力奇四季火鍋 (已結業)

大大話話聽過大角咀呢間力奇火鍋店既大名好耐架啦，不過一直冇機會試過呢一間嘢，今日難得同幾個知己朋友黎大角咀，最終有機會試一試佢個豬骨煲湯底啦😝😝用豬骨熬成既湯底超級濃，勁香，加埋蓮藕蕃茄，粟米南瓜，節瓜等等嘅蔬菜，真係令人欲罷不能呀🤤🤤 一般嚟講去打邊爐，我都好少飲果個火鍋湯底嘅，不過呢個火鍋湯底濃郁鮮甜，蔬菜的鮮味入埋個湯底度太好食啦，所以我又唔覺意就飲咗白碗以上。一煲$350 四個人都食唔曬，強烈推薦大家大圍黎試一試啦，相信你都會愛上呢個火鍋😆😆

今日收工同朋友慶祝生日嚟到呢一間力奇火鍋！晚上時間餐廳都好多人，好彩我哋有book枱，唔使入到去冇位！確認咗Booking之後好快入左去！😍唔使係出邊等得太耐，都非常好彩！比較鍾意食佢嘅珊瑚蚌，每一件都非常爽口彈牙，而且帶有鮮味！咬落去仲有少少卜卜聲嘅感覺，非常脆！而且唔會有腥味，餐廳嘅處理嘅方面都做得唔錯！另外朋友都大讚佢嘅藥膳湯底，湯底嘅味道非常濃郁，配搭所有食物都非常夾，而且食完唔會要飲好多水，味道都可以 牛肉同埋餃子就冇乜太大特別，都係普通打邊爐嘅質素 overall用餐過程就OK嘅！

地點位於大角咀嘅食街嗰條十字路口極多食肆不同菜式都有日本菜，打邊爐，港式小菜一大班人打邊爐最好不過係一間香港地道火鍋店沒有華麗裝潢食財新鮮大件夾抵食沒有話你裝潢，甚至係簡陋裝修洗手間衛生尚可接受😂豉油，蒜蓉辣椒配料，由自己出去外邊配給的不過重點係個湯底首先上枱個個都嘩咗一聲，因為未見過咁豐富材料的湯底新鮮豬骨大嚿湯底有睇頭粟米蕃茄湯清得尼好入昩配料好食，牛肉新鮮性價比極高最適合一大班人暢飲慢慢食

一行四人約出去打邊爐，諗住打電話去訂位，打咗一日都打唔到。餐廳雖然喺舖頭入邊，不過係大排檔格局，冇裝修，坐圓枱圓櫈。食物好大碟，不過佢個價錢已反映。所以唔會抵咗，只係冇得選擇細啲，比較適合一大班人，唔適合兩三個人。佢唔係精緻路線。更加唔係抵食夾大件而係貴夾大件。食材新鮮有質素，這個是真的但衛生情況有待改善，尤其是預備食材的位置，都幾凌亂同埋唔衛生。湯底勁咸，所以不用再點任何調味料。牛肉靚，新鮮雲吞一碟有成打，所以兩個人千祈唔好黎，最好6個以上，先至可以試多幾樣嘢。雞都靚。仲有食其他嘢，人均消費$400 （喜歡看我老實食評請點個❤️和追蹤我看更多餐廳介紹。）總結：食材新鮮，但坐得唔舒服，環境又唔算企理乾淨，咁嘅價錢打邊爐有太多其他選擇，唔會刻意再來。不過佢容易有位，不限時，多大枱，真係一大班人又唔計較環境都可以一試。

分量超多嘅豬骨煲，本身配料都已經很多，除咗豬骨仲有豬手喺裏面，建議四人以上先至好食你個鍋。唔知裏面咁多配料，所以另外嗌嘅食物都食唔晒，離開嘅時候已經飽到不得了。環境比較舊，衛生程度還好 ，食物質素都唔錯。

