유명진의 육미정담 肉味情談 (九龍城)

Airside商場引入唔少特色餐廳，過江龍韓國餐廳冬柏就係其中之一。一入門口就係木系屏風分隔嘅包廂，私隱度高之餘亦方便侍應協助燒烤食物。

韓國菜一大特點就係多碟精緻前菜，冬柏都唔例外，擺滿爐邊非常震撼，賣相精緻之餘欣賞佢唔會太重口味，唔會搶過主角燒肉嘅風頭，起到平衡嘅作用。當中最欣賞呢個蕃薯薯蓉，口感非常綿密。

叫咗兩款豬肉同一款牛肉燒肉，名物雪花五花肉最吸睛，而且全程可由侍應協助燒熟，五花肉自身嘅油脂已經可以燒到兩邊都有金黃脆皮效果，因為有侍應把控住燒烤嘅時間，燒出嚟嘅五花香有油香但唔會食落成口油太油膩，屬水準之作。

鍾意薄片燒肉嘅可能會更欣賞呢款花卷五花肉，賣相靚，好易燒到脆卜卜～

筆者三款肉當中其實最鍾意大牛骨，係超好食嘅韓牛肋骨肉～～～已經起晒骨同醃製過，落爐煎兩邊再對半剪開燒，非常惹味～個人建議網燒完最後再用塊鐵板辣下兩面，就外脆內juicy喇～～～

呢度嘅嘢飲都唔錯，大杯唔算甜，柑橘梳打味道清新解膩～

值得一讚呢度嘅爐火力好夠，坊間一般連鎖店啲爐邊蛋燒好耐都仲係一灘蛋汁，但呢度熟得超快，8成熟舀起配埋粟米芝士醬一齊食超好食～～～

Tiger Ramen (九龍城)

欣賞Airside引入咗好多特色餐廳，唔係間間都同其他商場一式一樣，連food court都有驚喜，我地諗住逐間逐間食晒去🤣🤣 第一間我地就揀咗tiger ramen，因為行過見到出餐位啲拉麵賣相好對辦，係拉麵店質素～

叫咗兩碗黑蒜白湯湯底嘅拉麵，一碗揀豚角煮，一碗揀豬軟骨，兩款肉都好好食，豚角煮腍得嚟有啲焦香脆邊，豬軟骨就真係成舊都煮到好腍，尤其係嗰舊啫喱狀嘅軟骨真係不得了😍😍質素高但要就返food court定價份量自然都會少啲，想食多啲肉嘅我會建議嗌豬軟骨～

除咗拉麵仲有飯類同小食，我地追加咗芝麻雞翼同餃子兩份小食，雞翼香脆，餃子點汁食亦非常好食～

Sonia Coffee (新蒲崗)

呢排好似興起昭和風咖啡館，暖色系嘅裝潢配上大量木製傢俬，有置身日本小餐館嘅感覺～最近Sonia Coffee喺mikiki都開咗分店，唔想同人逼airside住可以經天橋過嚟呢邊，或者你喺新蒲崗過去嘅佢就對正斑馬線，一過馬路就係，連商場都唔駛入。

身為明太子愛好者嘅我二話不說先叫個明太子海老餅漢堡，有啲驚喜個海老餅唔係用吉列粉，而係類似魚糕嘅質地，蝦肉彈牙，麵包都有烘脆到，水準唔錯～

另外叫咗個蘑菇咖喱汁嘅南蠻炸雞蛋包飯，蛋份量唔算多但夠滑，炸雞炸漿鬆脆，咖喱都夠濃，如果飯少啲就更完美～

加埋個靜岡抹茶小豆窩夫配豆腐雪糕，豆腐雪糕有好濃豆味，搽喺窩夫度食好夾，紅豆蓉粒粒分明又唔會太甜，窩夫本身大件又脆又有蛋香，正～

本身以為係打卡cafe食完真係俾佢嘅食物水準驚艷到，佢晚市套餐外賣仲有9折，唔過$100又好食又包餐湯沙律同野飲，我地叫嘅mocha仲要唔駛補錢添🥹🥹🥹 朱古力味超香濃 大推！！！

CARVER (銅鑼灣)

銅鑼灣食肆多人流更多，喺鬧市行走真係逼到傻，同frd食嘢冇咩所謂，但約長輩食飯都係搵間舒服啲、遠離煩囂嘅餐廳更理想。

朋友推介皇冠假日酒店內嘅西餐廳Carver，lunch有set今次嚟食晚市就係a la carte menu，頭盤主菜選擇都多，可以叫唔同嘢食share~

一坐低就睇到門口嘅dry age櫃，大大夠肉好搶眼，侍應話睇落好多但每舊dry age完其實一個星期內都賣晒🫢🫢

頭盤揀咗八爪魚沙律同蟹餅，前者配埋各式蕃茄同香草汁，非常清新；後者口感軟綿綿蟹肉量多足料，配埋個忌廉汁就更加好食～

主菜當然係叫扒啦🤣一份西冷一份dry-age肉眼share，前者焦香味重啲更加帶到肉香出嚟，後者有肉質更腍有入口即融嘅感覺，更特別嘅係後者用咗咖啡粉去醃肉，伴碟亦有咖啡粉提升味道層次。

甜品揀咗pear同truffle兩款，pear果肉爽脆，羊奶芝士蛋糕口感實淨配上雪糕意外地夾；truffle係個脆皮雪糕球，每啖都充滿松露香，鍾意松露味嘅一定要試～

喫茶ちょうぼ (尖沙咀)

咁多個尖沙咀商場之中最鍾意去K11，因為地鐵駁住一定唔駛淋雨，甚至想買少少野都可以快速出入閘完成，好方便～今日嚟開買護膚品見到開咗間超靚昭和風cafe，順手食埋個dinner~

見枱枱都有叫日式布甸就知呢個係必食，賣相精緻亦有濃郁蛋味～

小食方面我地都鍾意食雞軟骨，呢度份量多而且每粒都有唔少肉食👍🏻

主食方面好推介特大海老炸蝦蛋包飯，炸漿好脆，入面啲蝦肉又夠彈牙，奄列蛋好滑好好食

另外叫咗個極。厚切吉列豬扒飯定食，好鍾意佢個蛋汁撈飯好正～

呢度飲品都唔錯，焙茶牛乳甜度低飲到香濃茶味～