百好咖啡餅店 (西灣河)

黎開呢頭整野,先上OR睇下呢區有咩好食先,
之後就決定黎呢度喇~始終都鍾情d冰室~
一來有懷舊feel, 二來d咖啡/茶特別好飲,
而且d侍應都有人情味d啦.
我未食lunch, 所以3點幾都叫左午餐,
午餐有火腿炒蛋, 餐包, 叉燒意粉+咖啡/茶
我要了叉燒通粉: 叉燒放o係底, 通粉偏硬, 湯唔油,味道ok~
黎貨的叉燒都ok~唔太肥.約有3-4塊.
火腿炒蛋落足火腿, 過油~同埋似奄列.但係其實味道唔差.
餐包係半個腿蛋包, 佢會因應佢地有咩包o係度而俾咩包客人,
我見到有d人係腸仔包,早知同佢講話要其他啦,唔駛又食腿蛋.
不過~個包做得幾好味,係軟熟既甜包.

最愛係杯熱奶茶~要左茶走少甜.
果然有幫我少甜~而且茶味夠濃.

呢度好多街坊黎嘆茶,個伙計記得晒佢地飲咩同咩要求~
犀利, 同埋全場得一個伙計~一個收銀.
但係都好快手架.

茶木‧台式休閒餐廳 (元朗)

之前一直都冇食過茶木其他分店..知道元朗開左間...既然咁近當然要一試啦!
等左1個鐘, 終於都可以入去喇!
入座後, 覺得環境尚算舒適!
叫左一個肉燥炸豬扒飯, 同一個芒果香草蜜糖磚塊, 一杯珍珠奶茶

珍珠奶茶係有COUPON送的!落單後好快送到!
我個朋友一飲就話唔得..冇茶味
等左25MINS就問下侍應個飯仲要等多幾耐呢? 經他催促廚房後,
5MINS個飯到喇!! 我個朋友已餓壞喇...
肉燥幾香都唔差, 隻鹵蛋有少少流心不過係凍既! 炸豬扒肉好實同嚡, 微暖!
整體黎講, 以呢價錢同埋要等半個鐘..唔多值!再等多15MINS...我個主菜到喇! 芒果香草蜜糖磚塊...
賣相靚! 多士搽左蜜糖再焗香甜脆卜卜，加埋烘到脆卜卜，最估唔到係雪糕入面有一絲絲果肉!可能仲係新開階段, 落單既侍應對自己既出品唔夠熟!
我問芒果香草蜜糖磚塊個雪糕係咩味..可唔可以轉其他味道..答我唔係好清楚!
我本身係想叫香草巧克力蜜糖磚塊, 侍應話未有貨...但後來我食緊我個芒果磚塊時..
竟然有兩個巧克力味蜜糖磚塊放落其他食客枱上~~
唔通由我落單後45MINS就返左貨..? 定抑或侍應哥哥唔知道呢...

總結:等入座60MINS+每枱用餐時間只限90MINS(但等飯需時30分鐘, 等蜜糖磚塊需時45-60MINS)
暫時都唔會再去喇!

浦村韓國料理 (尖沙咀)

放工一個人醫肚+買聖誕禮物比人，
行去尖沙咀路經此店，貌似老闆的韓國人大叔熱情介紹，見午餐款式多選擇就一試！
入到去聽到服務生姨姨唔係亞豬媽。。有少少擔心會唔對辦。。
叫左個至愛炸醬麵。。然後奉上三小碟前菜，
估唔到一個人都可以有三碟，有驚喜！
炸醬麵熱辣辣送到，可惜一撈發現過多水喺底，溝稀左個炸醬。。所以味唔夠濃，但麵係彈牙的，洋蔥同肉既比例不錯！
Lunch唔收加一。。抵食！

奇香冰室 (何文田)

一路以來，睇奇香的食評都覺得很吸引～
可惜總覺得地點不是太方便～
今日中午一個人。。就決定要一試！
這冰室不大，座位不多，要搭枱坐是合理的！
我一個人座坐在收銀檯後的二人枱，要了茄牛燴意+紅豆冰  意粉大概等五分鐘有得食。。賣相討好，有好多雜茄豆。。好吸引！
意粉夠味。。牛肉又唔韌。整體唔錯。。略嫌份量唔夠我食。。幸好還有紅豆冰作美好的結尾，雖然不是大粒紅豆。。但份量多又不太甜乃可取之處！

中國冰室 (旺角)

放工想起紅豆冰。。
走到久遺了的中國冰室，
因為已經六點了，連埋我只有兩枱客人～
單點一杯紅豆冰好像不太化算。。
所以叫碟西炒飯再加杯紅豆冰，來一個early dinner...
紅豆冰雖然沒有了昔日的冰柱，但依舊多紅豆又夠淋
西炒飯望落都唔錯。。夠味多餸，腸仔、火腿、叉燒粒、蛋絲、雜豆。。雖然唔係炒得完全粒粒分明，但係卻有家裡媽媽炒飯的味道！
短短半小時，好滿足了！