The Cottage Cafe & Pub (上環)

因為公司係附近, 因為同事從外地返黎, 所以我地又一齊出黎食晏。呢日因為係農曆新年之後, 大家都唔想再食中餐, 所以一致鎖定食西餐, 老闆話呢間聽朋友講左幾次, 應該都唔錯, 所以我地就黎左呢到啦~

3個人黎食都要擾攘左5分鐘, 佢係出面開一將檯俾我地, 我地分別叫左"Burger with fries", "Meatball Spaghetti", 周埋"Masala Chicken"

先黎左個湯, 應該係Green Bean Soup, 夠熱, 好味~ 之後好快個意粉就上左檯, , 大家睇相都見到賣相不錯, 我都以為應該好味。因為呢個係同事叫既, 所以我都冇理。其後, 漢堡包同MASALA CHICKEN都分別上檯, 大家都餓, 當然即刻齊齊開動。

當大家都好沉醉於自己個餐既時候, 同事已經停手, 我地都好詫異, 同事就"撩"俾我地睇, 所有肉丸原來都未煮熟, 咁我地就話不如同餐廳講啦, 同事就話已經冇胃口唔想食, 所以就冇同餐廳講。

至於我地既漢堡包同雞, 當然係好味啦.... 冇胃口既同事就KEEP住食薯條, 因為新鮮炸出黎, 梗係香口啦~至於我既MASALA CHICKEN, 好既係落足夠既香料, 所以又香又辣, 缺點當然就係份量太少啦, 如果可以再多D, 咁就好啦! 

希望只係大廚一時大意所以先冇整熟個肉丸, 亦都希望下次黎食唔會再出問題~ 

稻菊日本餐廳 (尖沙咀)

星期日一早起身搵野食, 朋友咁啱有興趣, 2個人一齊去左老尖稻菊, 點知就咁出左事。午餐既稻菊, 大部份都係食set, 當中亦以天婦羅出名, 但係, 因為之前一日我係屋企整左炸蝦卷, 唔想再食熱氣野, 所以叫左一個壽司, 朋友叫左銀鱈魚西京燒set。
去到一間咁出名既高檔料理, 講真見到我個set上檯個陣都係嚇左一跳。
1) 日本高檔料理跟本就唔會有三文魚, 呢個set竟然用上大量既三文魚......唔係化, 黎呢到食三文魚? 不如去原氣/千兩啦!
2) 海膽/三文魚子/大拖羅都冇? 喂....SOGO樓下超市有齊三樣, 再加帶子....什麼什麼, 人家都係HK$198有交易喎
3 ) 你睇下個6件三文魚卷, 好似張d頭頭尾尾擺埋一齊, 又卷得唔靚, 係唔係求其搵個人黎卷俾我食架!
4) 大家要記住, 壽司set 係HK$300加一.......雖然最後我唔駛俾錢, 但係我都替朋友唔抵。
出得黎食飯而家都唔平架啦, 黎得稻菊都係希望食到有水準既野, 而唔係食埋d 咁野呀, 都係果句, 如果係既我去原氣啦~ 起碼係壽司檯都可以自己揀碟想食既黎食, 而唔係你上d 咁食物黎我張檯囉~

芽莊越式料理 (中環)

係中環食飯就真係無咩選擇，今次係食早lunch，所以同埋同事去左食芽莊，不過估唔到既係，就算12點出門口去食飯，芽莊入面依然係咁多人，想坐得舒服d都唔得。都係一檯人叫晒野食，而有人依然漏單，出去中環食又唔平，又逼又多人，真係唔化算。

我地一人叫左一個生牛肉河粉、柚子燒蝦沙律同埋軟殼蟹卷。我發覺佢個湯底又鹹左d啦! 之前佢都叫左ok既，不過今次之後就應該唔會去食啦~ 個柚子燒蝦沙律唔太差但亦無咩驚喜。個軟殼蟹卷就做得幾好，炸左上檯依然係脆既，不過就要好有耐性去等啦~

我最唔鐘意芽莊係無論幾時去都係一屋鬼佬同埋鬼咁逼，呢兩種感覺都令到我唔可以好舒舒服服咁享受個午餐。

越色牛肉粉餐廳 (九龍灣)

因為唔知咩原因，呢期好興開越南食肆，越南菜尤其是係生/熟牛河就開到成行成市。事緣我要去B&Q要幫公司搵d野所以就去左個頭睇下，咁我就未食野，就入去諗住唔好食得太多啦，就叫左一碗生牛河同埋一個柚子蝦沙律，男友就要一杯咸檸七(因為佢食左飯啦)。以上叫既野，我諗大家都食過所以大概都知個味係點啦。

個湯好重味精，因為通常芽菜、青檸、辣椒、同九層塔係另外上架麻，佢已經無新鮮辣椒粒(新鮮既同辣椒醬係兩件事)，個青檸榨晒汁落去，到頭來都係食唔到有青檸既清香，咁你話個湯幾勁咁蓋個晒d味呢。我好懷疑如果佢有辣椒粒，加埋落去的話，會唔會食得出呢???!!!!

個沙律真係可以用難食黎形容，隻蝦係霉既，一d都唔爽/ 彈牙，我情願佢唔落。柚子唔甜亦唔酸，嚴格黎講係無味~~ 個汁，魚露無因應個柚子唔甜/酸而酌量減低，結果係個沙律汁係咸架囉。

呢餐真係食得辛苦，不過亦加速令我想去蘭杜街食碗真係好食既生牛河。

鈴木珈啡館 (灣仔)

夜晚放工無野做，而且得閒要去二德惠入下貨，因為而家成日都要練習麻! 買完野又唔想周圍走去食飯，所以就去左大有商場既Suzuki Cafe，諗住可以食得light 一d。

基本上都係自助型式既，睇左想食咩，根住就走去俾錢，咁佢地就會俾個牌你之後就會送食物過黎。主打係有機食物，不過講真啦，係唔係有機我真係唔多知啵~~~

我叫左一個磨菇湯同埋一個燒汁雞意粉，盛惠$72，都唔算平架。不過個磨菇湯真係超多磨菇架，個意粉比我想像中大碟，男仔食都一定夠飽! 不過我有野唔明架，係唔係因為係有機呢而佢地又驚無味所以調味調得鹹左d即。定係博你一定要買野飲呢，呢個真係一個謎!