第一次嚟力奇，朋友已食過無數次，所謂基本上全由佢拍板介紹，佢講明依度碟碟都係重量級，包我睇到目瞪口呆。果然湯底一嚟到我已經呆左，豬骨煲湯底d料根本食完就唔洗再食其他嘢了，d料多堆到山咁高滿瀉咁滯，有多條帶有骨髓既豬筒骨同煮到淋晒極多膠質既豬手都非常好食，食左一陣已經要將大量既料畢去空碟先有位開始真正既打邊爐。湯底好濃郁，食物完全不需點醬油已好夠味，就咁飲湯底味道偏甜，但用嚟灼食物味道卻剛好。鮮牛肉肉味極濃，好少食火鍋有咁高質素既牛肉，份量亦多，必點推介豬潤切到又薄又大片，味道濃郁粉嫩，喜歡食潤既都值得一試魚膘同鮮墨魚，新鮮好食，不過已食得太飽，只淺嘗一兩件，無太認真去品嘗超巨型虎蝦，應該係1kg 6隻嗰d珍寶size, 雖然極大隻，但急凍貨始終差少少，不太推介

同屋企人去睇故宮，見到乾隆一年食二百次邊爐就即刻想食，咁就睇完去朋友推介嘅力奇試試佢啦-首先緊係嗌佢嘅招牌招牌豬骨煲 $350本身覺得幾貴，但來到勁足料，根本唔洗嗌其他蔬菜，仲要又有好多豬骨同雞腳，食到阿媽好開心。同埋啲湯味道又真係幾濃幾甜，我會掛住的。不過點都要嗌下菜嘅，仲有牛丸果啲，味道正常啦但普通偏貴偏大份，多人食可以，但得兩個就唔建議啦肉方面，嗌咗本地鮮牛肉同羊肉，冇咩特別，下次都係試試佢嘅肥牛好似仲吸引仲有蝦滑墨魚滑，唔錯！值得叫，同埋都大份最後，隆重推介，桶蠔！真係好肥美！！食過一定返陳味，如果可以生食一定勁正，冇乜食過熟嘅蠔，食過哩個先發現原來熟嘅都好好味！不過呢，哩到環境係真係嘈啲，衛生都真係比較差，仲有見到有隻細甲甴爬到上枱：0應該唔係個個接受到

以前成班人一齊嚟好開心. 而家可能唔憂做, 啲嘢慢到一個點. 7點嚟到, 坐到8點半, 一碟肉都上唔到.叫左魚片, 肥牛, 牛展, 講真全部基本野. 坐到成家人都唔想食了, 都仲係一碟都未上. 問個伙記, 佢話其他係老細啲fd, 所以上左先, 叫佢催佢話冇辦法.其實本來就係冇service又污糟, 但諗住大件夾抵食就冇所謂. 但慢慢啲野愈來愈貴. 細肥牛都$288, 普通湯底都過百, 咁都算. 而家連肉都唔上, 又冇人理你. 叫支啤酒都真係15分鐘先到, 仲要唔凍嘅. 再鍾意食都唔返嚟.

首先讚下個湯底先，蕃茄粟米豬骨湯底，一嚟到超大兜，勁足料，粟米甜，豬骨入味，湯底好飲。其他食物都唔錯中規中矩，每一份嘢食都相對較大份，好抵食，桶蠔同肥牛算係最正最好味。鐘意打邊爐既值得一試！

以前有食開，都叫食咗十幾年，食物質素叫ok，性價比係高嘅。但疫情後兩年幾無嚟過，今次再嚟，完全唔掂，沙嗲湯底變晒味同以前食完全兩個味，無沙嗲味，仲要帶酸味，豬骨煲還算能保持水準。食物質素還算可接受。當晚爆場，已有心理準備食物會遲上，朋友大家都會明白接受，到最後有兩碟食物無嚟，時間都夜我地都算唔等叫賣單。Check單後發現原來一碟無落單，一碟有落單但無嚟，咁同老闆講話無嚟叫取消單，但有員工話好記得有準備過呢碟菜，另一個員工話好記得有送過呢碟單，老闆話會唔會上咗菜但你無食到所以以為無上呢碟菜呀？我即時被老闆呢句説話辣㷫，我呢碟order六點幾就落單，等到十點都無嚟，我成晚最想食，我真係會唔記得？成張單二千幾蚊，有叫海鮮，有叫牛肉，我話老闆你講嘢可唔可以經下腦？我呃你都唔呃你碟$150嘅三色手打丸，呃都呃你貴價海鮮同牛啦，我地一行8個人都無食過，你可以咁樣講説話？最後老闆女兒話唔好意思都有減返，但我同朋友話呢間店以後都唔會再嚟，質素下降，服務差，環境嘈又迫，可以永久不來，完。

