樂天皇朝 (將軍澳)

最近同新識嘅朋友出街，言談間透露佢好鍾意食小籠包，所以靈機一觸，帶左佢黎樂天皇朝食八色小籠包！因為呢間嘅小籠包唔止皮薄餡靚好好食之外，重要賣相吸引色彩豐富，令人食指大動！

特色皇朝小籠包
有齊原味、川味、鵝肝、蟹粉、黑松露、芝士、絲瓜、蒜香嘅口味。品賞每一粒都有不同嘅味覺享受，有傳統的、清淡的、濃味的、有新意嘅味道，非常滿足。
令到我比較驚喜嘅係黑松露同埋鵝肝，兩樣都唔會太過濃郁，反而食到淡淡的香味，基本上每一粒小籠包到非常爆汁，而且餐廳有個教學指南，建議我哋由淡味食到濃味，非常細心。

李白醉雞
之前係網上見到已經好想試，估唔到今日有機會食到佢，雞肉非常嫩滑，而且酒味調配剛剛好，每一啖都食到酒香味。

蒜香排骨
炸到非常香脆，而且份量非常多，排骨個味道醃得好好，食嘅時候肉質非常鬆軟，而且食嘅時候又唔會感覺好油膩，如果加埋白飯就更加好啦！

辛安東元祖奶奶雞 (旺角)

趁今日重係假期，梗係要約下朋友食好西啦，最近睇得韓劇多，突然好想食韓國野，好彩朋友都冇反對，最後決定左食辛安東元祖奶奶雞。

辛安東奶奶雞
話明鎮店之寶，梗係唔係浪得虛名啦，一上菜嘅時候分量多到嚇親我同朋友，雖然我地嗌半隻雞，但其實已經好夠食，每件雞肉質非常嫩滑，加上特製既醬汁食到我地停唔到，除左雞之外，重有其他配料，包括紅蘿蔔、薯仔、翠肉瓜重有薯粉，每樣食物都吸哂啲汁，而且好淋好好味，而薯粉亦都好彈牙添！我地今次嗌左小辣，已經覺得岩岩好，唔會比個辣搶哂啲味。

芝士拉絲飯卷
飯卷入面有酸蘿蔔、紅蘿蔔、青瓜、火腿同蛋，飯卷嘅表面加左一層芝士，食落口感冇拉絲，但所以配料絕對冇偷功減料，呢到已經加哂分啦！而且賣相非常精美，岩哂打卡。

巨鋒提子梳打
大大杯，勁解渴，而且又唔會死甜，夏天整返杯簡直一流！

Deer Kitchen (觀塘)

今日收工後約左朋友係觀塘食飯，因為觀塘區真係非常方便，朋友介紹我去the wave既餐廳，今次就揀左呢間「Deer Kitchen」，以鹿為主題既特色餐廳，入到去已經見到勁多打卡位，岩晒我地可以狂打卡，而且Menu選擇亦都好多，座位之間非常闊落。

今次我同朋友叫左一個Set Dinner，因為性價比高之餘，我地又可以試下其他唔同既野，可以互相share。

意大利腸沙律
比我想像中大碟，配上特製既醬汁同埋新鮮既菜，食落特別fresh，正！

是日餐湯
今次既湯係煙肉忌廉湯，熱辣辣又夠晒creamy

意大利惡魔烤春雞
終於到我最中意既烤春雞上場喇，先唔講食物住，靜係個擺盤已經好靚，烤春雞下面鋪上紫薯，甜甜地好好味，春雞切開左兩件，唔洗我地分得咁狼狽，可以令到我同朋友好有儀態咁慢慢切，春雞個外皮脆卜卜，肉質勁鮮嫩而且多汁，基本上唔洗沾醬已經好入味。

黃金炸魷魚圈
小食黎講真係幾大份，外面勁多咸蛋王既味，重要炸到好香脆，魷魚非常爽口彈牙

香蒜黑松露野菌德國腸薄餅
一上菜既時候已經聞到淡淡既黑松露味，但又唔會太過搶味道，配合既香噴噴既野菌同埋德國腸，成件事超級夾。而且係我最中意既薄脆餅底，唔會太過漏，重可以食多幾舊都得添。

泓居酒屋 (尖沙咀)

難得放假前夕，梗係想約朋友去食嘢放鬆吓啦，今次就決定同朋友去尖沙咀嘅居酒屋，可以慢慢傾吓計，舒緩下工作嘅壓力。

今次揀咗呢間泓居酒屋，地點非常方便，位於中港中心頂樓，入面環境闊落，仲可以睇埋窗邊嘅景色。餐牌方面選擇好多，飲品亦都有唔同嘅款式。

阿波尾雞肉
雞肉好嫩口，而且調味調得好好，唔會過咸，雞肉亦都多汁彈牙，推介！

牛舌心
燒到啱啱好，而且口感非常煙靭，亦都好爽口，每一啖都都好多汁，非常惹味！

脆皮原條白鰻
第一次食脆皮嘅白鰻，話明原條，份量果然十足啦，食落嘅時候唔會太多骨，而且燒到外脆內軟，魚肉亦都好嫩滑。配上生椒粉，味道更加突出。

泓卷
好特別嘅飯卷，有三種唔同嘅魚類，飯卷兩邊微微煎過，食落好香，魚亦都唔腥重非常新鮮。


魷魚糯米飯
原隻魷魚包住糯米飯，魷魚唔算太厚身，每一啖都啱啱好，糯米飯好軟身，兩樣食物加埋口感好特別，加上佢用魷魚內臟作為醬汁，識落唔會太腥，反而會更加突出魷魚嘅鮮味，一流！

樂天皇朝 (將軍澳)

今日約左個好耐無見既朋友食lunch，始終太耐無見既關係，我地都想搵間坐得舒服少少既餐廳，朋友話之前試過呢間，覺得價錢、地點同環境都好適合。
我地入到餐廳，職員好有禮貌地帶我地入座，好彩餐廳唔算太多人，環境同燈光都岩岩好。

一打開個餐牌，見到勁多款食物，我同朋友都心大心細左好耐，因為好多我地都好想試下，最後我地都揀好左以下食物：

糖醋魚片
糖醋汁調配得岩岩好，酸酸甜甜，魚片好厚，完全係啖啖肉，配上鮮菠蘿同青椒，食落非常爽口同解濟，係一個好好的配搭。

紅油抄手
個人認為係必點既小食，有五大粒，食落非常爽口彈牙，面頭配上炸蒜同香蔥，配上特製香油汁，唔會覺得好油，反而重愈食愈開胃！

風味沙拉排骨
外皮炸得好香脆，食落肉質好嫩滑，食既時候重要係熱辣辣架，加上個沙律醬汁好好味，食落甜甜地，感覺上無咁熱氣，我同朋友都忍唔住叫左個飯食。