誠日本料理 (灣仔)

早前係Groupon買左個2.5 小時半自助餐, 都要 $198/位 及 $388/2位, 另需加10%服務費, 見個餐單有原隻鮑魚壽司 (每人一件), 又有任食美國安格斯西冷牛扒, 係比別家的全放題還要貴, 諗住佢貴d就會比足料啦….買左3個人卷

早一日打去book位, 開開心心諗住食餐好嘅, 6點幾上到去全場得我地一檯, 一個疑似老闆娘嘅人比左個冷氣唔到, 用把風扇係隔離吹住個頭的位我地 , 我地問佢要第2個位佢話今日爆晒得返呢個位 (當時只得我地, 都唔知點解唔肯換個位比我地, 有無攪錯), ok算, 咁唯有照坐啦 …..未有野食周圍望, 發現牆上掛滿大大隻字的中文餐牌同價錢, 好似壁報板咁, 好有大排檔 feel

跟住就比左個當日食咩個餐牌我地睇 (見下圖, 同團購果時登出黎一樣架), 佢開始話無 “美國安格斯西冷牛扒”, 今日無貨到, 咁我地問佢用咩補返, 佢話無就係無, 無野補上, 咁我話無呢個牛我唔買呢個卷啦, 大家哦左一陣佢就話比返2串牛舌我地補數, 我地問咁牛舌係咪任食, 佢又話唔得.

跟住上 “任食前菜”, 又黎話個 “神秘食材” 係無嘅, 我地已經講 “又無”…..咁你張餐單又寫….佢就話係無架, 咁就行左去…
枝豆: 一般食到的味, 咸咸地, 正常無特別
日本餃子: 係炸嘅, 脆卜卜, 都ok嘅
燒三文魚腩: 連皮燒, 好腥
神秘食材: 無供應

刺身: 每人有3片三文魚, 3片吞拿魚, 4片章紅魚 – 都算新鮮, 但唔算特別好食, 其實同一般日式料理一樣啦

食食下前菜個女人又埋黎講, 個任食燉湯, 唔係任食嘅, 只可以每人一盅, 跟住行左去…….我地即時講有無攪錯, 雖然我地都未必會飲第二盅, 飲到成肚水, 但唔係任食又做乜寫任食, 係咪呃人買卷, 氹人落搭呀, 開始覺得佢全心昆客買卷….

跟住個壽司黎啦, 6款每人一件: 全部壽司飯唔夠軟身, 有少少似煮飯生米粒, 飯有少少散, 麻麻地

燒三文魚: 同普通三文魚無咩分別, 唔覺係燒, 係個面比新鮮的乾少少
鰻魚卷: 用紫菜包住, 有d鰻魚汁, 但我相信卷左好少鰻魚, 因為食唔到鰻魚咁滯
和牛油粒壽司: 無咩印象係咩味
加州卷: 呢個食落好似有少少海膽質感係入面, 幾好食
和牛油粒梅子壽司: 好苦, 好難食
帶子壽司: 粒帶子幾鮮味

任食燒物: 全部都係食左一件
黑毛豬: 淋身唔鞋, 整到好似中式叉燒, 個味都有少少似, 只係無咁濃蜜味
豬扒: 一舊肉質算淋的豬扒, 係個面煎香左, 肉係無乜味, 似乎係雪藏貨
雞扒: 同豬扒一樣感覺
雞翼: 又係入面無咩味好淡, 係個面煎香左
燒翠肉瓜: 一般
雞肉串: 3個人黎得2串, 味一般同出面食差不多

燉湯: 係個中式燉湯, 雪梨雪耳, 意米紅棗, 仲有d菰 – 呢個唔覺有咩特別好飲, 同一般中式燉湯無異, 亦唔覺有鮮味, 似一般燉瘦肉湯咁, 團購寫佢個湯用河豚炮製, 但係唔見有囉, 亦可能因為無落, 咪無鮮味囉 @@……..呢個就係菜單寫任食但係去到就講只得一人一盅果個

任食天婦羅
魚天婦羅: 炸得都脆身, 但魚肉又係無乜味
南瓜天婦羅: 南瓜好甜, 炸得脆身, 最好食呢個
茄子天婦羅: 炸得都脆身, 茄子是好吸油的, 但呢個不會食到一口油, 算唔錯.

