Agura東京ラーメン (尖沙咀)

買完羽毛球拍，同行朋友去打邊爐前有半個鍾想搵間小店飲杯野，誤打誤撞行到呢間拉麵店
記得有睇過食評係新店而且評價唔錯，我冇份打邊爐既當然想試，難得朋友都唔怕太飽肯陪我
當然要試下啦!

店面一眼睇晒，打長有十個位左右，兩位男師傅0係open 既cooking station 煮麵(一位日本人一位香港人)，一位好有禮貌好甜美既小姐0係店面負責照顧客人
入去時都係7點未夠，入面有4位客人，我同朋友唔使等! 我地入坐同時有一位男士入坐，"甜美小姐" 立即奉上綠茶，又提我地枱下面有勾掛袋，好細心，三位客人一次過入坐都照顧得唔錯呢

餐牌好靚，一打開有日本師傅既介紹 (第一頁係日文，第二頁至係中文)，因為好心急叫野食所以冇仔細睇，只係記得介紹入面有師傅個0麥頭，好認真
心急係因為聽到 "甜美小姐" 同旁邊0個位男客人講話只係賣剩3款麵!!!! 得番特濃魚介豚骨 或 魚介豚骨鹽味湯拉麵同魚介豚骨沾麵。而且仲係得細，唔可以揀大。點解咁得意? 原來係因為叉燒唔係好夠，所以只供應細份量。結果我地揀左細既魚介豚骨鹽味湯拉麵同魚介豚骨沾麵。

搞下佢d 辣椒油和黑椒酒，飲下茶，五分鐘左右已經有得食喇
湯拉麵先黎。好香呀!!

麵既湯唔係話好多，0岩0岩浸過d 麵，上面有一塊長長既叉燒、一塊紫菜同一小塊鳴門卷
我快快手影相時朋友已經偷飲左啖湯，吐出一個字，濃!
三兩秒之間"香港人師傅" 已經問: "好唔好味呀?" (可以睇到佢係好緊張出品同重視反應。而且0個一刻好似0係屋企食飯咁，其實係好窩心)

沾麵之後都到喇。碗湯上面有d 啡色粉未溶我就攪下佢，"香港人師傅" 就話係 "咖哩" 黎架要攪到溶至得如果唔係會好咸
我忍唔住叫左出黎，"咖哩"?????
哈哈，"香港人師傅" 更正我，係 "魚介" 呀
其實落order時都唔知咩係魚介，"香港人師傅" 好細心咁介紹: "魚介係用幾種日本魚磨粉"，因此成本好貴，不過成品味道會好濃好鮮但又唔會好似坊間0個d 一味死咸
明白喇。飲一啖湯拉麵既湯，果然係好濃郁，面有一屠薄薄既油(可以接受而且好香)，豬骨味過左之後有一陣好鮮既味道做結尾，好特別、有層次!

麵條係較為粗身帶彎既，色澤帶黃，冇鹼水味但非常有咬口 (合我口胃!)

叉燒薄薄一片，上面有少少黑椒粒。完整唔散但軟熟得可以用筷子輕易分開﹔肥瘦相間，豚脂令叉燒味道好好，而且有d 焦香 (後來至知原來真係火槍灸過)。一塊長長叉燒，珍而重之咁分成3小片分3次食，好好味!

沾麵麵汁既味道更濃(應該係因為額外0個d 魚介吧)，麵同湯拉麵係用同一種麵，分開用碟上，條條分明唔會痴埋一舊
朋友因為有下場，只係食左三入一就忍痛俾左我完成 (哇卡卡卡)。好味，一條不剩!

我地都話睇下到最後會唔會offer 我地加d 昆布湯飲埋個沾麵汁 ... 不過冇喎，"香港人師傅" 見我食完就收左個碟啦
(題外話: 上個月0係京都食沾麵，會有昆布湯俾你加，麵汁係用小砂鍋載住，每枱有個IH 爐仔，俾你加湯之後可以原個砂鍋加熱番黎飲，0係冷天時真係好讚! 又有綽頭又有實際，香港既沾麵店都可以試丫)

半個鐘左右就食完喇，好味、而且好愉快。
"日本師傅" 冇出過一粒聲，只係好認真咁0係度煮麵
"香港師傅" 係店既PR 肩負問客人意見、介紹食材既重任。佢都有介紹限量二十客既蕃茄麵，仲話最好之前0個晚打去 .... 我即刻話咁好，有得預訂? "香港師傅" 笑笑口咁話: 最好之前0個晚打去 ... 問下第二日有冇(因為意大利蕃茄來貨問題)
"甜美小姐" 就負責greet 客人、介紹menu、take order、加茶、收錢
一間小店，幾款麵，三個人，看得出既默契，賞得到既認真。謝謝。

之前呢度附近有一間拉麵小店，味道也不錯，可惜結業了。希望Agura 可以長做長有!

