白玉蘭 (已結業)

今次和老婆一家人，和外母祝母親節，佢地book左去ifc食飯，我心諗，咁豪？ifc食飯一定好貴啦，不過我無問，因為外家食飯，係老婆和幾姐妹夾錢，我去痴飲痴食就唔咁多啦。哈哈。。。入黎黎個環境都唔錯，坐得幾舒服，每一枱都隔得幾開，唔會好似酒樓咁迫迫夾夾既感覺，呢度叫白玉蘭，黎到ifc三樓，入到辦公室電梯大堂，再行入小小有樓梯，上一層就到，都好易搵。除左個環境之外，坐底Ｄ骨碟隻隻都唔同，幾得意。我地叫左北京填鴨，幾好食，除左正常咁食，佢地都提供二食，即係片完Ｄ皮出黎，個鴨身斬件再拎去炒一碟餸出黎，但係我地都叫左幾多野，所以選擇斬件打包拎走。要講一講個小籠包啦，皮薄餡靚，入面Ｄ湯汁又多，又濃味，好好食，唔點震江醋都夠晒好食呢個鳥巢，其實係咕嚕肉，炒得夠香又夠味，好好食。驚住唔夠食叫左個上海粗面，雖然我食開乾炒，而佢係濕炒，都係好夠味，面亦軟硬適中，唔錯。其實我地都叫左好多野，不能盡錄，不過埋單原來都唔洗二千蚊，我地十大三細，剩係計大人每人都係兩百蚊，又唔算貴，而且Ｄ餸精緻又好食，下次母親節真係可以諗下ifc，出面Ｄ酒樓都唔平，起碼呢度坐得舒服又唔迫。