抹茶館 (鑽石山)

又到禮拜日，因為幫人買野就黎到荷里活了，咁當然要醫飽個肚先講啦，行行下就黎到哩間鋪嘅門口喇，好耐之前就聽過哩間鋪嘅大名了，我一般唔會逛購物中心的，今日既然黎到就試試啦


入面位置其實已經唔少了，但等位總是少不免的。。。


等咗一陣就入座了，坐低，其實有啲唔好意思的，外面有唔少人等位，而我就一個人，面對面就有一個空位。。。所以我盡量都想喺非繁忙時間先黎哩種餐廳的，sorry了門口在等位嘅食友們～





快啲落order先，黎份【卡邦尼溫泉蛋烏冬】，再黎【綠茶豆乳布甸芭菲】吧，芭菲後上，快！


店名叫抹茶館， 綠茶罐做裝飾品，木條綠色sofa裝修，周圍都係清新氣色呢～




烏冬上檯了，就聞到濃濃嘅芝士味喇，賣相亦唔錯啵，白色嘅醬汁同烏冬，淡紅色嘅雞蛋同煙肉，綠色嘅蔥粒，令人好有食慾呢～試試味再講啦，醬汁味道ok啦，卡邦尼醬汁嘅味道都好難再有突破架喇，鹹味稍為有啲唔夠，但檯面冇鹽，亦冇胡椒粉。。。

煙肉煎得軟軟的，冇過乾抵贊架喇，記得麥當勞嘅【煙肉蛋漢堡】，煙肉經常都過乾，蛋又經常過老，越來越冇意思，所以好耐冇食過了


溫泉蛋嘛。。。稍為生咗啲wo，一掂就爆開，最起碼我用匙羹一兜，隻蛋可以喺上面維持形狀嘛，宜家我會用生雞蛋去形容，希望係個別問題啦

烏冬口感正常，放開黎食，整體感覺其實還可以啦，檯面沒調味料令碗麵差咗一個層次囉。。。啊，雖然一開始就聞到芝士味，但食落又冇咩芝士鹹香，又冇額外嘅芝士提供，唔係樣樣都要我自己額外叫下嘛。。。服務員又唔係特別多。。。


食完烏冬喇，服務員小姐，芭菲可以上了啊～3分鐘左右就上檯了，有紅豆呢～嘗嘗雪糕。。。綠茶味是比麥當勞的濃一點點的，但也冇特別滑吧。。。哈哈哈哈，用長匙羹刮低少少，有一層cream呢 明白了，食野就係要食整體的，有時候係要撈埋一起食先食得出味道的嘛，ok，撈就撈吧～ 稍為撈撈，搞掂，繼續食，口感creamy得多了，綠茶味依然足夠。食到脆脆嘅麥片了，麥片同綠茶雪糕一齊食感覺唔錯啊。

啊，哩粒好似係白玉吧～粘粘的，哈哈，都幾得意吖。。。。食到一件滑滑嘅野。。。咩黎嘅呢？再搵下睇下仲有冇呢。。。冇喇，得一件。。。唔通係布甸？？？開始懷疑自己係咪食緊【綠茶雜燴芭菲】，冇叫過紅豆就有紅豆，冇叫白玉就有白玉，有叫布甸，係有布甸，但得一小件。。。算了。。。整體味道其實唔錯的，有脆脆嘅麥片，有滑滑嘅綠茶混cream雪糕，食落舒服就是了


但價錢就稍為高咗少少了，冇辦法，租金貴吧。。。。。。下次食芭菲就好了，反正烏冬冇咩好食

批&撻專門店 (九龍灣)

今日特登出黎買野過年，又再次經過哩間批&撻了，6點幾喇，約咗人9點晚飯，哩個時間唔食又餓，食又怕飽，真係食件撻呀，都要想清楚食邊樣

望下再講啦，食有餡批又太飽，甜品又唔想食，突然俾我見到個熟識嘅名，就要哩件啦，【Milk Tart 鮮奶撻】～

我喺南非10幾年，除咗唐人街之外冇【蛋撻】買架，一般超級市場bakery賣嘅就係milk tart。南非賣標準size嘅milk tart大概有8吋左右吧，預咗人買返屋企切黎食的家庭裝。一般都會喺表面灑些許玉桂粉，自細屋企人都有教啦，玉桂粉有安神作用，夜晚訓覺之前飲杯暖嘅加咗玉桂粉嘅牛奶會好訓啲嘛～咁milk tart嘅味道就緊係帶甜味架啦，我地會加糖落奶茶度調味，但從來唔會加鹽的，食食飲飲關於奶嘅野，帶甜嘅味道對我黎講同常識冇咩分別 而蛋撻印象中就可以配搭唔同嘅口味囉，鹹甜皆宜～