今朝睇番其他食評至知原來每天只限定做50-60碗拉麵! 咁我地尋日都算好好彩!!
心思思又想再去，想認真咁睇下佢個餐牌!

小小意見: 食食下有一刻覺得個魚介有d 似靚既蝦籽味，哈哈。另外，朋友同我都有少少出奇兩個麵既湯/汁都唔係好熱 ... 對我們來說，食物既溫度太重要喇，如果可以改善一下就完美喇

中國芳 (葵芳)

大約十年前，當中國芳仲喺九龍灣德福時，已非常喜歡佢嘅小蔥蛋炒飯同黃金蝦。後來執咗開咗利苑，失落咗一輪。

幾年之後，知道葵芳新都會開咗間中國芳。當食到佢嘅炒飯，就知係同一間店。真係有種失而復得嘅感覺
呢兩年AE 白金咭都同美心集團推優惠，二人晚飯全單半價，呢度成為咗我同另一半嘅飯堂。

星期六晚分兩輪，幾前日卜咗六點，但結果當日下午打去話改食八點半嗰輪。okay，不過經理話都可能要等一陣。冇問題。
八點八去到，即刻可以入座，坐卡位，好舒服而且冇大廳咁嘈，不過張枱細啲。

我地都肚餓，好快就揀定食咩。因為半價，有時會嗌啲貴價餸好似海參龍蝦咁，不過今次想食松子黃魚，另外仲叫咗茶樹菇浸翠苗，百頁結紅燒肉，排骨湯麵。

好出奇，等咗半個鐘都冇嘢食，平時好快㗎。問經理，佢話唔好意思，因為廚房九點會清洗一次。我地講笑叫佢請食糖水，佢笑而不語 但另一半過後又講得好啱啦: 你做兩輪第二輪係八點半，九點洗廚房?

九點半左右有得食喇，仲好快上齊晒添。松子黃魚 - 新鮮，汁唔太酸，有雜菜粒同松子仁。不過今次明顯細條咗好多。對兩個人食飯嚟講係好事，食得晒，我連魚頭都食埋，好味!

茶樹菇浸翠苗 - 鍾意食菜嘅我揀嘅。菜清得嚟有菇嘅香味，啖湯好味! 我地後尾用埋嚟做湯麵個湯。

百頁結紅燒肉 - 我係上海人，屋企成日都整呢味。但都要講佢整得好好。百頁結好軟身，但有豆味，出奇的討好。豬肉肥瘦相間，非常軟身入味。連小棠菜都吸晒啲肉香同醬油味，令討厭小棠菜嘅我都讚好!

排骨湯麵 - 麵湯底夠清，但硬係唔係好熱。排骨(即豬排) 就好好喇，蛋黃沾薄薄嘅漿粉去炸，好香又唔油。

食到一半經理收工，臨走同我地講慢慢食，已交帶一個同事送上糖水。hurray!!!
食到好飽，打包埋紅燒肉第二日食，埋單二百五。真係好抵食!

好多嘢都唔錯。唔係啲咩好特別嘅嘢，但作為家人晚飯，確實係坐得舒服而食物又唔錯嘅好選擇!

