泰之味 (已搬遷) 新店位置

相對其他九龍區市政，呢對啲枱比較闊偌。星期五晚6:30左右，見呢間又中又泰嘅食檔仲有幾張吉枱，甫坐低，老闆娘即拎大碗熱到極度燙手嘅熱水嚟俾我洗碗碟筷子，本身啲碗碟都非常乾淨，所以只係循例沖一沖，餐枱有廁紙提供。叫咗幾味：串燒雞豬各半打，唔燶，雞肉有香茅醃過透出香味，可惜豬肉就出事，其中一串中間嗰舊唔熟，另一串成串都未熟，唯有叫燒烤位師傅再翻燒未食嗰串啦。濕炒牛河芥蘭落咗好多，秀珍菇都係，牛肉片都唔少，但啲菇有輕微酸味，食咗兩塊都係唔對路要𦧲⋯⋯啲方型河粉反而變咗配角，份量太少，成碟比較似小菜。紹酒炒青口不過不失。泰式拼盤收$148但每件份量偏小，魚餅、蝦餅味道不太鹹ok，春卷都足料夠脆，就係個斑蘭葉雞卷唔掂，其中一舊太硬，全部邊角位都咬唔到。臨走飲多啖茶，竟又出事，冇咬嗰個玻璃杯嘅情況下，個杯邊居然裂咗甩左條玻璃碎出嚟……好彩冇流血爆咀……但真心嚇親，老闆娘連聲致歉。禮貌上呢間舖係好好，但真係要注意個食物嘅處理同留意易碎餐具嘅耗損喇。