Js Kitchen (上環)

因工作關係，店好近辦公室。上樓都係一樓啫，有𨋢有樓梯。

樓上小店好處係做事有心機！

之前食過肉醬意粉，汁味濃稠剛好！又食過豬扒飯，豬扒做得幾好，唔會因為特價餐而馬虎。👍上環好多西餐廳都貴，反而樓上店仲好。

今次食台式鹵肉飯，份量都足夠。疫情下仲有特價外賣餐。外賣都有杯飲品👍飲品跟餐係果汁！👍 不過今日杯橙汁好似有啲唔同平時。

堂食都舒服，搵日可以試吓，堂食都有多種午餐。店舖地方唔大，限聚下都係無乜所謂。仲好啦！

Le Voila (天后)

今日同屋企人試咗他們的團購offer，我地叫咗個四人餐。

是晚菜單
頭盤
•法式洋蔥湯 x4
配菜
•炒法邊豆及薯角 x4
主菜 (任選 3 款)
•挪威三文魚 16oz
•安格斯牛柳 16oz
•羊 T 骨排 8oz
•燒春雞 800g x2
甜品
•法式焦糖燉蛋 x4
飲品
•紅酒 / 白酒 x4 
或
•咖啡 / 茶 x4
訂枱時伙計會提你個餐三文魚同燒雞係set好咗，牛柳應該係西冷扒，所以只係喺羊同牛之間作選擇。

先講洋蔥湯，個湯好夠熱，勁like。不過湯內有部分洋蔥好硬，唔知點解。係洋蔥外皮？

法邊豆同薯角好味，特別係法邊豆，新鮮。

主菜，我地選擇西冷扒，肉質較硬身，可接受。三文魚因為有腩位，好肥美，好香。燒雞係蜜糖烤，有蜜糖味。

甜品，燉蛋有啲硬，唔知係蛋多定係落咗粉漿？但蛋味唔算濃，可接受。

飲品，正常。酒類係正常table wine，無特別。可能飲凍檸茶會好啲

特別，原來蒜蓉牛油係自製。

服務，整體服務好好，好細心。

環境，可能餐廳無安裝蚊燈，餐廳內間中有蚊飛。

居素屋日本野菜料理 (灣仔)

我地兩個想食日本嘢，又想到Green Monday食素，呢度可以滿足兩個願望。
Book枱時接線嘅店員好好人，解釋因為新開張試業，晚市只有Omakaze Menu供應。每位特價免加一，但價錢唔平㗎。基於我地都想試新餐廳，今晚一於走去食。店員好體貼，特別send個menu。

餐廳環境好簡單，簡單嘅木材料裝修，比我地舒適嘅感覺。

日式豆腐
聽侍應介紹，係用日式豆漿製作，幾滑。但我地都有相同疑問，唔知同直接用日式豆腐做有無分別呢？
清汤大根
好清甜嘅大根，成舊都無根，好好味，好surprise。連湯都飲埋！推介！
壽司拼盤
賣相一流，件「海膽」我地估係南瓜做，店長解釋係紅蘿蔔蓉做，好得意。我愛人估到另一件「魚生壽司」，係燒黃燈籠椒做嘅「生魚片」，呢個好難估到，好叻！
烤芝士年糕 ，蕃薯
年糕好香，要快快熱食，凍就唔軟熟。蕃薯細細粒，香甜好味。
茶碗蒸
蒸蛋好香，不過可能落多咗湯底，有啲稀。
什才天扶良
蔬菜天扶良脆漿剛好，唔太厚。
日本水蜜桃
店長指係水蜜桃正當季節，好清甜。好好味。推介必食，但據講有季節性。

店長詳解佢地開舖嘅理念，食材會人手做，不買預製已加入味道嘅素材食品。好有heart。我地兩個都好滿足！

丼丼屋 (旺角)

我地兩個睇完變形4，行到後街，上到嚟等咗陣，見到醬汁吉列豬扒丼，$128。限定喎，一定要試！
然後我地叫咗一杯梅酒，一杯威士忌梳打。飯未到，先飲嘢。兩杯酒都幾得意，ok好味。威士忌較濃，唔飲慣就小心。
飯到。嘩！好大碗，我地兩個食一流。waiter好好人，慢慢講點食最好。我地先起豬扒放碟。好多菜，好新鮮！豬扒好脆，好juicy。
成碗飯好好食，我比85分。
唯一係等候時間耐，見到有枱都要等20幾分鐘。

星座冰室 (尖沙咀)

岀名蕃茄湯，一定要嚟呢度試！
因為香檳大廈家訪事件，我地行入去都好小心，千其咪入錯門口。
經過神秘嘅樓梯，行到入去，係一間多年嘅冰室格局，但地方總算乾淨。
我地叫咗個蕃茄牛肉通粉同埋蕃茄豬扒一丁，加杯凍鴦同冰杏霜。
等食同時，見周邊食客碗麵唔係太大碗，所以追加一份奶油多。
冰鴦好飲，不似一般茶記咖啡酸底，唔錯。杏霜好味，如果奶味香啲更好。
蕃茄肉喺碗面一碗都係，賣相非常好。味道亦好好味，酸甜好適中。牛肉同豬扒都好軟熟。豬扒去骨同切片，細心，讚！
最後，只可惜追加的多士漏單。。。可惜。不過老闆已講唔好意思，服務好好！