Nova (荃灣)

Nova靜靜的坐落於灣景花園與34M巴士總站之間，一幢小商場的地面位置(地庫是保齡球場及另一家中式快餐廳)。不單遠離荃灣市中心，就算我每個星期日在附近打波，都不曾察覺有這麼一間精緻的小餐廳。多得開飯及一班有心食家的無私分享。

星期五，下雨的晚上，兩位訂了七點。坐下時問店員預留餅櫃甜品，店員還戲稱「唔係咁多人」，但轉眼已full house, 後來還有人要在book corner睇住雜誌等位。幸好訂了枱

非常年輕的店員帶著童真的笑容，招呼我們坐下。店呈開放式，圓形的繞著中間通往地庫lane場的扶手電梯而建，可能是因為極高極高的樓底吧，環境隨意但感覺舒適，而且不會過吵。

坐低後發現客人以自助形式在店中(亦即open kitchen 所在地)點菜，付款，之後店員會送上食物。晚餐套餐選擇寫在水吧旁大黑板上有沙律同湯，主菜有三個選擇: (1) 封煎豬脊 伴 沙律及煙肉炒薯角 $158; (2) 香煎海鱸 伴 紅花意大利飯$168 ; (3) 肉醬千層麵 $忘了價錢。另外包一杯餐飲可選花茶，咖啡，或汽水。

肉醬有牛肉，我們不吃，所以我們打算叫(1)及(2)。落單前發現套餐以外還有a la carte items可供選擇。好想試homemade pasta, 但又喜歡 jamon 同homemade pate 。樣樣都想試呀~ 結果決定叫一個晚餐，另外叫一cold cut platter, 放棄pasta寧願之後再叫甜品。

跟餐沙律先上: 沙律有三數小片沙樂美，菜夠新鮮，不帶多餘醬汁，只靠碎碎的芝士粒輕輕的調味，香得來不油膩，好味! 份量也夠，分著吃都好滿足!
吃完沙律後一會才送上餐湯。? 兩碗餐湯? 原來餐廳已細心為我們將湯分成兩碗。偷望鄰桌，發覺份量相若。想必餐廳大方地酌量加大了餐湯，真高興! 西蘭花餐湯溫度夠熱，綴以一抹忌廉，濃香而不帶一絲草青味。P 吃到湯中有parmesan，加上夠熱餐廳又細心大方，喝得非常滿意!
Platter $118
想食但又掙扎，覺得是現成嘢試不到餐廳手勢。不過見入面有自家製士多啤梨桂花果醬同自家製豬肉醬，好，試!

份量慷慨，擺盤漂亮。有四款肉，青提，自家製果醬，有法包。法包好香呢，一摸，原來烤得溫熱香脆! 正想開動… 豬肉醬呢? 問店員，卻換來一位年青廚師出來解釋，原來豬肉醬賣完，餐廳已將火腿等份量加大作「補償」。年輕廚師親自致歉，誠意十足﹔而我們雖然覺得有點可惜，但並不介意。不過後來見到年輕廚師又出來向其他客人解釋，不禁想﹕落單後如發現欠缺材料立即通知客人可能會簡單直接得多，始終有些人可能會不滿意這樣「先斬後奏」的安排嘛。坦白說，如果一早知道沒有豬肉醬，我們可能這會改試自家製意粉了。四款凍肉水準一般，始終一分錢一分貨啦。不過烤熱了的香脆法包為菜式加了分，結果在等晚餐主菜時邊聊邊吃，很快就清盤了﹗

可能人比較多，上菜速度不算快。不過我們不趕時間，餐廳環境舒服又夠空間，談東談西，心情反而放鬆起來。主菜到了! 果然沒令人失望，擺盤很精美呢。三件不小的油煎豬脊肉傳來燒豬般的香味，香脆但碟上不留一滴油漬! 散叫的話有一味油煎封五花，所不同的大概就是肉的用料。豬脊肉比較瘦，但一點都不硬 (根本不用刀，用叉就可輕易將肉分開﹗想不到吧﹗) 瘦肉的地方煎得很香很香 (但一滴油都沒有﹗)，咬下去表面香脆﹔肉中心也帶有一點脂肪，香口油潤。如果放涼了吃可能真的會變硬，但趁熱吃真的很好吃，完全想不到看來乾柴般的瘦肉竟然如此可口，實屬意料之外﹗(配有的檸檬蛋黃醬少少酸，很滋味，不過我覺得不用點醬已經好好味)伴碟的不是例行公事的一堆飯或意粉，而是三種菜蔬﹕加了橄欖油輕烤過的藤茄 (好落本﹗)、菜沙律 (似餐前沙律)、煙肉炒薯粒。本身不太好薯仔，但薯粒炒得香口不粉，加上咸咸的煙肉，吃得乾乾淨淨﹗大家都覺得餐廳用料不吝嗇，菜式配搭認真而處理得恰到好處。最讚的是食物的溫度控制得非常好。吃到此時已經好飽，但我們都興致勃勃，急不及待要繼續甜品環節。跟餐有餐飲一杯，咖啡精的我此時想更進一步的「探過虛實」，決定要熱朱古力做餐飲，看看又會有甚麼驚喜 (貪心的希望會渴到西班牙式的香濃熱可可，哈哈)。

