一風堂 (銅鑼灣)

下午茶時間，知道銅鑼灣有一風堂分店，睇下有無人排隊先！尖沙咀實在太多人，排個幾鐘先有得食，真係排唔落。。。好彩，竟然無乜人（舖內），唔使等仲唔使迫！一坐就叫左最傳統既豬骨，仲有叉燒刈包！

等左十幾分鐘就上枱，賣相可以，不過無乜配料，望落唔太豐富。習慣上試左個湯先，（豬骨）豬⻣味好淡，同埋個湯比較鹹，飲完其實都幾口渴；麵同喺大型超市買的差不多，硬度叫的是適中，硬是可以受，但唔煙靭；叉燒係最失望，叉燒下半部份的肉質比較硬，口感不像日本叉燒。價錢大眾化，$58，環境服務及價錢定位其實是很好的。只是食物質素一般。刈包其實係饅頭夾日本叉燒生菜及加醬汁，但包的份量比料一般較多。味道比拉麵高分，醬汁少許甜甜酸酸，幾開胃，饅頭夾叉燒就沒有覺得硬既問題。若生菜多一點更好！

可能分店質素不如總店，有機會要試埋總店先！分店唔會再食。

金華冰廳 (太子)

午飯時間想食簡單一點，就想到這裏的菠蘿油及熱奶茶！！一年前吃過還真的非常回味！立刻起程！

午飯時間真的人山人海。。。不過上菜亦快。不用等位置就有位了！正值午飯時間，大多也是吃飯餐，只有少量女士跟我一樣吃個招牌雙拼！
菠蘿油上枱跟以前差不多，但牛油明顯變薄變細了很多，加上新鮮出爐的熱力，牛油只淨下在包外的 = = 儘管包依然鬆脆，面層不會碎得支離破碎，吃得輕輕鬆鬆，但沒有吃菠蘿油的感覺。。厚切的凍牛油加熱辣辣的菠蘿包才是最佳配搭！

熱奶茶依然順滑，淡奶的張力令奶茶口感厚實，不是水汪汪的。不錯！

希望即使通漲但質素可以保持！

幸福小路 (北角)

自從從台灣吃過美味既栗子撻後一直念念不忘，返到來香港上開飯網一搵就搵到幸福餅店，一放假就走來試！2：30﹣4PM會供應CAKE SET，所以三點先踏入呢度，好彩買到最後一個Mont Blanc XD 好多餅都好吸引呀！！！切開走糕，一層又一層既藝術品！外層既純栗子蓉，之後係加入栗子蓉同RUM既忌廉，再一層細小既海棉蛋糕，一層薄栗子忌廉，底層係吉士醬同埋少許朱古力面既撻底。外表很工整，而且一層蓋一層但係唔會馬馬虎虎，栗子蓉底下既依然都係光滑既忌廉層。精美！一層一層咁食，由外到內到底層既味道剛好係由濃到淡，甜味較重既純栗子蓉，似乎沒有添加太多糖份，不太甜，且有淡淡既栗子香味！次層既栗子忌廉，加入RUM酒及栗子蓉後依然幼滑，唔會油膩，而且有淡淡酒香及栗子甜味；海棉蛋糕減少整個餅既厚重感，唔會成個撻都係栗子同忌廉咁～ 底層既吉士醬其實帶少許油膩，不過尚可接受，輕形既質地同埋淡淡既味道幫成個餅解左D甜。餅底係我最欣賞既地方！放咗喺餅櫃度應該至少兩小時，但係仍然鬆脆！好脆！而且密度唔高，好似食曲奇餅咁，而唔係一般既消化餅底！所以無油膩既感覺，加上仲有淡淡剛出焗爐既牛油香！一流！對餅底甚為唔鐘意既我都好快食晒！餐配既cappuccino ﹣ 咖啡其實唔錯，當然不能對比像barista JAM那些地方，但相對於starbucks等連鎖店，奶滑尚算厚實，只是不夠細滑，雖然沒有拉花，但這個不太重要，蛋糕已經是一個很好的焦點了！

如此美點，一定要推薦再推薦！！

廣東茶居 (尖沙咀)

母親節若果正日食飯，實在邊度難搵位，所以預早一個星期訂定枱喺呢度食，因為見呢度既服務同質素似乎都唔錯。同日既兩點幾打來確認訂位，態度很好！而且還很細心解答我的問題。

可能預早訂定，所以位置很好，在門口隔離的一個小角落，完全看不見其他食客，非常有自已私人的空間！裝修帶傳統中國風，以棗紅色為主，座位寬大而舒適，餐具整潔，第一印象己經很好！價格由＄80起，六個人叫了九個餸。
貴妃雞（半隻＄160）
碧綠炒斑球（＄128）
生根豆腐斑腩煲（＄88）
黃金焗蝦球（＄95）
中式煎牛柳（＄118）
冰梅烤小骨
瑤柱蟹肉蛋白炒飯
酥炸尤魚
上湯浸小白菜

