Seafood Stand (尖沙咀)

今日因為去文化中心聽音樂會所以黎咗尖沙咀，聽完6點幾，係時候食晚飯喇，之前去完【好時沙爹】出黎之後見到哩間鋪，感覺良好，幾有feel就想黎試下~ 上次見到間鋪嘅時候係夜晚，凈係記得個招牌好光好搶眼，但確實喺咩位就唔肯定了。唯有周圍搵啦，上網睇下資料顯示係喺麼地道，我又對尖沙咀唔熟，所以都搵咗陣，當然皇天不負有心人，終於俾我搵到喇，但我依然唔記得間鋪確實喺邊，如果下次再想去，睇黎又要再一次周圍搵了入去坐底，餐牌就喺眼前，為咗可以好好選擇就先order野飲先~ 有冇啤酒啊？冇啤酒賣wo，就只有白酒，仲要成枝賣，令我有少少失望添 因為間店俾我嘅感覺係好異國酒吧feel的，冇啤酒賣總覺得怪怪的，但想清楚一間新店，地方又唔大，又冇擺檯櫈出門口（可能唔俾），冇申請酒牌嘅可能性都幾高的(唔知香港賣酒嘅食店係咪一定要申請酒牌呢？印象中好多食店都有賣酒的）冇所謂，就俾罐可樂啦~ 再研究有咩食，有好多唔同嘅小食可以選擇，Seafood類嗰列大部分都係小食，先黎個今日餐湯【Fresh Oyster Soup】先~ 小食黎份【Crispy Soft Shell Crab】吧，等陣仲想去食甜品，再要份【Fiesta Seafood Pasta】應該就差唔多喇，啊，發現哩度冇甜品供應添 老闆提醒我，以我點嘅菜，我又得一個人，其實可以跟餐叫的。係咩？真係貼心喇~ 我第一次黎，唔係咁熟，就依你講嘅做啦，我負責俾錢就得架喇 

先上檯嘅係Pasta，放喺一塊砧板上面 哈哈，講笑講笑，似唔似食友們自己睇，買相唔錯，都幾有意思吖~ Spaghetti上面有三隻Mussel同兩隻蝦，旁邊仲有啲草呢，嘿嘿~ 試試意粉先，口感係偏硬嗰種，配上啲汁，感覺係唔錯的，老闆都知道每個人嘅口味唔一樣，所以已經擺咗枝Tabasco喺檯面，食客就可以依自己嘅喜好去調味喇~~~ 分量對我黎講就少咗啲了，但食物分量係依食店風格，食物整體賣相等等唔同因數決定的，所以我都好理解，想大份我就已經走咗去【意粉屋】了（其實意粉屋嘅分量對我黎講都係少咗啲）至於啲Mussel同蝦嘛，一食就知係冷藏貨，大細還可以接受，冇乜特別，以哩個價錢，哩個地區嘅快餐店黎講，唔係又細又霉嘅便宜貨就已經可以收貨了。跟住上檯嘅係軟殼蟹，哈哈，見到隻蟹我就不其然想笑，好可愛啊~~~ 一隻蟹仔坐咗喺個盒仔里面，後面仲有啲草添，好似坐得好舒服咁wo，咁我打唔打擾你好呢 因為跟餐叫嘅關係，所以只有一隻，單叫係有兩隻的（$36），唔知兩隻坐埋一齊會係點嘅呢，不過我個人比較容易熱氣，唔會一次過食咁多炸野，就要其他食家post上黎先有得睇了~ 隻蟹仔其實一啲都唔細的，大細啱啱好，所以當我同佢初次見面嘅時候會有想會心微笑嘅感覺。。。咬一咬，表面炸得脆脆的，蟹肚裡面又軟軟的，一啲都唔乾，又唔會太油，外脆內軟的炸得真係唔錯，口味屬於偏淡嗰隻，可以食到蟹本身嘅味道，個人覺得幾滿意，又正因為每個人口味唔同，所以檯上面嘅鹽同番茄醬已經隨時on duty了最後姍姍來遲嘅蠔湯終於出現了，親切的女老闆特意提醒碗湯好熱的，要小心啲飲，貼心嘅服務真令人覺得窩心喇~ 味道好香，夠濃，熱騰騰的（非常地），少少creamy，我之前未飲過蠔湯，生蠔就食唔少，唔知道蠔湯應該係咩味，亦想像唔出用蠔黎煮湯會係咩味，但味道又真係唔錯啵，如果檯面多枝胡椒粉就冇得頂了，不過我相信如果問佢地嘅話應該有的，始終張檯係快餐店形式，只係啱啱好咁大而已，所以檯面上我都睇唔到有食薯條用嘅Mustard~~~ 屬於前菜類嘅餐湯居然最後先到，但以另一個角度黎睇，哩碗湯，佢地係即叫即煮，煮完就上檯，真係誠意搭夠呀，從哩碗用紙盒裝住嘅湯，你可以睇到老闆對想開好間餐廳嘅熱誠，對入哩客人嘅真心誠意，一間小店，每次接到order就去重新煮一碗湯，比啲煮埋一大煲，有客人要就攞去翻熱好太多了，所以我一啲都唔介意，哩碗湯飲得舒服，飲得窩心~~~ 何況都唔係好遲到姐，份Pasta都未完全食完買單，盛惠92蚊，價錢合理，俾得願意，下次再見~~~ （如果客人離開嘅時候聽到佢地嘅一句，歡迎下次惠顧，咁我就冇挑剔了，不過成間店得兩個人，又要接單，又要收錢，又要煮，又要攞上檯，顧客食完又要收拾，就唔好太多要求了）

