妹頭~* 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2009-06-24
呢間餐廳o係我中學時代成日都黎食lunch~ 總覺得味道麻麻而且唔多抵~ 但係就夠大碟~ 近排見到佢多左咁多食評就相約好友過黎食啦~ 因為係父親節前夕, 分左兩round booking, 我地book左second round, 訂枱時各服務生告之會被安排o係outdoor~ 幸好去到既時候可以座進餐廳內.. 如果唔係真係熱死同埋會餵蚊呢.. 我地有6個人,原本想叫個4人套餐再散叫~ 但計過數後發現set 既價錢竟然相若. 所以散叫左豬頸肉$49, 鰂魚沙律$78, 泰式炒椰菜苗$39, 泰式蟹中寶$168, 香草炒粉絲$55, 菠蘿海鮮炒飯$59, 甜蜜蜜香盞$29 侍應先放低兩籃蝦片做小食~呢d香口野~當然好味啦~ 先上豬頸肉, 反應不錯~但我冇食, 應該味道還可以啦~ 鰂魚沙律: 其實係將鰂魚起肉去炸, 因為配左d香料,蔥, 辣汁, 醋等, 因為太熱氣同埋辣,朋友們對呢個菜冇咩興趣, 所以大部份係我食晒, 其實只係帶有酸辣, 但真係幾熱氣既. 泰式炒椰菜苗: 侍應落單時介紹的菜~menu上面冇架~ 一向o係九龍城有食開此槨苗, 而且我覺得唔錯~但朋友就話太多纖維,好有口感. 泰式炒其實食唔出有咩特別~ 下次可以試其他炒法,應該更好~ 泰式蟹中寶即係焗大麵包+咖喱蟹, 賣相好靚~一見到即刻諗起翠苑既農夫包~ 蟹唔係好大隻, 可食到既蟹肉都唔算多~但都有鮮甜味~ 其實食呢個餸我只係focus o係咖喱汁同埋麵包度~ 咖喱汁的配料有洋蔥,蔥同青椒..不辣,又唔多夠咖喱香, 好失敗既咖喱汁, 好似自己屋企整亦會比佢好味呢… 幸好大麵包烘得香脆, 就算就咁食同蘸汁食都好味! 就算係浸透左汁變得淋左既底部我我呢個包妹都唔放過佢~ 但以咁既價錢淨係為左佢個焗大包似乎唔係好抵喎… 再黎個香草炒粉絲, 其實唔知道係辣架~ 而且有兩為朋友都覺得太辣食唔到~ 又係我包底…其實我覺得唔算好辣~ 加有珍珠筍, 豆角, 紅蘿蔔, 椰菜, 雜豆,草菇, 腰果一齊炒~色彩繽紛~ 炒得夠乾身又唔油, 又多餸~相當不俗… 菠蘿海鮮炒飯亦比相像中好~同樣係落好多餸去炒~ 有臘腸, 提子乾, 菠蘿粒, 海鱗則有兩隻青口, 魷魚同蝦. 但已食得太多包既我只能淺嘗喇… 最後既甜品甜蜜蜜香盞又教我地失望喇~ 可能大家都對佢有期望啦~都係傳統既拔絲香蕉好味好多~ 到埋單既時候先發現原來蝦片小食每碟$10, 而4人以上就會比兩碟~ 各位要留意喇… 總括黎講其實食物都唔差既~不過地點就較難搵~ 如果冇人帶,就要搵下路喇...(原來座室內都有蚊架!) 推介美食: 椰菜苗, 香草炒粉絲, 菠蘿海鮮炒飯
評分: 味道 4 環境 3 服務 4 衛生 3 抵食 4
2009-06-17
訂枱時已request window seat~ 我地比預期遲左黎~14:30開始, 約15:15先黎到…. 甫座下朋友已經大讚個view好靚~ 以今日晴朗天空黎嘆個tea buffet~確係不錯~ 雖然我地唔近buffet枱~但已被香氣催促我地快d動身拎野食喇~ 首先當然係沙律,迷你包同壽司啦~ 沙律區有三款沙律菜, 一盆粟米紅腰豆, 烤薯仔, 蟹籽蟹柳冷麵, 豆角素雞, 醉雞等… 千島汁/油醋汁. 