牛舞日本燒肉‧涮涮鍋放題 (銅鑼灣)

平日夜晚去左做 叫左澳洲和牛餐 $408+1
可能我喊係叫日本和牛最貴個個
唔見好似其他食評咁講 餐廳服務員會幫我整埋壽喜燒🤔
佢地只係倒完湯 倒完堆菜落鍋就會無再出現過
後期連加湯都要搵人🙄

目測當晚入座率唔高
連每枱個壽喜燒無湯都留意唔到
我唔係好理解其他食評講服務好 留意到客人需要指邊方面🫨

因為無人介紹之下 我地唔知送個盤肉
原來大片係壽喜燒
我地拎左去燒肉 好乾又韌🤯
全晚大部份肉 都好韌
個爐個火較最細 又無咩火力
較中火 又好快燒燶 十分奇怪

個人覺得連燒肉like都仲好食仲抵食

選擇又少
先講飲品 可樂同其他汽水係用汽水機
我倒左杯可樂 飲左味即刻唔要
無味又無汽 唔知飲緊咩💀

枝裝野飲 只有少量鴻福堂系列
去到後期想拎烏龍茶都無哂
其實任飲任食 你係咁唔refill唔俾人飲
咁我咪下次唔幫襯囉 咁小家👎🏻

火鍋料更加反哂白眼
蟹柳都無條 得兩種唔知咩腸 其他都係菜….
呢個價超唔抵食

最後仲不停催賣單叫你走
講真你都無人等位
俾我食埋手上杯雪糕得唔得

Ikigai Concepts (荃灣)

平日係荃灣搵lunch食 發現呢間係如心廣場既日本餐廳
之前網上面介紹 以為佢得omakase 所以一直無咩留意
但原來佢既lunch menu都幾多選擇
有燒肉丼 炸物丼 壽司 烏冬
價錢唔算平 但佢環境係幾大幾舒服
耐唔耐食一個好既 可以考慮

我今次叫左個炸多天婦羅蝦餅飯 $128 （近排有免加一）
Set另有茶碗蒸同沙律

蛋同飯都註明係用日本產既
隻蛋既蛋黃好吸引 用黎撈飯好好味
塊天婦羅蝦餅都明顯會見到有蝦肉粒
另外蝦餅仲有野菜去炸
所以好大塊 食到最後食唔哂😅

見到menu上仲有鯛魚湯烏冬 又有咖喱炸鹿兒島豬扒飯 燒牛舌丼都好想食 決定下次再去試

元朗冰室 (尖沙咀)

是日大約1:30pm去食
去到先係風口吹到頭到痛 勁大風 問呀姐可唔可以調位 點知勁無禮貌話出面都有人等
咁我又唔係霸你兩張枱 關有無人排隊咩事
跟住另一個點餐呀姐仲好笑
我地2個人本來叫左一個飯 諗住叫多個辛辣麵餐 但呀姐話2點先有 咁我地話轉頭再落 諗下再叫
個時我地都無為意
結果諗到食咩啦 再叫個陣 首先個呀姐已經多次無視我地 叫左好多次先落單
然後我地叫左第一個就走左去
正當我想話 我2個人叫一個餐你就走都走唔切？
無啦啦上左杯野飲 原來呀姐私下自己竟然幫我落左第一次個個餐
Wt? 你同我講未到2點你得賣 我話再睇下諗下食咩 你走左去同我落餐？
跟住仲想屈話個飯出左啦 想擺我枱
如果你服務好d態度好d 我都算
跟住我地問佢咁其實你幫我落左
幾多個餐
點知呢位呀姐又轉頭走鬼左佢
左走右走 死都唔理我地
然後幾經辛苦叫到個好似經理既人
點知同呀姐一樣無禮貌 仲暗串我地咁你宜家想落咩呀又
嘩 真係想即有走人 但佢又屈左杯凍檸茶放我地枱面
跟住野食黎到 當然垃圾 個烏冬係噹噹最差個隻烏冬 招牌厚豬扒只係一塊普通豬扒 唔覺待吃厚 特別好味 真係呃鬼人
咁樣叫特色豬扒 ….

Oolaa (上環)

難得放假，唔想係屋企hea過，於是約朋友出去食個tea。上網見到呢間環境幾好，3點幾去到，都坐咗8成人，我地被安排坐係窗邊，不過對出係街市垃圾房，所以view就痳痳啦。叫咗兩樣野食，埋單大約三百。

1) 和牛漢堡配手切薯塊
- 可以揀芝士同兩種toppings，toppings要左煎蛋同紅菜頭，芝士要middle cheese。和牛好juicy，不過牛味就唔算太重，芝士無咩味，麵包軟熟。整體都唔錯，不過又係食既時候好論盡。2) 奄列
- 又可以揀topping，揀左煙肉。奄列好味好滑，唔會煮得過熟過老，仲有d蛋汁包係入面，呢個回味encore。

嘉樂冰廳 (荃灣)

一直想試巨大版奄列，但知道星期六日黎會好多人排隊，所以難得閒日放假，就同朋友兩個人去食。兩個人叫咗三樣野，埋單大約一百蚊左右，算抵食。

閒日大約3點到，都坐爆場，餐廳好細，都係以卡位為主。

1) 細奄列
- 原來奄列有分大同細，大既$5X，細既$3X，我地叫咗個細既，仲有個牛油方包。細既都好大份，粗略估計大約有4隻蛋左右，入面仲有火腿絲。味道方面好普通，真係得個外形吸引，試過就未必會再叫。2) 炸雲吞
- 炸雲吞香口好味，而且仲有兩隻口味揀，有蝦同菜肉，我地叫咗蝦，相對就無咁濟。炸皮薄，可以encore。3) 阿華田奶昔
- 呢個最有驚喜！$26 一杯，飲落好濃阿華田，亦唔會變水浠浠，所以飲完都好飽肚，但呢杯野係最深刻，下次想試埋好立克奶昔。