麵家山下 (已搬遷) 新店位置

第一次難食到要上嚟寫食評。之前都有食過佢嘅拉麵，覺得不過不失，一排無食，見佢新出咗沾麵，滿心歡喜諗住去試吓。同以往一樣樓下俾錢，再上樓上等開餐，等咗十分鐘左右已經上餐，上餐速度正常。講返食物質素啦，個沾麵一上枱我已經即食，個湯頂多係叫暖，甚至可以講係涼咗，連佢上面嗰啲魚粉都溶唔到。味道上可以話無味，好似用佢自己個拉麵湯底溝生粉水整出嚟。再講就係叉燒，唔知點解都可以係凍嘅！麵方面就同佢拉麵嘅麵質一樣。總括而言，第一次係香港食到咁差、咁低質嘅沾麵，竟然仲可以賣到90蚊一碗，亦都極之失望，估唔到一段時間無食，食物質素可以差成咁，再次強調90蚊一碗！夠膽拎呢啲質素嘅食物出嚟俾人食。