迷你包有4款: 全部都夾左生菜,可揀碎蛋, 凍肉,火腿片或兩層三文治 壽司: 只食左三文魚同吞拿魚兩款, 魚生冇渣,ok 仲有細細碟既玉子豆腐: 有蟹籽o係上面, 朋友話好滑食左兩個. 跟住就到即炸天婦羅同中式點心區. 天婦羅炸漿薄, 食左南瓜,蕃薯, 茄子, 冬菇都好味呀… 牛肉/豬肉燒賣: 冇食~但朋友話普通 粟米粥: 粥身杰, 就只有粟米,但夠味道. 跟住向熱盤同小食類出發~ 小食有椒鹽豆腐, 日式餃子,煎韮菜粿 春卷, 迷你pizza, 叉燒酥, 牛/雞串燒,雞翼等, 整體質素唔差, 最鍾意椒鹽豆腐同叉燒酥,另外熱食仲有炆伊麵. 跟住當然到我既主菜desserts啦… Danish約有5款選擇, Raspberry jam Danish好鬆脆呀~ 提子muffin 搽左cream & jam 好好食~ 有即製pancake, 可自選多款新解生果做餡, 味道普通, 相比之下waffle好食好多~雖然係整定~但仍然脆. 自行加各種fruits, nuts同醬… 當然我配埋雪糕食仲正啦~ 呢度既雪糕係movenpick, 亦係我揀食呢度既主要因素. 4款雪糕, 朱古力, cappuccino, strawberry, 開心果. 最鍾意當然係朱古力同 cappuccino味道啦~ Highlight緊燕窩甜品, 有燕窩燉蛋, 燕窩酥皮蛋撻, 燕窩蛋白杏仁茶, 酥皮蛋撻皮已淋左~燉蛋味道普通, 最驚喜係杏仁茶好好味喎…. 味道唔似開粉, 冇苦澀味~但又唔太甜… 當我食完雪糕後食~更好…可以暖下胃… 跟住仲有好多細細碟既dessert, 有chocolate mousse, tiramisu, 紅豆糕, 菠蘿蛋糕, 咖啡奶凍等… Chocolate mousse有個朱古力味脆底~幾濃朱古力味. 紅豆糕:幾多紅豆 菠蘿蛋糕: 賣相精緻, 雖然係較平價款式, 但味道唔錯. 而我每次次到呢間hotel, 必食其芒果拿破崙, 今次食左兩件半~拿破崙做得幾好~酥皮鬆脆,芒果好甜..吉士份量剛好. 餐飲要左熱咖啡,幾香濃, 配埋佢地既cookies, 唔錯..cookies好脆多nuts,有口感. 另外一讚service, 由電話book枱,進餐, 埋單等~ 每個staff都好有禮貌, 收碟快~ 而且我同朋友座到成6點3都完全冇黑面或趕客.. 反而我地阻住佢地,就有d唔好意思添… 整體大家都好滿意~多謝朋友呢餐生日飯~ compass visa做緊85折. 推介美食: 即炸天婦羅, Danish, movenpick雪糕, waffles, 燕窩蛋白杏仁茶, 芒果拿破崙, cookies
評分: 味道 4 環境 5 服務 4 衛生 5 抵食 4
2009-03-17
星期日三個人dinner~ 等左約45mins先有枱~ 叫左BEA card promotion個餐, 有海皇湯, 大蝦雞尾杯, 香草麵包條, 龍蝦仔哈哈pizza,自選意粉(要左菠菜汁雞皇意粉), 木槺布甸, 汽水 落order後,5mins海皇湯已到~ 海皇湯:幾creamy, 入面有三隻蝦仔~湯顏色幾靚~味道普通 菠菜汁雞皇意粉:有冇攪錯,意粉仲快過d頭盤..