禾川壽司專門店 (屯門)

過黎屯門，路經一間小店，見佢好四正。又是屯門友有推薦，小小餓既情況下，就黎立食少少嘢。
這間店，除了主力賣壽司刺身，也有一些食材可以在這裡買到。例如是好平的三文魚頭。老闆說，常常一有就好快清空。
如果開PARTY，可以跟老闆講預算及人頭，他們可以設計特別開PARTY的套餐給客人，想不到服務貼心。
店面雖不大，但也五臟俱全，有個立食區。點了兩個手卷，刺身，醫下個肚。
三文魚刺身肥美，劍魚刺身也是厚切，比一般壽司店更為抵食。而北寄貝刺身，也處理得好。無雪味，也不會令到刺身水水的。這是值得一讚的地方。

而手卷新鮮整起，也十分好食。

有見及此，我就買埋外賣返屋企嘆。
點了一個軟殼蟹反卷。份量很足﹐一盒八件！
軟殼蟹香脆鬆軟，入面仲有其他配料，而且包得實淨，唔會一咬就散。
因為食過手卷好食，所以再安哥軟殼手卷比屋企人食。

而重點推薦是這個8吋浦燒鰻魚丼！份量十足！
眾使是外賣，但鰻魚凍咗少少也依然好味，如果堂食應該仲正！大大塊鰻魚勁正，而且還是厚肉。燒汁充足，啱是愛食一族。



佢既套餐湯係麵豉湯，但唔好睇少佢。絕非粉沖泡的麵豉湯，而係魚味濃郁的魚湯底麵豉湯，自家煲的！真想問老闆，有無得額外買這個湯回家？

以這個小店價錢，食到這個水準，認真抵食！

段純貞牛肉麵 (銅鑼灣)

無諗過，唔堂食，外賣自取都一樣咁好。LUNCH TIME，唔夠時間堂食，就去咗段純貞買外賣返去。
選擇好多，唔食牛都一樣有好嘢食。
叫咗個招牌牛肉麵，加咗個炸雞。

喜歡外賣包裝，比發泡膠更環保。
外賣回公司，一樣咁好食。
湯頭夠濃，牛腩都夠晒淋。外賣返公司，麵都唔會糊咗，夠晒彈牙。
鹽酥雞夠味同炸，值得一試。
想不到，外賣回公司，同事無即時食，都話KEEP到炸雞既脆度。
這是意料不及的事情。


朋友叫的餐，都話水準夠。雞絲夠足料，估唔到同樣好味。
流心蛋更是一絕！

以後外賣又多一個選擇啦~

M Kitchen (荃灣)

昨天元旦很過千色匯，發現有新餐廳開張。門面幾靚仔。有種小清新的異國風情。見價位唔錯，入去試試。
不要被門口呃咗，轉角入去，其實有好大空間，入面差唔多坐滿咗人。很喜歡這裡的裝潢。而且坐位都好闊落，幾舒服。
我去既時間有點尷尬，是五點多，在想食下午茶還是晚餐好？但因為好肚餓，不如等晚餐時段好了。但眼見場內大家食著下午茶餐，好吸引哦~ 有啲款式出面比較少見一啲。同埋下午茶餐的價位都好抵食。下次要黎試個下午茶先。




呢度既餐牌設計都好靚。用上TIFFANY BLUE的設計，簡約舒適。
菜式款式都好多，但可能還是新開，所以未有好優惠的套餐，期望之後會推出啦。





俾大家睇下幾頁餐牌的內容。
飲品方面，叫咗個「百香水果茶」HK$22。

呢個飲品老公話都值得一讚，不會淡味，好夠濃味，同時真係有生果係入面。唔錯！
因為大肚我唔飲得凍嘢，另一杯叫咗蜂蜜柚子茶。HK16~ 比出面個啲會濃味啲足料好多。有啲誠意~ 