咁唔好話我不斷贊冇批評，平心而論間鋪嘅定位有啲奇怪，外表望落似小酒吧，但冇啤酒供應，外表睇又唔似快餐店。。。。不過可以睇得出，哩度係老闆完夢嘅地方，希望佢地可以維持生意，繼續做落去啦，哩仲夢想小店，真心希望10年後仲可以見到佢個閃閃發亮嘅招牌

唯一雲貴川風味 (荃灣)

難得喺荃灣放工，我又忍唔住黎哩度了，今次黎到門口，要排隊wo，排就排啦，冇所謂（我有想過去隔離鋪食碗粥就算的）

好快就有個店員出黎問我食咩喇，上次食過小辣，覺得湯底唔錯，今次突然覺得不如要唔辣吧，就要【唔辣嘅雲吞炸醬米線】吧～

應該係我只有一個人嘅關係，話咁快就可以入坐了，坐低等等，等等，等咗大概10分鐘左右，米線上檯了，今次我特登叫咗兩樣唔辣嘅配料，想好好咁試清楚個湯底的，飲啖湯先。。。。。。點講呢。。。唔係好特別，有酸菜嘅味道，我要咗炸醬，所以有炸醬味，但差咗少少野，差咩呢。。。回想起上次嘅感覺，小辣其實唔係好辣，純粹係用黎吊味而已。。。今日嘅唔辣就係差咗啲辣味呀，唔辣嘅話就好似今次咁，寡寡的，下次會醒目了～ 講下配料吧，炸醬嘛，其實就係豬肉碎，有就多啲野食，湯亦會因為有佢而更有味道，冇嘅話我相信會完全唔一樣囉，所以一定要點～ 雲吞嘛。。。口感其實ok的，唔會軟趴趴的，有咬口，味道幾得意，得意在我第一次有人加啲腐乳入去做餡嘅調味的少少姐，幾過癮幾特別吖，哈哈～ 食得過的╭(╯ε╰)╮

反正下次就知道，一定要辣，唔點食得辣都一定要BB辣，冇辣會好寡，差好遠的，啊，仲有，如果大食嘅食友可以考慮俾多啲錢加底的，今日我食到差唔多就發現唔夠飽，想加底又唔想等，最後冇加到。。。

合利粥品店 (香港仔)

我住喺九龍，一般都好少去香港島，今日落樓見到有班去中環嘅巴士，一時興起咪上車囉，之後喺中環食午飯，西環食甜品，覺得嗰邊都唔會有咩好搞架喇，就坐電車過銅鑼灣了，已經5點幾，又冇野搞，經過Sogo後面駱克道，見到有去香港仔嘅小巴。。。。。。當年我就係住喺香港仔的，好耐冇返過去，理智話俾我知時間已經唔早了，唔好搞啲咁嘅野，但我望下個天，仲好光啵，一下唔覺意就上咗車，然後。。。。“Do”嘅一聲。。。後悔了，算，反正已經成為現實，就去啦~~~ 入到香港仔我就周圍行下，懷舊一下，天黑了，不如食返餐先返屋企啦，去邊間呢。。。早就已經決定咗，記得好多年前我仲細嗰陣間鋪已經喺度，咁多年喇，唔知間鋪仲喺唔喺度呢。。。。。。去到門口，放心了，仲喺度一間好嘅粥鋪，粥底好重要，粥底煲得靚，煮咩粥都好食，咁當然。。。。。。【白粥】，就可以試清楚間鋪嘅功架了。。。

唔該，白粥一碗~
加樣咸架啦，就黎一隻【咸肉粽】啦~

話咁快就到，試啖白粥先~ 棉棉的，又有米香，唔錯，淡咗少少，加少少鹽先~ 再食，好味道 就從表面慢慢食到碗底，一碗粥煮到哩個程度，唔一定係最好，但已經冇咩好投訴了

