豐明苑粉麵燒腊茶餐廳 (已結業)

以前大學時期食開嘅豐明苑，已經六七年冇食過，以前質素唔錯架，係我同一班同學食早餐嘅老地方。下午茶時間經過尖東諗住試吓個西多士，價錢已尖東區來講算中等， $35一份西多士配飲品，凍飲加$3。另外我哋仲叫咗個墨丸麵（$38 ）。平時叫一碗麵，通常唔使3分鐘就會送上枱，今次足足等左5分鐘有多，分西多士嚟咗碗麵都未到。先講西多士，呢份西多真係好令我好深刻，以後一定唔會再食！首先，西多士係充滿着油益味；第二,炸麵包內裏非常淋pat pat，明明兩塊麵包，但係一入口係全部溶作一堆，一入口已經濕濕哋。第三，麵包中間係無乜花生醬，又或者可能有揸花生醬已經比啲濕嘅麵包融為一體。整體來講完全冇味，冇口感，淨係知自己食緊一堆油。個西多士嚟咗，碗墨丸麵先至嚟。可想而知碗麵係煮左幾耐啦，結果都不意外，幼麵煮得非常淋身，適合冇牙嘅老人家食。鹼水湯底無味，唯一抵讚嘅係每碗跟左兩舊蘿蔔，蘿蔔係入味嘅而且冇乜渣，好可悲呢兩舊蘿蔔就係成餐飯最好食嘅嘢。凍檸茶一啲茶味都冇，甜到過火。除咗冰嘅份量控制得好之外，我冇乜嘢可以讚到佢。買單$76 ，我淨係食咗兩舊幾好味嘅蘿蔔，抵唔抵食你哋自己諗啦。