甜蜜蜜甜品專門店 (尖沙咀)

和朋友晚飯後想食甜品, 本身都無諗住食邊間, 偶然之下就黎左依度~

由於要等, 係外面已經睇定餐牌, 好多款都好吸引, 實左好難選落手~

最後點左栗子批併雪糕, 黎到, 真係同睇相既差唔多~讚!!!(朋友既甜品一樣咁靚!)

味道~好味~真係新鮮熱辣~~~真係令我滿意既甜品!(我覺得好食過d咩咩雪花冰好多!) 

不過佢地仲有可以改善既地方:
如果佢地可以比杯水客人(因為食完甜野會想飲下水..), 咁就會好好多啦
另外等上甜品既時間太耐, 雖然我都明白人多, 可能無爐整, 但如果改到就好啦~又或者上甜品時間一致d, 唔好等我食完, 朋友既甜品先到~我覺得依方面可以做好d!

勝香園 (中環)

lunch 時間特意黎到依度一試招牌菜茄牛通/檸蜜多士, 先唔計等好耐先有, 淨講食物..

蕃茄湯底...好多茄膏....無新鮮個隻清香又過酸...
通粉...唔係平時茶記個d湯通質感...唔識形容...唔好食
其他配料都正正常常, 但唔係特別出色

而檸蜜多士, 我唔太喜歡隻味, 覺得平時既奶醬多/奶油多好味多了

平係算平, 不過應該唔會再黎

cafe TOO (金鐘)

第一次黎cafe too食buffet, 甫入門口就已經見到個海鮮bar係度歡迎我地~好吸引!!

第一轉我就先食頭盤, 食左煙3文魚, parma ham+哈密瓜, 仲有d沙律菜.
全部質素都幾好, 連我平時唔鐘意食沙律菜都覺得好食!

之後到海鮮, 拎左麵包蟹, 蟹腳同龍蝦. 龍蝦最好~新鮮~d肉彈口. 蟹腳我自己就覺得麻麻地, 而且拆肉好麻煩(龍蝦個d係一起就一大塊肉!). 麵包蟹, 好多膏, 真係成個蓋都係, 好正!! 

之後各式熱盤, 反而睇落一般般, 好多都無試到

日本section個度都幾多選擇, 刺身有3文魚/北寄貝/八爪魚. 北寄貝, 新鮮唔錯~八爪魚就麻麻地~另外佢地有多種sushi, 但我唔想食個舊飯, 所以都無食...

每晚7:45/8:15都會出燉湯, 好清甜, 不過都好大碗~但都真係值得一試!

另有好多人排既鵝肝牛肉, 其實食得咁飽, 出去排下隊企下都唔錯(等15分鐘到)~第一轉d鵝肝麻麻地, 第二轉好好食(睇彩數), 牛肉就一直都係麻麻地~如果係帶子就好啦~

點心, 流沙包同菜苗帶子餃好好食, 反宜小籠包就一般.

燒味, 有乳豬/燒肉/燒雞等, 但水準都係一般

仲有本身想試炸蝦天婦羅, 不過成日都比人拎晒...食唔到

而甜品有好多選擇, 真係花多眼亂, 而且好多都好好味!

cafe too d食物真係好多選擇同好多元化, 正~! 不果如果要去記得book台, 個日平日去都全場爆滿呢!

Cambo ขุนทอง (尖沙咀)

與朋友相聚, 朋友提議食泰菜. 由於去九龍城太遠, 最後選址位於尖咀既cambo.

一行3人order左以下食物share食:
泰式拼盤(細) - 每款食物都有3件(共有4款, 有魚餅/蝦餅/雞...), 3個人岩岩好. 食物呢, 炸野就真係好少話差ge, 除非凍/唔熟...依個算滿意啦, 係d魚餅辣左d

串燒沙爹半打(雞、牛、豬各2條) - 全晚最唔得依個, d肉唔好食又有d怪味咁, 個沙o爹醬好味都補唔返!

青咖哩軟殼蟹(配法包) - 之前我未試過青咖哩所以特登試下, 但淡得黎味道亦都麻麻地..入面有少少豆同唔知菜...全部無味的..法包亦都只屬一般...軟殼蟹反宜好少少, 炸得透, 味道又ok(點咖哩)

炒芥蘭 - 做得最好係依個, d菜幾靚, 又炒得惹味

最後加多3碗飯, $362埋單(連加一). 其實食物水準真係好一般, 唔值依個價. 

東橋餐廳 (筲箕灣)

平時好少黎開依頭, 都唔知食咩, 最後就選左依度食午餐.

佢地午市都有供應鐵板(不過只得一款), 價錢只係$41, 仲有湯有野飲, 好抵

今次試左既係雞扒配薯條(黑椒汁), 上黎個陣真係渣渣聲, 感覺好正~

好彩選左配薯條而唔係飯/意粉, 因為佢地d汁好少, 渣完就真係無乜汁..乾晒...
另外要扣分就係d雞扒係分開2件細既上, 而唔係一件. 如果一件大既感覺靚好多.

總結黎講, 我覺得間野係可接受, 要我比分既話, 10分入面比7分