為咗加啲咸味而叫嘅咸肉粽反而好普通，糯米口感ok，隻粽應該包得唔錯，令啲煮粽水冇入到隻粽入面，所以冇水汪汪嘅感覺，但好似冇乜餡咁，冇蛋黃，又冇乜肉，唯有靠啲醬油調味囉，但整體感覺其實可以接受的。。。早知食炒麵 一定冇失望~

老牌店鋪總會有脾氣，唔似啲新鋪咁想盡辦法令大部分嘅顧客滿意，習慣咗就繼續做落去，唔會想去改變，可以話佢地一成不變，但嗰種傳統亦係我地應該去珍惜的，我中意~~~

其實我仲加咗件鬆糕的，味道一般，口感還可以，玩下姐~

源記甜品專家 (西環)

禮拜日，冇節目，行落街，見到有車出中環，上車吧，到中環，食午飯，食完午飯，想食甜品，記起哩間，行過去，荷里活道，大道西，正街，第一次，左望右望，搵到，入去，坐低，落單，【桑寄生蓮子蛋茶】，【雞蛋糕】。。。


老格局，心舒服，人情味，何處找。。。


等，到，食，【桑寄生】香，蓮子清甜無苦，蛋有色有蛋味，舒服，但太甜，清點較好，舊區，老人多，難解。。。


【雞蛋糕】，人說軟又香，我說粗亦無香，難解，普通貨色。。。


天氣冷，一口糕，一啖茶，舒服，舒心，。。。


結賬，28，實惠，離開，滿意，窩心，亦足夠


謝謝閱讀，有緣再見

陸羽茶室 (中環)

每次放假都想出去食野，但唔係次次都有心水，落咗街，去到巴士站見到有架車直出中環，都真係好耐冇去過，咪上車囉，去到中環，都唔知去邊度好，行行下就去到蘭桂坊喇，突然想起好耐之前已經想去【陸羽茶室】，咁啱喺附近，咪過去囉。。。

入到去，見到個企堂，佢目無表情，已經覺得唔對路，咁我都要同佢講我一個人架，咁佢就帶我埋位喇，問我飲咩茶，普洱啦，之前佢就叫人倒咗壺普洱俾我，然後就叫我睇下想食乜，然後就去忙了，佢全程都冇表情，令我記得之前有食友講過，佢地記得邊啲係熟客的，我終於明白曬係咩意思了，仲親身感受到分別，見到熟客就好招呼，生客就懶懶閒，冇辦法，舊式茶樓，係咁架喇，冇完全唔理你咪得囉。。。


我飲啖茶先。。。淡淡地，冇乜茶香，連牛池灣街市後面嘅街坊茶樓都飲過佢，又係因為我係生客嘅原因？ 唔知邊個話陸羽用陳普洱侍客的，飲咗咁多年茶，我就真係飲唔出哩壺冇味道冇香味嘅茶有幾陳喇 35蚊茶錢俾啲咁嘅野我飲，唉。。。除咗歎息我已經唔想俾其他反應。。。睇下張點心紙先，1點幾鐘我想食飯，見到有3款飯可以揀，就【柱侯焗排骨飯】，再加個【蛋黃蔴蓉包】啦。。。等咗陣，蔴蓉包上檯喇，感覺熱騰騰的，攞上手好熱，咬咬，包感覺正路啦，再黎，食到蔴蓉喇，幾香啵，唔會太甜啱啱好，見到有白芝麻，感覺好真實，再咬就見到蛋黃了，唔錯，哩個包食得過，咁大個，半飽了。。。。。。食到差唔多個飯就到了，試下先。。。味道。。。點講呢。。。鹹？唔係。。。淡？都唔係。。。係寡呀！再食，真係寡！食到有小洋蔥，感覺怪怪的，細細粒嘅排骨，嗯，有好幾粒，但真係唔覺得有咩好食，根本唔好食，見到企堂阿叔擺低嘅醬油。。。你地有眼睇架啦，同份飯個感覺都唔同，點加呀。。。反正好耐冇食過一餐咁無奈嘅，上次有咁嘅感覺係去彩雲邨嘅一間大排檔嘅炒飯，賣45蚊，今次就110蚊再加一囉，上次嗰碟仲可以話大碟啲可以打發時間，今次就又細份，小氣又冇乜好食，食到好無奈囉。。。。。。另一個企堂仲問我好唔好食，好多謝有你嘅問候，但我真係唔識答你，亦唔好意思答你

埋單盛惠200出頭，我真心覺得其中嘅140蚊係俾多佢嘅，或者只係嗰客飯嘅個別問題，又或者係個別茶嘅問題，但我已經心淡了。。。食友們，真的，求其一間大排檔嘅阿姐都親切過佢地某啲企堂，我唔係話某啲人態度唔好呀，有問有答架，就係傲慢囉。。。如果唔係熟客就唔好去喇，浪費錢浪費時間架咋 但平心而論，個蔴蓉包係食得過的