算數~要照食~因為凍左唔好食~~ 其實呢個意粉係好味~夠多菠菜汁~清清地~但係timing唔岩~ 香草麵包條: 過多5mins先黎呢個多士~…因為要新鮮焗~呢個我明白需要時間~ ~但係冇理由個大蝦雞尾杯仲未到~只係菜沙律啫…駛唔駛咁耐呀~ 麵包條好食, 沾多d茄汁會更好味~ 幾油~ 龍蝦仔哈哈pizza(厚批): 個presentation幾特別~究竟中間隻龍蝦仔真定假既呢… 冇食到~ pizza味道普通,唔難食~好似比平時既pizza冇咁多芝士~ 每件都有d類似龍蝦仔肉既肉分怖~ 仲有洋蔥, 黃椒, 粟米, 磨菇, 車厘茄, 青瓜片上有d話係魚子既野~其實都幾多料, Pizza黎左後,再追個salad~幾mins後終於黎~真係嬲~ 所有次序都調亂晒~ 好既餐廳係就算多人都要keep住產品質素架…. 大蝦雞尾杯: 有d生菜o係底, 兩片桃, 兩隻蝦, 一粒車厘茄, 加d千島汁~ 咁普通簡單既野有需要整成40mins 嗎? 木槺布甸: 出孚意料既細~原來係迷你木槺布甸~其實好應該o係menu上寫明啦~ 如叫其他套餐加呢個甜品仲要加$13,超唔抵~ 又唔好食~ 今晚食得好唔滿意~一來上菜次序錯誤~二來甜品質素差~ 三來用黎換碟既碟仲有水, 冇整乾就俾客人 唯獨最令我滿意既係侍應不停幫客人加水~同埋食物夠熱~ 基本上味道係冇乜大問題架... 推介美食: 香草麵包條, 菠菜汁雞皇意粉
評分: 味道 3 環境 4 服務 2 衛生 3 抵食 3
2009-02-09
好同事生日, 所以想搵間未食過既餐廳同佢食個好d既lunch, 諗起呢間前身係法國餐廳的sammy’s kitchen, 上黎OR睇過~好似都唔錯~得知訂枱會有dessert送~ 於是即日先打去~ 原來lunch set已包甜品,而訂枱則會送碟小食. Lunch set有6款主菜選擇,兩個價錢, 分別係$43 & $52, 睇menu的時候, waiter 會放上餐湯+麵包, 真細心, 一來慳d時間,二來醫肚餓…. 今日既湯係甘荀忌廉湯. set我選了洋蔥西冷薯菜 $52, 同事要了茄汁蜆肉意大利飯.$43, 甘筍忌廉湯:飲得出有甘筍味道, 但不是太濃烈, 都做得幾creamy, 相信平時接受唔到甘筍隻味道既人都會飲到呢個湯. 牛油餐包有烘熱過, 所以有少少脆身,鍾意佢細細個既設計.另外呢間餐廳唔係俾獨立包裝牛油, 而係一杯牛油, 你要幾多就切幾多出黎搽, 冇錯~咁樣serve牛油係唔會浪費左, 但係點樣確保前一位客人冇加料污染左杯牛油呢…? 之後放上小食:炸雞翼兩隻. 但因為我地唔食雞~所以就退番比waiter, 點知佢地竟然換上一小碟沙律~真係好喇~沙律有薯仔,甘筍,椰果… 食緊salad既時候 ,main course就上lu…都好快~ 洋蔥西冷薯菜: 西冷的份量足, 落order時冇問要幾多成熟~ 但一切開, 好淋~唔韌, 控制得剛剛好~唯一係個薯菜竟然係薯餅,有少少特別~如果係薯條會更好.. 薯餅也炸得夠脆~但有半塊被洋蔥汁整淋左~我就唔鍾意喇~抵讚之處在唔係凍, 似係即炸~如果可以諗個方法分開d汁同薯菜就好喇~因為好多時食扒都有呢個問題架… 茄汁蜆肉意大利飯:賣相唔錯~我當然要幫手share下啦~嘻…. 好似有唔少蜆肉~但我食落就覺得茄汁味唔夠重,其實望到d飯既顏色唔係好茄汁色~ 至於d意大利飯真係控制得幾好, 飯有口感,但冇過硬或爛晒既悄況~份量唔少~ 同埋呢隻飯特別飽肚. 因為時間既關係, 未食完主菜,甜品已經擺左上枱喇~焦糖燉蛋或心太軟, 我地一致揀左 心太軟:size好迷你, 咁幾好~如果唔係之前食到咁飽仲邊食得落. 佢地既心太軟唔係平時咁樣一個倒轉左既形狀, 而係用焗杯裝住, 雖然我地等左娥5-7mins先食~ 但入面既朱古力依然呈流質狀態. 朱古力濃度ok~可以再濃d更好~ 這裡店子小, lunch如多人建議先訂枱, 雖然waiter只有兩個, 但上菜速度快~ 唔駛驚遲到番office~ 同埋真係好抵食~冇加一, 但係湯,主菜, 甜品, 餐茶都有~值得再去…
