心夜來潮 (已結業)

深夜來潮，總會有時侯係好想打下冷食下小炒。打冷首選緊係蠔餅 $86份量好夠，蠔仔都好多。最緊要係炸到成個都脆卜卜！連中間位都脆唔係腍架😋醬滷鵝腸 $58每條腸都肥嘟嘟，每啖都食緊一堆脂肪咁，不過夠邪惡夠爽，碟底有成堆芽菜平衡返～茄子豆角醬炒豬頸肉 $88一上枱已經好香，好夠鑊氣，茄子腍腍地好入味，豆角仲保持到爽脆！豬頸肉冇得彈呀，每一舊都大大舊，入口油脂爆發，配白飯一流！泰椒啫娃娃菜 $68好似好少會係食娃娃菜煲，平時都係通菜呀芥蘭咁，點知原來娃娃菜先係大佬級呀！每條菜都索哂辣汁，直程好似打邊爐咁，依個大推！砂鍋卜卜蜆煲 $168一上枱心諗，點食得哂呀！！每一隻蜆都好大，同我地認知既卜卜蜆好唔同，而且幾乎冇乜冇開殼既蜆！除咗蜆仲有好多粉絲係底，同埋粟米、金菇、蔥、等等嘅蔬菜，好抵食！不過重點係個湯，個湯十分清甜，當全餐都係比較重口味，油膩感十足，飲返碗清湯即刻解晒漏，又可以再食過！呢度位置好就腳方便，而且裝修同座位都舒適，同一般打冷店係比較麻甩嘅形象好唔同，唯一唔好係當晚冷氣比較大。但當你深夜突然想食個蠔餅，炒個蜆，依到係不二之選。