野菜湯麵: 黎左2碗, 好淡, 真係得d娃娃菜同一舊冬菰, 烏冬就好滑, 湯底係白色, 唔知係味魚湯底, 但成碗野無乜味 , 我地只食左一碗, 另一碗原封比佢拎返走

食到呢度我地都停晒口, 檯面d野都食唔晒, 因為唔多好食…..
望見隔離檯又係睇果個餐牌, 見佢地個刺身有甜蝦, 又有帶子, 吞拿魚, 章紅魚….e 點解有帶子咁正, 問個 waiter 佢地個餐係咪同我地一樣, 佢話係…..咁問個老闆娘點解佢地有呢d我地無, 佢又話隔離個餐同我地唔同, and 頭先有立魚返, 即刻比左我地先, 隔離檯無晒立魚先比呢d 佢地, 咁我食果個究竟係章紅魚定立魚呢?…..佢見我地有d不滿就話補返3隻甜蝦比我地, 真係3條蟲仔 size.
但到我地走時, 見隔離檯跟住上的菜同我地係一樣, 點會係第2個餐, 近來都係得呢個餐做緊咋嘛, 証明呢間野真係連講野都亂咁up 求其洒個客就算 @@

無無聊聊睇下個餐牌….oh….我地個鮑魚壽司呢, 又叫個女人黎問佢個鮑魚去左邊, 佢先話無鮑魚比左帶子啦……..吓, 又無, 佢團購賣點係 “壽司款式包括原隻鮑魚及和牛油粒，選料上乘，絕無欺場”…….我話絕不老實, 非常欺場就真!

補返無任食牛扒果個 牛舌黎啦: 好食, 但係得2串, 每串2片, 係比我地3個人分……由原本任食牛扒變4片牛舌, 呢間野真係cheap都暈 @@

呢餐真係有d慶, 有無攪錯呀, 個餐單已經唔多野食, 個價都唔係平, 賣點鮑魚- 無；安格斯牛扒-無 ; 神秘食材 -又無；任食燉湯-得1盅……..真係不能接受, 分明呃錢, 掛羊頭賣狗肉, 搵笨, 乜都無點解唔之前通知人, 我上去前再打上去話而家黎都唔講, 唔係擺明昆水都無人信!

2.5小時的時間, 我地食左1個鐘3個字已經唔想再食, 佢有問我地有咩想加, 加乜呀, 全部貴價少少的野都話無, 得返 d cheap 野, 你地收左人地2舊水一位架, 比野菜烏冬同翠肉瓜, 雞翼人食過唔過份 d 啦, 無左牛扒好應該比牛舌或其他同級數食物比客人任食返啦, 又想收錢又唔捨得比人食, 不知所謂, 咁做生意客人唔會有下次, 根本間野都無心做落去, 似乎想做乜呢轉執笠咁款 !

之前講話今晚爆滿, 無位轉比我地, 到我地走時8點啦, 計埋我地全場先得4台客咋, 大把吉檯, 咁叫爆滿 ?

呢間野, 買左卷的去之前打去問清楚係咪齊晒d野先好去; 無買的, 唔使去, 唔好晒錢, 我去元氣食都滿足過呢餐, 間野食味好一般但唔平, NOT worth !

富豪軒 (沙田)

當日訂左位去飲茶, 2個人叫左 5樣野, 發覺 d 野縮晒水, 之前都間中有黎, 點心真係一次比一次細粒, 變相加價

脆皮蘿白絲腸粉 ($68) :
雖然整得幾好食 , 一碟 2 條, 每條3件, 比起之前用長條形碟裝果時, 個圈位矮左一半都有, 即是縮水一半, 好扁身

鳳爪排骨煲仔飯 ($48) :
又係的骰煲仔, 裝開得 2個飲茶的碗仔, 味道一般

蝦餃 $38 :
size 正常, 味道正常, 不算突出

麻羊生煎包 $28 :
用煲仔飯的煲上, 一打開, 果 3 粒包細到呢, 好似雞仔餅 size, 以前都有係度食過呢個包, 今次真係細得可憐, 我未見過生煎包咁細過, 佢 3個加埋都無一個正常雞包仔咁大, 又係扁撻撻, 無乜餡, 羊味都幾蘇

蕉糖蓮蓉西米布甸 $28 :
用一個迷理南瓜形的盛器上, 太約係酒家飯碗 size, 可惜又係縮水, 裡面得 5-6成滿, 3啖就食完, 味道又係一般, 蕉糖效果沒有, 有 d 杏汁味咁, 甜度就幾適中

食完呢幾樣野都咁細碟, 已經唔想係度再叫其他野食

茶位 $13/位, 前菜得花生, 我地無要, 唔使比錢, 我諗都應該都要十多蚊碟

咁埋單就 $236 +10% = $260

山頭火 (沙田)

呢個食評本來一早寫, 拖拖下今日先得閑寫

話說1月8日係新城市行完, 上左7樓, 見開左好幾間日式餐廳, 由於係星期六晚, 間間都好多人...
見山頭火門口d食物 demo 都幾好, 又最快有位, 就入左去啦．．．

環境都幾迫夾, 檯與檯之間無乜距離, 2個人同隔離的 2 個人檯只拉開一條線位

由於當日好晏先食完 lunch, 仲未餓, 所以叫左少少野就算 ...