評分: 味道 4 環境 4 服務 4 衛生 4 抵食 4
2009-02-04
Book左1930,入座時話要9點鐘還枱, 4個人叫左ruby minis & salad, parmesan shrimp pasta, barbecue ribs(half), combo fajitas, dessert: tall cake,仲有一杯iced tea. 食物係一次過到晒~不過~唔係係等左幾耐呢? 因為係o係我出左去夾salad既時候已到齊~ 其實我唔鍾意所有野食一次過黎,咁樣d野食全部凍晒~ 好味都變得唔好味啦~ 不過係可以等d人快d食完快d還枱囉…. ruby minis & salad: 其實即係兩個mini burger配薯條,仲包一次自助salad bar. 麵包焗得香脆~牛肉冇over cooked, 唔錯~ 伴碟的薯條都唔錯~新鮮炸,冇淋晒~ Salad bar:選擇都幾多~有兩款生菜, 青瓜片, 蕃茄件, 栗米, 紅腰豆, 西蘭花, 椰菜花, 麵包粒, 松子仁, 薯仔沙律, 3款長通粉, 生果有西瓜, 罐頭桃, 罐頭菠蘿,4款sauce. 味道上冇乜問題, 係夾既area太窄, 好多人同時夾~同埋人人都會刻意砌多d靚d~ 所以要排隊等好耐~同埋佢地會將呢d配料切得好大件~令到你冇得夾咁多~ 真聰明……不過如果要比較~ucc的salad bar 好味d~ 我最愛薯仔沙律+栗米, 紅腰豆, 早知佢salad bar有長通粉,我個pasta就唔會叫長通粉啦~ parmesan shrimp pasta:巴馬臣芝士明蝦長通粉, 味道普通~約有8隻大蝦, 呀哥鐘意~父母覺得長通粉過硬, 我則唔太欣賞呢隻汁~還是蜆肉意粉較理想. barbecue ribs(half): 切開約有6件骨~肉唔韌, bbq汁好味~ 伴碟的薯蓉質感太實,而西蘭花則太硬. combo fajitas: 鐵板牛柳條+雞,有4塊薄餅, 蕃茄蓉, 青椒粒同芝士碎,蕃茄辣汁俾你自己包住d肉食~ 先講牛柳條,超韌. 雞唔滑~完全over cooked+唔好味~墊底有洋蔥,青椒,紅椒係油左d,不過就可能索晒d肉汁~反而幾好~ 薄餅一拎上手係凍的,又硬, 屋企人冇食到~我唔想浪費,食左兩塊~ 用薄餅黎包salad同埋佢墊底的洋蔥, 效果唔錯~呢個dish最好係個蕃茄辣汁. 因為所有野都好滯~所以都夠飽~ 但我當然唔會錯過tall cake啦~因為佢反而係我黎ruby Tuesday 既原因~ 哈哈~ 我食得太慢了,食到差不多9點先落order~ Tall cake係兩件朱古力蛋糕夾住chocolate mousse, 上面有兩球雪糕~仲有cream. 我一個人食左6成, 朱古力味加上雪糕可中和甜味~ 如果冇落cream更好~ 我鐘意呢隻蛋糕同雪糕既質感~實實地~ 朱古力味再濃d更好~ 笑瞼係比tall cake的. 總括最好係burger同salad,同個dessets. 埋單用AE Credit card有6折~ 如果唔係有折真係唔會黎~比正價去食dan ryan’s 好過~ 到我地走時已差不多9點半~但都冇人催過我地~ 推介美食: ruby minis & salad, tall cake
評分: 味道 3 環境 3 服務 4 衛生 4 抵食 3
|