帝樂 - 德國餐廳 (已結業)

由於上個月港鐵送左幾張coupon，係個list到見到呢間餐廳，所以就叫埋朋友一齊試。環境真係滿分，裝修係靚既！唔知點解餐廳入面既餐牌同外面價錢係有少少唔同，入面呢張係貴啲。。。不過幾蚊就無研究咁多。我地叫左扒澳洲西冷牛肉配燒薯角，同埋香煎意式薄羊柳配野菌意大利飯。先睇睇自助沙律吧，選擇唔算好多，不過每樣野都新鮮，仲有啲應該係德國既醃漬物？未見過，好新奇，都幾好食。好似係椰菜花忌廉湯？我覺得佢調味岩岩好，唔會太咸，又有些少椰菜花味。牛肉質感還可以，不過唔重牛味，同埋個汁好咸，有啲失望，而且有一舊好多筋。薯角唔同平時食開個款，還可以。呢個羊肉膻味適中，唔鐘意膻味既朋友都絕對接受到，不過煮到全熟，變到好鞋。佢個意大飯質感可以，但係真係好咸好咸好咸。。。甜品係好簡單既士多啤梨乳酪味mousse。可以解一解岩岩既咸味。。。整體黎講，雖然環境好靚，服務都幾好，但係又唔便宜之外，野食又未達到我既期望，雖然拉勻未需要差評，但係我都唔會再食第二次了。