我特登講咁多就緊係有原因啦，原因就係件撻皮好重牛油味，撻皮同整蛋撻嘅皮係同一隻，牛油味其實係好動物feel的，偏油的，配合蛋就冇問題，配合奶哩種好甜品feel嘅飲品嘛，唔係話唔得，可能係我先入為主啦，我覺得奶撻應該係甜品嘅感覺，而唔係咁油膩嘅感覺囉。。。

整體味道其實唔錯的，有新鮮嘅奶味（鮮奶同盒裝保質期長嘅long life milk味道感覺上係有分別的），撻皮亦夠鬆化，中上之作。。。但係整體 ☞感覺☜ ，對我黎講就怪怪地囉

維記咖啡粉麵 (深水埗)

每次經過哩間鋪門口都係大排長龍的，之前又唔係冇黎食過，我唔覺得有咩原因要去陪其他食客排隊，所以已經好耐冇黎試佢地嘅出品了。今日放得早，黎哩條街之前已經喺另一間食咗碗二郎系拉麵了，其實已經有7成飽了，不過既然經過，又唔駛排隊wo，就入去坐下啦～

都食過野喇，已經唔餓，就先黎杯【凍咖啡】，再要份【咖央西多】吧

上次黎哩間食野已經係好耐之前嘅事了，當時食嘅係【潤牛麵】同【咖央多】，好記得啲咖央味幾得意，啱啱好夠甜，配合軟軟嘅麵包真係食得好舒服～

但當時實在已經好飽，就算幾想都已經再食唔落多份【咖央西多】了，所以今日就係黎彌補哩個遺憾的



咖啡先上，飲啖先。。。味道正常啦，咖啡味夠，就係唔夠凍，要啲冰融咁啲之後先夠凍，但味道又會淡咁啲。。。不過有唔少茶餐廳都係咁，佢地好似唔係好在乎客人嘅感受咁，反正一杯咖啡而已，冇所謂啦，下話。。。。。。


試試件咖央西多吧，嗯。。。唔錯啵蛋好均勻咁包喺多士嘅表面，蛋味好濃份量亦啱啱好，煎得亦唔錯，冇煎過龍，油亦唔太多，上上之作 要批評嘅係咖央漿嘅份量對比多士上嘅蛋味，煎多士嘅油味黎講，份量比較少，唔係好夠甜 當然如果哩個份量搽喺普通多士上味道就啱啱好夠甜了～但整體黎講真係幾好味

下次未食飽嘅話再返黎食豬潤麵啦

唯一麵家 (荃灣)

放工，時間不早了，去地鐵站途中見到哩間鋪，就喺壽司店旁邊，餓餓地，不如食少少野先上地鐵啦，喺門口，見到有人買【餡餅】，想起之前喺附近【民豐】買過一件牛肉餅，覺得口感太乾，試試哩間嘅餅又點啦




哩件餅就juicy好多喇，有唔少韭菜，肉汁比較多，食落比較鬆，喺口感哩方面就做得唔錯喇。但係食唔到咩肉wo，再食多啖，依然冇咩肉，有啲小氣囉
整體黎講味道唔差的，但係喺肉嘅份量同餅嘅鬆軟感之間攞唔到個平衡，啲菜同肉汁又撐唔起成件餅嘅味。。。哩件餅，真係冇乜肉的，味道又唔多夠，所以我覺得冇咩好食的。。。。。。

混亂拉麵 (深水埗)