走到收銀處落單，噢，原來跟餐的餐飲只是「普通的」熱可可，加$30 才會有特濃熱朱古力 (是以Valrhona 朱古力粒溶製)。很吸引呢﹗不過怕太飽，還是留待下次吧。結果改要了skim cappuccino。甜品則從蛋白批配一口茶 ($48)、心太軟配焦糖香蕉味雪糕 ($88) 及 草莓mille-feuille ($78) 中選了最後者。差點忘了，我還貪心的要了一個mini apple tart ($8)

咖啡先上，印有店名的杯設計簡單討好。之前的食評評過咖啡奶泡打得不夠細緻，所以也不帶有很大期望。不過我這杯咖啡打得唔錯呀﹗奶泡夠密夠挺，是可以更細緻，但skim milk不易打，確實是合格有餘。咖啡base 夠香不過比較淡，雖然不會過酸，但我就會縑不夠濃了。不過奶幾香，又再一次證明餐廳用料真的不錯﹗apple tart 也來了。小小的一個。牛油tart 皮不厚夠鬆化。tart 面的蘋果片不甜(太好了，沒有一般tart 的厚厚明膠)，帶有輕輕的蘋果香，天然不造作。不過如果熱應該會更好味﹗

甜品很快也到了。嘩，好漂亮。很簡單的做法，但好喜歡用士多啤梨做的簡單擺盤呢﹗三層長方形的酥皮，夾著兩層custard 再綴以新鮮士多啤梨，賣相其實很平實。狠心往中間一切，很鬆脆﹗酥皮面有一層薄薄的焦糖，很香，除了帶出甜味，它略為硬身的質感為鬆脆的酥皮添上另一種層次﹗custard 不太甜，而士多啤梨新鮮不酸，吃得人心花怒放。之前都有試過Mimosa的拿破崙 (in strawberry and mango flavours)，鬆化是鬆化，但硬是覺得欠了點甚麼，吃過就當試過，印象不太深刻。這個mille-feuille 呢﹖P 昨天吃了Cova 的拿破崙，不基滿意，竟然說掛念起Nova來，就是因為這個甜品﹗可想而知它的美味﹗埋單大約每人一百八十蚊。在百物騰貴的今天，不到二百蚊可以吃到如斯優質的食物，感覺是﹕好開心呀，我終於不是付鈔吃舖租了﹗

決定下星期encore，之前可以去打bowling﹗

原來餐廳星期六日有早餐供應，由十點開始。住附近的朋友真幸福﹗

江順河鮮 (尖沙咀)

做完占再睇完豐子愷展覽，個肚好餓
朋友都係打晒鼓，話想食好味既炒飯
星期日晚既尖咀，又冇book 位，好難搵啫

八月居擺酒冇位、"紅星"我唔鍾意、"廣don't搽居"個friend 唔like，"唐潮"又太多同胞 ... 好餓呀!
新港上面除左"頂太風"，好似仲有中式酒家架。好﹗決定去搵食 ...

原來而家仲有一間好彩集團既xx皇宴同一間江順河鮮
其實都唔係想食d 咩特別野，兩間都好似okay
不過江順個接待阿姐醒目又熱情，加上"哨" 到佢有$38小菜，好，試你﹗

唔使等位直入，個場得兩三枱客，另外有人間左間房
覺得好舒服，因為尖咀要搵一個唔係好嘈、冇普通話既地方慢慢食飯，一d都唔易﹗

睇個餐牌，都幾多河、海鮮選擇，花錦鱔、魽魚、魚咀煲都有，不過得兩個人係好想食呢d
有d即日推介，見到個波士頓龍蝦 (1斤4左右，可上湯可芝士加麵底、可避風塘) 加老火湯賣$299 ... 唔 ...
但a la carte 個椒鹽鮮魷、$38既藕餅、仲有之前話想食既飯都想試喎 (可見真係好餓)
結果 ... 如題，叫左個龍蝦孖寶加一個啫啫介蘭爽肉煲 ($78)

