又點少得小籠包？

姥姥小籠包皮夠薄，肉餡夠鮮甜不鬆散，不過可能湯汁唔夠，未夠飽滿感。

話說Aminn好鍾意食葱油餅，見呢個圓碌碌咁趕緻就叫咗，點知一咬之下咁厚皮嘅？其實佢真係好似Donut咁，將蔥餡集中咗喺中間，油蔥勁香勁濃郁！不過呢，Aminn都係喜歡較乾身嘅葱油「餅」。

以灣仔人來人往嘅軒尼詩道嚟講，假期一點左右已經開始等位，而且上海姥姥勝在大眾化價錢坐得舒適，真心抵贊！

DK Cuppa Tea (上環)

Aminn期待已久想去嘅DK Cuppa Tea，終於約到Friend子去啦~因為DK經常推出唔同嘅Afternoon Tea，每次都有特別驚喜！

今次我哋order咗浮遊童真下午茶，聽個名都知係一個充滿童趣嘅Tea set，主角就係好多大小朋友都熟悉嘅浴室小黃鴨，勁興奮呀！

下午茶由Mojito雪芭開始，微微嘅酸味非常清新，另外一壺有機花茶係Pure Awakening，結合咗香茅同檸檬(Lemongrass & Lemon myrtle)，好有舒綬功效嘅香氣。

之後開始食嘢喇～咁多嘢食食咩好呢？鹹點陣容很強勁，竟然有芝士釀麒麟蚌同加拿大蟹拑！泡泡浴缸係亮點！翻開泡泡，原來係德國香腸！另外仲有法國迷迭香牛角酥，質感鬆化，食完咸點就到甜點！

甜點就嚟到小黃鴨世界，大大小小嘅小黃鴨，有朱古力、曲奇、Macarron，全部都食得架！仲有玫瑰奶凍(Panna Cotta)、檸檬Cupcake、法式檸檬撻，每一款都勁精緻，靚到唔捨得食呀！

DK Cuppa Tea嘅Afternoon Tea set一般都係BFF嘅心頭好，而呢款浮遊童心下午茶好適合一家人嚟個輕鬆親子活動呀～不過DK Cuppa Tea出咗名成日walk in都要等位，想周末過嚟記得預早book定先啦！

浮遊童心下午茶
每位$298/兩位起及另收加一服務費

金記冰室 (銅鑼灣)

早兩個星期趁假期前空檔，終於約到幾個Friend子晚飯，竟然又係去金記冰室，原來新店開到去銅鑼灣時代廣場附近，呢間分店勁就腳喎！

呢間金記冰室分店位於銅鑼灣霎東街，即係好久以前電車廠嘅所在地，冰室配合「電車站」主題，喺店內正中有「一架」仿製電車，係往金記嘅原址「筲箕灣」，店內裝修亦充滿懷舊感超有心思，啱曬 Selfie控post相呃Like啦～

我哋點咗晚飯小菜套餐，包中湯或者羅宋湯，仲有白飯同飲品。意想不到冰室到竟然有原條蒸魚，梗係要order啦！仲叫左幾個中式小炒，京蔥蜆介雞皇、XO醬茄子牛仔骨 、蒜蓉炒西蘭花。估唔到去冰室上至茶餐小食，下至晚飯小菜，中式西式都有，真係嚇親寶寶！

題外話，熱飲杯印咗舊香港建築，好可愛囉～心心眼～凍飲揀菠蘿冰同凍檸賓都唔錯喔～

Hello Kitty Obrigado (新馬路)

繼續世界阻止唔到Hello Kitty入侵系列，

Hello Kitty已經撘埋船過大海喺Hello Kitty Obrigado做咗葡國少女？

今次嚟到位在香港人實識去嘅澳門議事亭前地(新馬路噴水池)，就喺麥當勞旁邊嘅巷仔轉入去半條街就到了．
Hello Kitty Obrigado當中「Obrigado」其實葡文「Thank you！」

店內裝潢澳葡風十足，英倫少女都換咗葡萄牙民族背心裙，牆上面仲有葡國特色手繪磁磚畫，你睇吓隻葡國公雞就知～唔係葡國雞呀！

就連澳門嘅景點指示牌都一模一樣，加埋周圍都係Hello Kitty同招牌蝴蝶結，一到澳門就去咗潮聖啦！

店內有一系列澳門手信，款款都有Hello Kitty嘅造型架～
最夠特色當然係葡撻同杏仁餅，仲有Hello Kitty造型豬肉乾，一睇就知佢叫阿豬貓！XD

隔離仲有好多款馬卡龍，有綠茶、焦糖、檸檬、伯爵茶等等．
特點係上面印咗唔同嘅澳門特色圖案，好似係賽車、賭場 仲有大三巴、觀音像、媽閣廟景緻真優美架！

除咗手信之外 呢度仲有冷熱飲品同乳酪雪糕，價格都無因為隻Hello Kitty而貴咗，我就買咗杯朱古力曲奇乳酪雪糕，不過店家係無座位嘅 所以我到門口嘅石凳坐，只要無落雨 其實感覺一樣．

鋪面雖然唔大 幫襯嘅人都keep住有，不過最多人會過嚟影相架！
所以都要守秩序 等等啦～