有事要去民政處做宣誓，放工喺葵芳附近，住喺彩虹附近，就決定黎深水埗了 搞掂啲無奈野，心情放鬆了，5點幾，當然又係搵食時間啦，不如去維記食麵啦，平日哩個時間應該唔駛排隊。。。但突然靈光一閃，記起附近有間冇去過嘅拉麵鋪，即刻睇下記錄先。。。西九龍中心同一條街？實在太好了，就過去啦，過兩個街口就到喇，真方便（話就話方便，其實深水埗咁多舊樓，咁多大街小巷，西九前面條路咁闊都叫做【街】，唔熟哩邊迷路一啲都唔出奇 ）門口條黃色嘅banner非常搶眼，想miss咗間鋪都難，故意油成灰色嘅牆，配上啡色嘅窗框加上同色嘅盆栽位，粗糙有個人風格得黎感覺舒服隨意，幾特別吖~ 好切合混亂嘅主題呀 門口告示話晚市5點半開始，仲有15分鐘俾我周圍望 注意力俾掛喺門口哩張告示吸引咗過去，下面嗰行細字尤其重要【早上麵條已售完，感謝】。。。咁即係仲有晚市啦，在想如果係週末嘅話，會唔會日市嘅時候就已經賣曬晚市可以賣嘅麵呢，我好懷疑。。。平日黎就可以唔駛擔心太多喇～尤其係哩個時間都未有人排隊，就更令我放心喇 又一溫馨提示，我一項項咁睇，再睇返自己。。。。。。唔係講緊我，冇事，可以繼續等喇，但自認為唔適合嘅食友們就要有自知之明喇，因為我食完得出黎嘅結論係。。。。。最好係追加200克嘅麵，芽菜蒜蓉豬背脂都要加夠3倍分量咁先食得夠過癮！！！如果唔係只會換黎一臉無奈而已 咁當然哩個只係個人提議，每個人對食嘅追求都唔同，食量亦唔一樣，性格亦唔一樣，所以只係純屬參考，俾大家多一個想象方向而已～

仲有好多時間，我決定乖乖地企喺度門口等，影下相咁咪好，企咗陣之後，大概仲有5分鐘先正式營業，就有位服務員同我打招呼喇，安排我喺等候用座位坐低後，就俾咗張點菜紙我慢慢研究喇～第一次黎，就唔問今日嘅是日推介係咩喇，就玩5選1啦～雖然話係5選1，但基本上就係有冇芝士粉嘅分別，總覺得芝士味同啲豬背脂嘅味應該唔會好夾，排除咗芝士先～【全部入】都唔要，就好似食雜錦麵咁，好聽就包羅萬有，唔好聽就係連唔想食嘅都要食埋，何況咪一樣有芝士
宜家就係多肉同兩片肉嘅選擇喇。。。都未試過哩間啲叉燒好唔好食，好食嘅話，今次又食得滿意嘅話下次再講啦～宜家簡單喇，要唔要蛋？呵呵。。。。。。緊係要啦 就要【混亂玉子拉麵】啦，麵要粗嘅5mm，門口都寫得好清楚啦，唔鐘意粗麵嘅唔好入黎嘛，咁佢地一定對自己嘅粗麵好有信心架啦，幼麵係俾啲真係接受唔到粗麵嘅人食嘅姐～

上次去過另外一間食拉麵，食完覺得啲湯多咗少少，啲麵唔多夠，何況有食友話哩間啲湯偏濃嘛，就俾多15蚊加100克麵啦

然後就到唔駛額外加錢嘅配料喇～ 加就一定要加架喇，但加幾多先夠呢。第一次一下子唔好加到咁盡，話唔定人地一開始已經設定好重口味呢，保守少少好啲，就兩倍吧 芽菜一樣要保守啲，如果佢地煮爛咗啲芽菜，咁啲芽菜就會出曬水，啲湯咪會淡咗囉，1倍算喇，食唔曬咪又係浪費 哩間鋪嘅裝修好特別的，你話佢地隨便咩，其實又一啲都唔隨便，相中嘅箱係裝飾品唔係貨，你睇佢擺到幾整齊就知道，上面仲要用膠紙粘塊板上去，應該係用膠紙喺後面粘的，就睇佢唔似用釘，又唔擔心俾風吹落黎就知道我應該冇估錯。故意營造出黎嘅感覺都幾舒服嘅～門口位置有賣未煮嘅麵，等有興趣買返去自己煮嘅客有多一個選擇，至於煮唔住得出同堂食一樣嘅味就各下自理喇 我當然唔會有興趣啦，拉麵哩味野堂食咪好囉，食麵食裝修食氣氛嘛～