個老火湯先上，係木棉花煲豬 (咁上下哈哈) ... 原個瓦煲仔上(有四碗湯)，好夠熱。好味而且冇味精﹗
湯渣碟上，正﹗俾我清晒，連木棉花都食埋。

之後龍蝦到 ... 都幾大碟，見到兩隻大鉗 (長過手心)、另外仲有八件左右既身同尾。芝士係焗過，好香，所以唔覺膩。
好味呀﹗啖啖肉。其實唔係好敢出街食龍蝦，因為抽水好勁 (前兩日至睇到一單新聞一家人去某酒樓食圍餐$4888加左一碟$2888 既芝士龍蝦(話四斤幾喎) 結果得六件龍蝦，其他得殼冇肉，仲疑似用蟹柳充撐場面 ... ) 不過今次真係好滿意。可能你睇到呢度覺得我係打手，我唔係。的起心肝寫食評係因為見到之前d reviews 惡評如潮，同我尋晚既經歷好唔同，想講番句。

之後個啫啫介蘭爽肉煲都到喇。順德野d 煲係好香、好惹味既，呢個都唔例外。唔油，幾好。不過好多肉，我情願多d 菜。

其實我覺得食物好之外，服務都好好 (呢個係令我呢個cd rom 人都要出手既最大原因)。
由落orde 既waiter，到上菜、勤快換碟既waitress，同問我地d野好唔好食、埋單既女經理，全部都好有禮貌同細心。而且仲好humble。

食食下開始人多，7點半左右大約8成full。見到隔離一個婆婆同個仔要左一個老火湯、椒鹽鮮魷、藕餅同石鍋飯 (全部都係我地之前想食既野﹗﹗﹗) 合指一算，佢地咁食法，應該唔使$350 ... 平我地少少。

我地已經諗住下次再去，會試佢個$38既藕餅、同個石鍋飯 (好大鍋架，飯桶如我見到已經好想食)。

(sorry，原本真係冇諗住寫食評，所以冇相)

好既服務要讚﹗

Tivo (西環)

好耐冇寫食評了，今次本來都冇打算寫，所以食物冇影相，但發生左一件事，忍唔住上黎寫幾句。

我用tablemap卜左位，食左個brunch。呢間Tivo環境好好多人提過，地點其實都好搵，當然而家有地鐵就更方便。(sorry 本身冇打算寫食評所以食物冇相）

我地兩點食，weekend所以係brunch menu。menu 都好多選擇，價錢大約九十至一百二三十左右，但就冇餐，不過有水任飲。食左open toast sandwich with mushroom spinach avocado $108，好味，有d沙律菜on side. 用料好新鮮，而且有三大件，感覺豐富。試左朋友既scrambled egg with salmon and toasts.  蛋好滑同埋唔油，smoked salmon有五塊左右，味道正常份量好okay. 仲試左朋友既eggs benedict, 可揀salmon, ham or mushroom, 佢揀左mushroom. 兩大件，處理得幾好，唔油，而且用料真係新鮮。有朋友食左big breakfast, 冇試但個樣都好靚。

總括黎講食物唔係平，正常brunch價錢，但用料份量都令人滿意，而且蛋都處理得好，唔油。

真正驅使我寫呢篇食評既係Tivo既服務！我用tablemap卜位既，但今朝收到個email話餐廳發出，話我取消了預約！但我尋日食左啦。咁我d積分咪冇左！打去問，接聽的waitress 雖然唔係即刻幫到手，但好有耐性地了解成件事，仲好有交帶地話下晝覆我，最尾仲主動話我知佢叫ceci, 有咩可以搵番佢！講真，而家正常的服務員都唔多，咁有交帶的就真係好少見（可能我運氣差啦）。雖然而家件事未解決，但反而對呢間餐廳多左一份好感。其實當日已感覺唔錯，朋友遲到，我一個傻傻等，waitress行過會同你笑下，感覺好親切。西環新餐廳好多，好多都好型，但服務就… 只可以講對外籍人士較多笑容啦。

而家度度都人多，生活又緊張，放假都想同朋友舒舒服服食下野，輕輕鬆鬆咁傾下偈。搵到一間食物、環境同服務都好既餐廳，當然要推啦！

多謝呢位叫ceci的server!