順記 (已結業)

自從冇出現喺屯門醫院之後， 就再冇食過順記嘅胡椒豬骨湯底米線， 猶記得胡椒豬骨湯底胡椒味相當突出， 口感辛辣， 令人一試難忘。 難得經過屯門， 就介紹呢間我認為可以媲美譚仔嘅米線俾 K先生。呢度嘅胡椒湯底豬骨米線，配料有粟米、豬頸肉、同生菜， 如果唔貪心， 其實食一碗已經夠飽， 不過今次就叫埋招牌嘅求其豬扒。胡椒豬骨湯底質素keep到，胡椒味依然香濃。 配料粟米同豬頸肉嘅份量亦唔少， 豬頸肉唔會太肥。至於求其豬扒即叫即炸， 食辣熱辣辣， 夠曬香脆，不過就嫌鬆肉粉落得太多， 食得出有梳打粉味。K先生食過後都大讚， 如果食酸辣米線食得厭厭地， 胡椒豬骨湯底絕對係第2選擇。