我填好份落單紙影咗幾張相之後就可以入坐喇，入面清一色係吧檯位，可以睇住廚師大大們煮麵嘅開放式設計已經可以話係傳統了，哩間咁闊落嘅店當然冇例外啦～檯面上放咗幾隻杯，對上仲有壺水添，倒杯飲下放鬆下先～筷子匙羹七味粉醋等等檯面上一樣都冇少，比較特別嘅係居然有條魚乾仔放咗喺啲隻醋入面，幾有創意吖，可惜嘅係我冇去試下加咗哩隻醋之後可以為碗麵嘅味道帶黎點嘅轉變，只因為碗麵我食得好滿意，埋頭苦幹嘅時候連哩啲調味料都完全忘記了 麵黎喇～都好大一碗啵，試下啲湯先，嗯，係偏味道偏濃帶酸嘅味噌豬骨湯，口味仲要偏向味噌鹹香的，鐘唔鐘意哩種味道真係見仁見智，有人鐘意豬骨湯，有人鐘意味噌湯，又好難話你既然用咗豬骨去熬湯，咁就理所當然咁話一定係要煮碗豬骨濃湯麵出黎嘅，碗湯同啲麵配合好食咪得囉。我食野一向憑感覺，覺得好就好，欣賞下人地想要嘅味道咪幾好～

兩大塊叉燒擺喺最上面，就先試下哩件肉吧，夾件試試，嗯。。。好滑啊，煮得好入味，調味啱啱好，帶住豬肉本身嘅甜味，食落非常地滿足，但脂肪含量好高，極其邪惡嘅一件肉呢～ 不過真係好好味，哩件肥豬肉，我食得好享受

食過啲肥膩野，食一啖芽菜清清佢先，芽菜放喺湯表面，好似冇煮過咁，就係食哩種新鮮清脆嘅感覺，食啖芽菜飲啖濃湯，配合起黎感覺其實幾得的

跟住一啖湯一啖芽菜嘅節奏，終於見到啲麵了，等我避開啲芽菜，試試啲麵先～嗯，口感中等偏軟嘅粗拉麵，同啲湯一齊食，味道少少偏濃，但食落好舒服，同時間夾啲芽菜，哩個配合其實好適中的 當然唔可以唔記得嗰啲邪惡之最嘅豬背脂啦，豬背脂就係一粒粒煮到好入味好軟嘅肥油，又滑又嫩，味道帶甜，同又香又鮮嘅湯，仲有清脆嘅芽菜都非常地配合，一啖麵，一啖豬背脂，真係邪惡倒極點呀！！！ 仲有嗰啲新鮮嘅蒜蓉，混入啲湯入面，真係香到不得了呀 太邪惡喇，太興奮喇～一邊食麵嘅同時我就順手將唯一一片紫菜壓落啲湯入面，當食到片紫菜嘅時候又係另外一種風味呢

隻半熟蛋嘅造型真係幾靚，有流心嘅感覺，蛋味都幾香，同少少湯配合咁食，本身較淡嘅雞蛋即時變得好夠味了

我跟住個節奏繼續埋頭苦幹，就好似之前所講咁，我對碗麵實在滿意，令我唔覺得有抬頭望下其他野嘅需要。。。嗰啲調味料就留返下次吧

美好嘅時間過得特別快，不知不覺就已經食完了，最後望住碗底仲有少少湯剩低，咁我當然飲埋佢啦，但亦代表仲有加多啲芽菜或者麵嘅空間，下次再決定加邊樣啦，不過我知道蒜蓉同豬背脂一定要加到盡，芽菜最起碼加到兩倍嘅分量，咁就真係過癮喇 今次因為唔想啲芝士味影響我對豬背脂嘅感覺果然有先見之明，下次再試下加咗芝士碗麺嘅味道又會變成點吧，不過到時候可能又會發現又加多啲芝士粉先夠味吧。。。。埋單啱啱100蚊，有食開日式拉麵嘅食友應該知道通街都係哩個價錢架喇，雖然始終覺得一碗麵賣成舊水一碗點都係有啲貴，但食得滿意總比食完冇feel好太多了