呢度唔係比綠茶, 係比清水嘅 ~

壽司定食 $88 -
有 2 件三文魚壽司, 2 件帶子刺身壽司, 一碗拉麵, 半只蛋及少許酸菜墊底

三文魚生無乜特別, 腩位, 都算新鮮, 帶子好有味鮮, 但係飯呢一夾就散, 不合格

拉麵有 4 款湯底, 我要左醬油味, 有d似豬骨湯味, 每碗都係配左 2 塊薄薄的豬腩片,
個湯底好油, 成層厚油浮係面, 但聞到都幾香,
麵質幾好, 有彈性又不是硬
豬腩肉, 有一層好肥 (層肥野無食啦), 瘦果層就鞋
呢碗麵單叫要 $58, 如得咁少送, 實左太貴

蛋, 就係半只普通的烚蛋

羊肉飯 $38 ,呢個單點架
一小碗, 羊肉係用d洋蔥炒後蓋係飯面嘅, 肉幾有羊蘇味, 怕蘇的勿試, 肉質就拿得幾勁, 好淋. 聞到就好香, 吃時個汁似和風牛肉飯, 但越食越咸, 仲有 d 苦味 .....不推介

是晚回家後非常口渴, 味精應該好勁
除左個拉麵質感我覺得好之前, 其他野都唔 ok, 最重要係之後勁口渴, 唔會再去了

有加一服務費

小南國 (銅鑼灣)

2010年1月23日, 係時代行街後, 本來想去利苑食, 點知 full booking....
咁去小南國啦, 之前係沙田店新開時食過一次都唔錯, 雖然價位略貴,
去到, 唔使等位, 即入, 睇下叫咩食先 ........

坐底後....嘩, 環境非常嘈, 坐我對面同我講野都幾乎聽唔到, 好轟耳, 成程飯都好嘈

入座前菜 - 菜甫 (太約要 $20)

薺菜卷 - 用百結葉包卷著薺菜蓉再切件 : .size 細細碟 $48,
見佢 catalogue 影得幾靚, 仲影 close up 添, 諗住都應該唔差卦, 叫嚟試下...點知....全件都無乜味, 只係得 d 菜青味, 幾難食, 奶晒野..
個味好寡, 我用左松子魚個汁點黎食, 叫做好 dd 啦,,,只係無咁難食, 同好味仲有十萬九千里路程
最後我地 3 個人都無辦法哽晒佢, 咁細碟都食淨 1/3, 真係食到口都歪埋, 我覺得佢起碼整 d 醬汁比人點食, 起碼都叫有味先啦

花雕雞半隻 $118 :
我覺得唔夠花雕酒味, 雞唔夠香亦都唔夠滑, 就係個肉質同於其他地方吃過的有些少分別, 外面的雞肉比較有彈性, 呢家就 feel 唔到
我之前係沙田分店食過, 酒味香些, 雞亦然, 做得比此店較好, 但係光顧沙田店都係好耐的事, 而家有無差到唔知了.

松子魚, 此條是鱸魚 $188 :
我地以為 $188 係桂魚, 原來呢個價只係比鱸魚, 如果用黃魚或桂魚就要 $260, 好貴啫
由於未係小南國食過呢味, 想想下都決定唔比咁多錢, 試下個味得唔得先, 就點鱸魚先...
個甜酸汁味都叫可以, 唔係太酸, 但就唔太出色, 初上菜時都脆口, 放耐少少就開始林啦, 條魚肉質鞋口, 無魚味, 我地一致認為唔值得再食, 而且佢此菜做價比同業貴但又不出色, 所以不會再吃

埋單共 $460, 以價錢與食物質數, 以及環境非常嘈雜, 服務亦一般, 總結 : 此店不會再嚟

譽居 (沙田)

之前見開左呢間譽居, 有一天已想入去試下, 但係門口就聽到人講個撈麵好難食, 即時打退堂鼓

24/1 下午茶時段經過又未食野, 就入去試下 :

坐低後無耐就有伙計遞上一壺茶, 喚, 原來呢度收茶錢 $2/位

係下午茶餐牌叫左個柱候牛筋腩麵 $24, 細細碗,

腩汁好香濃, 食完又無話口渴, 唔係味精湯
牛筋同牛腩好淋又入味, 一d都唔 un
麵質亦爽口彈牙, 有少少鹼水味但不重, 這個麵的軟硬度很合我口味, 唔錯喎

可以加錢配其他食物或飲品, 比如配熱飲就要 + $4, 另有加一服務費

以下午茶來講, 我覺得貴 , 份量又不多, 我食完都唔係好飽果隻, 如加埋熱飲同茶錢, 一個下午茶餐就要 $33,

環境就幾舒服, 中式裝修, 當日都唔多人, 幾清靜

由於只係食左呢款, 其他野得唔得就要下次再試