每碟既份量都很標準，不會太多或太少，以最著名既冰梅烤子骨為例，一碟都有十幾件。大約十五分鐘，陸陸續續上台。中式牛柳﹣一碟四件，每件有手掌咁大同埋有成吋厚！肉質超稔，內裡幾多肉汁，醬汁好多同好濃，味道偏鹹同埋少許蕃茄香，拌飯食一流！碧綠炒斑球﹣ 斑球無雪味，肉質幾滑，幾新鮮咁，加埋韮黃等清炒，雖然無乜鑊氣，但係入口尚算清爽，係油左少少。黃金焗蝦球﹣ 全晚自已最好之物，個人偏見特別喜歡鹹蛋。蛋黃煮到熔晒，唔會一粒粒，加上新鮮大隻既蝦仁上面，加上焗過，完全結結實實咁巴在蝦仁上面，每一口都有蛋黃既甜味同埋沙沙地既質感，蝦仁又爽口，真係又睇得又食得！呢個時候健康真係放埋一邊先！XD貴妃雞﹣比較熟，唔夠嫰滑，一般之品。
生根豆腐斑腩煲﹣ 斑腩都係同炒斑球既一樣，只係味道偏鹹；生根同豆腐都好入味，不過整個餸都比較油膩。。。
瑤柱蟹肉蛋白炒飯﹣ 用料十足，蟹肉既份量都有唔少！飯炒到一粒粒，清爽唔油膩，正！
酥炸尤魚﹣ 尤魚實在比較細小，炸出來已經比較乾身，幸好係個炸漿夠脆，所以都可以喇。
上湯浸小白菜﹣ 食左咁多肉，都需要有個菜既，呢個清清地，無乜特別。

名物冰梅烤小骨 ﹣ 果然名物，排骨先過油，帶少少脆口，內裹依然有肉汁，唔會太乾，加上個汁帶少少甜，好似咕嚕肉汁咁既～ 好容易令人食完一件又一件。

無論餸菜、服務、 環境、衛生都幾好，呢個價錢算合理！有機會會再幫襯！

Pokka Cafe (沙田)

中午來到沙田新城市既地下一樓，周圍大把食肆，唯獨係呢間有好多人喺門口等位，所以。。。趁墟！舖位都幾大，四人枱佔大約2／3，仲有幾張馬蹄型沙發，計埋有大約80個座位。我同朋友兩個人，梗係等兩人枱喇！佢只會分開二人枱或以上兩個選擇，估唔到等只係等5個號碼都等左四十五分鐘有多，相反二人以上既就比我地快好多。。。都比幾張枱既人後來居上XD 不過星期六食飯實在度度都要等，45分鐘都可以喇。

終於有得坐，我同朋友已經非常肚餓，好快就決定點以下幾樣野。沙律。意粉加埋甜品飲品SHARE食，因為見佢個D都幾大碟下，同埋呢度除左門口兩個鐵板SET就無其他套餐，所以散叫比較食到自已鐘意既。

上菜速度幾快，大約十分鐘就有沙律食！凱撒沙律超大碟，一D都唔手軟！呢個係正常大既份量，另外仲有個細SIZE既迷你版（跟兩個配料或者輕型既無肉版），配料可以揀蝦／煙三文魚／雞肉／牛油果，正常既大細可以選擇三種配料，而我地係走左牛油果XD 我好鐘意呢個沙律，一般來講，凱撒沙律既汁會好濃味同埋食完都比較膩，所以又唔可以落好多。但係呢度既醬唔膩之餘，都好夠味同埋唔會太濃味，剛剛好，可能佢既芝士落得多，加埋海鮮既配料，落相對少既醬都已經夠味。同埋我唔係太鐘意凱撒既麵包粒，佢呢度會切到好細，所以食左都唔係好覺！正！羅馬菜都好新鮮，內裡水份充足，面又有光澤，又好味又健康！！

跟住飲品先來！抺茶泡沬咖啡＝抺茶拿鐵，賣相吸引！用日式既茶杯裝住，上面用打實既甜忌廉加綠茶粉做裝飾，好似棉花糖咁吸引（不過無咁甜）！抺茶味超濃！入口既時候面層既地方都好CREAMY！將D忌廉攪散再飲，真係有罪惡感得來既好味道！咖啡味唔會太濃，相反係抺茶味同埋奶味較重，啱晒我自已既口味！朋友既芝麻泡沬咖啡！偷飲左一啖，芝麻味好濃！同抺茶味一樣都係好CREAMY！建議先攪好先飲，味道會均勻D，唔會越飲越濃。主茶上場，忌廉雜菌意粉。又係一大碟！
用既係幼身少少既天使面喎，意粉本身已經好夠鹹味，唔會好淋，幾好口感，比AL DENTE軟身一點。熱熱地食既時候，D汁未係好上到D意粉，不過因為意粉夠味，加上雜菌既味都幾濃，所以即使白汁唔出味都己經好夠味。凍左少少，白汁更‘結’身，上到D意粉，一齊食又係好CREAMY既口感（本人太喜歡CREAMY了。不過食完太膩就好怕。。。）最緊要係無論熱食凍食都唔會覺得食完會有一層‘油膩’既口感留喺個口度，正呀！

甜品亦係呢度必點之物！餐牌上林林總總既都非常吸引！最後揀左抺茶TIRAMISU！一面係紅豆朱古力雪糕餅，另面係抺茶tiramisu。先講紅豆朱古力雪糕餅，餅底好硬，比較油，硬得來唔鬆脆。紅豆朱古力雪糕，朱古力味好濃，其實都幾好食，不過呢個雪糕真係食完有‘油膩’既感覺，所以食幾啖就放棄！抺茶tiramisu我覺得比較似custard，至少我無乜食到芝士味同埋佢既口感係黏黏地，似bread papa puff既custard咁，不過會再‘結’身，食落都係好濃既吉士味，奶味唔重，所以食完無膩既感覺，中間底部有少許清蛋糕（唔係ladyfinger+espresso = =)，至少呢個同我想像中既抺茶tiramisu有點距離，下次會試新野唔會encore呢個。但係總括都係幾好味既～

其實我地兩個食SALAD＋意粉已經好飽！可見呢度D野幾大碟同埋幾好味，餓住入來捧住個肚走XD 必要再ENCORE！～

對於我地唔係好吸引既SET LUNCH，不過其實幾抵食。食完見到TEA SET！都好吸引呀！