日式醬燒原條特大厚切鰻魚飯
HK$198
呢個絕對係同價位入面，我食過咁多餐廳最大條既鰻魚飯！如果細食的朋友，絕對可以兩個人食一條。
老公自己一個都食到2/3就覺得好飽了！
叫得厚切，等我俾大家望下個橫切面。隨手一切都有咁厚！無呃人喎！如果可以加醬汁就更好啦~~ 




熔岩拉絲芝士焗魚柳飯
HK$88




如果愛食芝士同白汁的朋友，不要錯過這一款。佢當真拎成舊芝士係你面前熱溶拉絲俾你食！
當然拉完既芝士要快手溝一溝啦。
你睇幾大舊勁香濃既芝士。
呢一邊係白汁個邊，就咁都拉到絲了！
魚柳外層香脆，增加了口感。芝士不會過咸，咸香適中。
而飯也焗得十分熱！小心辣親啊~~ 

如果飯底有埋炒飯就更好啦~ 

Westwood Carvery (中環)

約朋友食飯，當然想揀返啲大件抵食、份量多、又美味的地方。同時，環境都好重要！而呢間Westwood Carvery就好啱我哋啦～
頭盤點咗呢個Fried Calamari。炸得勁鬆化，而且好彈牙，火喉控制得好好。而個醬，更加係畫龍點睛既地方，個汁好吸引、好惹味。作為頭盤，好開胃～
Steamed Fresh Mussels 係我每次必食之選！個青口雖然唔係太大隻，但就厚肉。個忌廉汁又係夠好味！唔會太油，又唔會咸，好好味～ 配埋麵包條點汁，仲正！
Slow Roasted Beef Short Rib
最愛食牛的我，很喜歡這個勁惹味而牛味濃郁。仲好有咬口。絕對係愛牛人仕首選～
Canadian Sea Urchin Carbonara 

朋友當中，有海膽迷，佢哋一試呢個Carbonara，就勁愛。海膽味濃，同時仲份量好足！因為份量大，唔好以為兩個人食得晒，一定要成班人Share啊～～

尚港味 (銅鑼灣)

媽咪住港島，所以成日都會去銅鑼灣區打等。無意中搵到呢間「尚港味」，都係跟Openrice搵食搵到。見新開無耐，走黎試下。
很欣賞呢間店的心思，就連Openrice Account都講明係糖街入口會易搵啲。所以唔使點搵路就搵到黎。想不到這裡的裝修都高檔得多，位夠闊，坐得好舒服！

同店員一傾之下，先知係益新集團既新店，咁就一定有水準啦～～點了個七小碟前菜拼盤，貪佢乜都有，可以一次過試勻晒！
當中不乏講得出有名的菜！有滷水蛋、雞絲粉皮等等。
見到有買一送一優惠，所以點了個荔枝冰跟龍眼冰，用的是梳打去沖，特別Fresh冰涼及舒服入喉。
呢度既Lunch Set當然要食燒味午餐！HK＄78就已經經包咗自選燒味、靚湯、仲可以揀飯、豌豆麵、四川豌豆麵，仲有糖水送添！

今次揀咗個燒鵝拼叉燒皇，都係呢度皇牌，當然唔可以錯過！

我就無揀飯，反而揀咗呢度既自家靚湯底既豌豆麵，就係鐘意佢夠特別，要試一試！呢度燒味水準真係一流！個燒鵝肥瘦適中，肉質十分嫩滑！
而個叉燒皇必定要試！蜜味香濃，肉質鬆化而嫩滑非常，入口有種即溶的感覺！
而個豌豆麵湯清甜而不會有味精，飲完成碗都唔會渴。個麵質幼細，很特別的麵條。
媽咪就點咗安格斯牛蕎麥麵，佢話佢未試過咁既配答喎。看得出安格斯牛份量好足！而且薄片得很，入口嫩滑。
個蕎麥麵夠晒彈牙，媽咪好鐘意食呢～～
而每個午餐都有靚湯，今次係粉葛湯呢～～很好飲，很足料！
甜品方面，有這一個南瓜露，也是出面少有。很喜歡其清甜而很舒服，飲完一碗不夠喉呢～～