海鮮島海鮮酒家 (西貢)

出完海最好的活動就係食海鮮...星期日好塞車, 由西貢碼頭坐的士過嚟坐咗成120蚊

玩得太攰了, 我都無去揀海鮮, 坐晌位度等食, 有驚喜仲好 (懶就懶啦!)

沙薑雞腳: 無食到, 不知如何
白灼海蝦: 肌肉結實, 新鮮爽甜椒鹽墨魚: 幾爽口, 但是日對香口嘢無乜興趣 (因為晏晝BBQ咗)蒸鮑魚仔: 無味, 浪費胃納, 又難消費蒜蓉粉絲蒸扇貝: 是日Highlight!!! 扇貝僅僅熟, 仲痴殼, 好鮮甜, 蒜蓉粉絲又好味!
清蒸杉斑: 養魚, 鞋, 哂錢!! 我只食了近魚尾部份!XX蜆蒸蛋 (唔知叫咩名): D蛋好滑但食唔出有海鮮味, 同埋D蜆無味馬拉盞通菜: 幾好食, 但我已經好飽, 只係食咗幾條
咕嚕肉 (邊個叫咕嚕肉架?!): 好唔掂! 叫咕嚕肉片就差唔多, 嚟呢D地方都係食返海鮮穩陣啦!甜橙 (送): 真係好甜!

其實呢間我都食過好多次, 以前都覺得唔錯喎! 係今次覺得麻麻地, 唔知係咪叫錯餸? 唉, 下次都係唔好懶, 搵食要靠自己!

PS 食得7788嗰時, 侍應問我地有冇渣車, 如果無可以坐佢地架車出坑口站! 服務一流! 抵讚!

金華燒臘大王 (中環)

又係好耐冇食過的食店之一!

坐低諗咗一輪先諗到食咩 (因為太多嘢想食), 叫咗乳豬燒鵝飯!超勁大碗! 2個人SHARE都得! 乳豬皮脆肉滑, 好味道, 但係燒鵝完全無味, 唔得 另外, 佢地跟飯上嗰個汁係杰身既, 同平時燒臘舖既豉油汁唔同, 我覺得好怪而且唔好味! 下次走色會好D!

一樣得一樣唔得, 咁只能俾一個OK了…

後記: 第二日再幫襯諗住俾多次機會, 叫咗半肥瘦叉燒飯, 點知又唔記得走汁!! 激死我啦! 但係D叉燒都係麻麻地, 明明記得以前叫外賣佢地D叉燒好靚少肥甜甜地帶焦香架嘛, 而家無哂嗰種感覺…

紫玉蘭 (金鐘)

好掛住紫玉蘭個黃金蝦, 約咗同事嚟食晏, 點知其中一個話佢敏感唔食得蝦, 無得食LU…

前菜: 美心的前菜, 辣辣地幾開胃
素鵝: 似乎已擺左一陣, 個皮已唔多脆, 要問佢至有喼汁, 到佢拎到黎我地已經因為太肚餓食得7788
小籠包: 水準不俗, 但當然唔及鼎泰豐嗰D啦
鎮江一字骨: 差! 又鞋又老! 桂魚薑米炒飯: 桂魚好嫩, 炒飯又乾身, 好味!雖然我都幾中意紫玉蘭坐得舒服, D食具又靚, 但由於食唔到黃金蝦, 今日叫D餸又只係一般水準, 只可以俾一個OK…

長浜No.1拉麵 (中環)

心情大靚想食返碗拉麵, 上次經過九如坊見到呢間嘢個樣OK決定一試。大熱天時, 中午要在門口等位真係好辛苦, 排隊真係唔係我專長, 等咗15分鐘終於有位!一坐低, 就收到一隻冰過既玻璃杯, 枱面有冰水, 好貼心的服務!!

貪心叫咗招牌ナンバーワン拉麵, 麵條要硬身, 湯底呈白色略稠, 溏心蛋好好味, 叉燒晌入口即溶, 麵既硬度啱哂我要求!! 好耐無食過咁有水準既拉麵!! 呢餐唯一敗筆係我太貪心, 食唔哂, 浪費咗咁好既麵同湯

鍾記粉麵店 (天后)

做完運動超肚餓, 諗住食碗車仔麵簡單D。叫咗淨餸, 有水餃, 牛筋, 冬菇, 蘿蔔+辣。水餃一般, 唔係好又唔係差, 蘿蔔同冬菇都好味, 特別係冬菇, 超大隻超厚肉! 但今日既牛筋就略為失手, 好咸 >~<加埋豆漿共$34, 咁就攪掂一餐!