已經好幾年冇食過力奇，今次同朋友聚會，決定再訪呢間非常地道嘅火鍋店👍🏻👍🏻叫咗非常多嘢食🔸豬骨煲🔸超級大隻嘅鮑魚🔸珊瑚蚌加桂花蚌🔸鵝腸🔸本地鮮牛肉🔸美國肥牛🔸魚卜🔸手打三丸🔸金菇🔸生菜🔸醉雞🔸啤酒/ 可樂佢嘅特色就係所有嘢都超級大份😂😂😂我哋最後都係食唔晒，好飽啊😂😂豬骨煲依然非常鮮甜，入面啲料多到呢🤤🤤食到咁樣，最後埋單都係每人三百幾蚊😂😂😂抵到不行啦👍🏻👍🏻

突然又凍番少少….再黎懷緬火鍋系列🐒·力奇火鍋算係最深刻既火鍋店😂環境真係幾麻甩，同朋友打邊爐講野需要叫出黎先聽到😂不過都係一種氣氛黎！食物方面樣樣都勁大碟😱隻碟大之餘，食物size都好大同埋疊到好高！湯底勁足料，唔知以為煲緊湯😂·整體黎講，食材新鮮量多價錢唔算好貴，岩哂一大班麻甩朋友一齊🍻開心聚～不過環境服務真係唔好期望太多，有潔癖既朋友唔建議啊🤫•📍 力奇火鍋大角咀角祥街53號地下

天氣開始凍，就約埋班朋友去打邊爐。真係未嚟過呢間，去到先發現原來呢度係出名大大碟。見到人哋湯底係一大煲，就跟住嗌咗個豬骨湯底。豬骨湯底一上菜都不得了，豬骨湯底入邊有好多豬骨同蔬菜包括蕃茄蘿白，基本唔使再叫菜。但係略嫌味精太多，豬骨味唔重。打邊爐餸底全部都好多，所以見完半份半份叫。一份蠔$100醉雞幾入味個人鍾意食魚撲，見到即刻叫。整體來講味道一般，但勝在大件夾抵食，適合一大班人過嚟打邊爐，夠熱鬧。

細個時已經比屋企人帶過黎食.印象係大大鍋豬骨鍋底.如果兩個人黎基本上都叫唔到其他配料咁利！今日就約埋幾個朋友黎到力奇，先點個豬骨鍋.鍋入面查身有豬骨、豬筒骨、雞腳、蘿卜、南瓜、粟米及芹菜等等….豬骨、雞腳煮到好林、蘿卜南瓜煲到入哂味！粟米超甜..要額外再叫一碟！另外仲點左以下配料肥牛搭到成座山咁，油脂唔多但入口唔鞋桂花蚌新鮮爽口又彈牙..好正！自家製雲吞水餃包到大大粒、中間隻蝦都唔細架！鍾意入面有好多木耳呀！響鈴吸收哂啲豬骨濃湯，入口即化！新鮮鱔片及脆骨腩非常脆口彈牙！最後點埋西洋菜、生菜及唐蒿菜、南瓜等等..真係食到個個都捧住個肚走….哈哈提提大家呢度叫野係係冇價錢同埋真係超大碟..想食多啲款可要求雙拼呀！飲品都係啤酒汽水以及自家製飲品等等！

成日放工想打邊爐 之前過嚟食過，覺得好好味，今次再encore。輪食物係好食，每次過嚟打邊爐都覺得好抵，因為樣樣野都好大碟，淨係睇個煲都已經飽一半，番茄蓮藕粟米豬骨湯底，鮮甜又好飲。不過論服務就冇乜㗎啦，係自助形式，自己出去拎碗，碟，筷子，基本上啲侍應都忙到踢晒腳，都冇時間理我哋。不過依啲類似大排檔咁樣嘅鋪頭，我對佢哋服務都冇乜特別要求。好食就OK。同埋環境都有啲嘈，個個講嘢都好大聲🤣所以同朋友講嘢我哋都要嗌出嚟先聽到。每次去都好多人，生意都好好，如果想去嘅朋友記得打電話去book位先。